1 Nk'hili nk'hulu za kwingila mwo mzi wa Yeliko nezivugaliswa kwa kundani, kwajili ya Waizilaeli. Hahana mnt'hu adahaga kwingila hegu kufosa mwo mzi uwo. 2 Zumbe Mnungu amgambaga Yoshua, "Kaula miye hiika mwo udahi wako, mzi wa Yeliko hamwenga na seuta ywakwe na watowani wakwe wata ludole. 3 Weye na wadya want'hu wata vitowanilo wose nomuuzunguluke mzi uwo nk'hanana imwenga kwa mazuwa mtandatu. 4 Walavant'hambiko mfungate kila yumwenga nakanda kenula gunda dyakwe dya hembe dya dolome, nawande kulongole ye Disanduku dye Ndagano. Mwe dizuwa dyo mfungate nomuuzunguluke mzi uwo nk'hanana mfungate, walavant'hambiko nawo nawatoe magunda yawe. 5 Aho mkeza kwiva watowa magunda yawe kwa izwi kulu, want'hu wose nawagutile kwa izwi kulu, aho viwambaza vo mzi uwo nevimokele hasi, naho kila mnt'hu naaukump'hukile umzi uwo."

6 Ivo, Yoshua mwana Nuni awetangaga walavant'hambiko no kuwagamba, "Dinuleni Disanduku dye Ndagano dya Zumbe, walavant'hambiko mfungate nawo waguhe magunda mfungate ya mahembe ye zindolome, wande kulongole ye Disanduku dya Zumbe." 7 Yoshua niyo awagamba want'hu, "Iteni kulongole mzunguluke umzi, want'hu wata vitowanilo waite kulongole ye Disanduku dye Ndagano dya Zumbe." 8 Aho Yoshua eze alonge na want'hu, wadya walavant'hambiko mfungate wandaga na magunda mfungate ya mahembe ye zindolome ha Zumbe walongolaga wakatowa magunda yawe, Disanduku dya Zumbe nadyo dyawatimilaga. 9 Wadya wata vitowanilo niyo walongola, wadya walavant'hambiko awo wandaga wakatowa magunda, naho wamizi watuhu watimilaga Disanduku idyo naho magunda nayo yagendeelaga kutoigwa. 10 Mna Yoshua niyo awagamba want'hu, "Msekugutila hegu kulava izwi hegu mbuli yeyose kulawa mwe milomo yenyu, kubula aho mwe dizuwa nize niwagambe mgute, mwo lupisi ulo nomgutile." 11 Ivo elo, Yoshua awatendaga wadya want'hu wauzunguluke mzi nk'hanana imwenga wakanda wenula Disanduku dye Ndagano dya Zumbe, na kuuya mwe nk'hambi wakagone. 12 Yoshua enukaga kilokilo, walavant'hambiko nawo wadinulaga Disanduku dye Ndagano dya Zumbe. 13 Wadya walavant'hambiko mfungate wata magunda mfungate ya mahembe ye zindolome waitaga kulongole ye Disanduku dya Zumbe na kugendeela kutowa magunda yawe. Want'hu wata vitowanilo wawalongoelaga walavant'hambiko awo. Na wamizi watuhu wandaga kunyumma ye Disanduku dye Ndagano dya Zumbe Mnungu. 14 Mwe dizuwa dya kaidi, wauzungulukaga mzi uwo nk'hanana imwenga, niyo wauya naho mwe nk'hambi yawe. Watendaga ivo kwa lupisi lwa mazuwa mtandatu.

15 Mwe dizuwa dya mfungate, kwize kuche wenukaga na kuzunguluka mzi uwo enga viya watendile. Zuwa idyo nidyo du wauzungulukaga mzi uwo nk'hanana mfungate. 16 Ize ibule nk'hanana ya mfungate, aho walavant'hambiko weze watowe magunda yawe, Yoshua niyo awagamba want'hu, "Gutileni, kwaviya Zumbe Mnungu kawenk'ha kale mzi uno! 17 Mzi uwo noubanangwa na kila kint'hu chakwe, enga nt'hambiko alavilwe Zumbe. Lahabu yudya mpamp'he niye akuunga ahone du hamwenga na wadya wandile mwe nyumba yakwe kwaviya nakawafisa wapelembi wetu. 18 Mna msekuguha chochose icho kilavilwe Zumbe, kwaviya mnaguha kint'hu chochose alavilwe Zumbe nomuitende nk'hambi ya Izilaeli kunda kint'hu cho kubanangwa. 19 Mna masawa yose na zahabu na vint'hu va shaba na chuma ni vint'hu vikukile kwa Zumbe Mnungu, ivo neviikwe mwe kindolo cha Zumbe."

20 Ivo elo, want'hu wagutilaga uku magunda yakatoigwa. Want'hu weze weve izwi dyo kwanga wagutilaga niyo zink'handula zo mzi uwo zabogozokaga. Ivo want'hu wautowaga mzi kila yumwenga kulawa hant'hu aho andaga. 21 Ivo, wabanangaga kila kint'hu mwo mzi uwo no kuwakoma kwa mabamba wagosi na wavele na wabwanga na wadala na ng'ombe na ngoto na mp'hunda.

22 Yoshua awagambaga wadya wapelembi waidi awo wezile kuipelemba isi iyo, "Iteni mwe nyumba ya yudya mp'hampe mwize naye uyo mvele na wanduguze wose enga ivo mwakelisile." 23 Ivo elo, wadya wabwanga wapelembi waitaga, niyo wamleta yudya Lahabu na walesi wakwe na nduguze na want'hu wose we mp'huga yakwe niyo wawaika kuse ye nk'hambi ya Izilaeli. 24 Niyo waubananga kwa moto mzi wa Yeliko na kila kint'hu chandile umo. Mna masawa na zahabu na vint'hu va shaba na va chuma vaikagwa mwe kindolo cha Zumbe. 25 Mna yudya pamp'he Lahabu hamwenga na want'hu wose wa mwe nyumba ya ise, Yoshua ayokolaga wikazi wawe. Lahabu niyo ekala na Waizilaeli kubula ivi dyelo, kwaviya nakawafisa want'hu awo, Yoshua awatumaga kugenda kuupelemba mzi wa Yeliko.

26 Mwo lupisi ulo Yoshua akelisaga akagamba,

Mnt'hu akuunga auzenge naho mzi wa Yeliko,

naaligitwe ha Mnungu,

Yeyose akuunga aike nk'hongelo yo mzi uwo,

nt'hulasasu ywakwe abanike.

Yeyose akuunga azenge nk'hili nk'hulu zo mzi uwo,

kiziwanda chakwe kibanike.

27 Ivo elo, Zumbe Mnungu andaga hamwenga na Yoshua na nt'hogola zakwe niyo zenela mwe isi yose.