1 Umwo seuta Yabini ywa Hazoli eze eve ivo, egalaga ulosi kwa seuta Yobabu ywa Madoni na kwa seuta ywa Shimloni na seuta ywa Akishafi 2 na kwa maseuta wa kwe isi ye vigulu nt'hendelo ya mkoma mahanya, na mwe dikolongo dya Yolodani Kwa mwenye mzi ye diziwa dya Galilaya mwe diwandamo dye vigulu vo ulailo wa zuwa, na kwe magundi ya Nafati Doli kwe nt'hendelo ya usweelo wa zuwa. 3 Iviaivia egalaga ulosi kwa Wakanaani wekalaga nt'hendelo za Ulailo na Usweelo wa zuwa wa Yolodani, na kwa Waamoli na kwa Wahiti na Wapelizi na kwa Wayebusi wekalaga mwe isi ye vigulu hamwenga na Wahivi wekalaga mwe diwandamo dyo mnima wa Helimoni mwe isi ya Mizipa. 4 Wezaga na mafyo yawe ya watowani, fyo kulu, uwazilo wawe ni enga msanga wa kwe bahali wakanda na magali ya nk'hondo yakwigalwa ni falasi na falasi zibindile wingi. 5 Maseuta awa wose wakelungaga hamwenga na mafyo yawe ya watowani, niyo waika nk'hambi hagihi ne nc'hoko ya Melomu vileke watowane na Waizilaeli.

6 Zumbe niyo amgamba Yoshua, "Usekuwogoha awo. Luvi lupisi enga ulu, neniwakome wose kwa kuwenk'hani uhumi mwawe. Nomsenge matimbila ye zifalasi zawe na kuyoka magali ya nk'hondo yakwigalwa ni zifalasi." 7 Ivo Yoshua ne difyo dyakwe dyose dya watowani aaho wawakump'hukilaga uko kwe nch'oko ya Melom, 8 niyo Zumbe awenk'ha udahi Waizilaeli wawahume. Wawatowaga na kuwakulumbuza kubula kwo mzi umanyikise wa Sidoni na Misilefosi maimu kubula kwe nt'hendelo ya ulailo wa zuwa we dikolongo dya Mizipa. Waizilaeli wawatowaga naho hawasigazaga yeyose kunda mgima. 9 Yoshua atendaga enga ivo Zumbe alongaga. Akang'ant'haga iviga ve zifalasi zawe niyo ayoka magali ya nk'hondo yegalagwa ni zifalasi.

10 Mwo lupisi ludya, Yoshua auyaga kunyuma niyo autaha mzi wa Hazoli na kumkoma seuta ywakwe, uyo niye andaga mkulu ywo useuta udya wose. 11 Wawakomaga want'hu wose wandaga aho, hakwandaga na yeyose asigalaga kunda mgima, naho mzi wa Nazoli nawo niyo awoka pele.

12 Yoshua aitagaha mizi ino yose ye kiseuta na maseuta wakwe na kuwakoma pele want'hu wose enga ivo Musa mndima ywa Mnungu asigiilaga. 13 Mna Waizilaeli hawokaga mzi wowose wazengwagwa mwe zisugulu ze nyumba zamokaga. Mna ni mzi wa Azoli du udya wokagwa ni Yoshua. 14 Waizilaeli waguhaga vint'hu vose va ugoli viya wavitahaga ne mifugwa kulawa mwe mizi iyo vinde vawe, mna wawakomaga want'hu wose we mizi iyo. 15 Enga ivo Zumbe amsigiilaga Musa, Musa naye niyo amsigiila Yoshua, Yoshua atendaga viligane ne sigilizi, hasigazaga chochose mwe viya Zumbe amsigiilaga Musa haheina kuleka kint'hu.

16 Ivo Yoshua atahaga isi izo zose: Isi ye vigulu, Negebu yose, ne isi yose ya Gosheni, na isi ya makolongo, na Alaba na isi ya vigulu ya Izilaeli na mwa mawandamo yakwe, 17 awatahaga maseuta wose niyo awakoma kukongela kwo mnima Halaki hagihi na Seili kuita kubula Baali Gadi na mwe dikolongo dya Lebanoni na isi imwe diwandamo dye vigulu va Helimoni. 18 Yoshua atowanaga nk'hondo na maseuta awa wose kwa lupisi lutali. 19 Hakwandaga na mzi wowose wadamanyaga mwiivano wa utondowazi na Waizilaeli. Nu mzi wa Gibioni du wekalwagwa ni Wahivi nawo watendaga ivo. Mizi mituhu yose yatahagwa kwa kutowana nk'hondo. 20 Andaga ni Zumbe mwenye awatendaga wande wank'hani vileke wakatowane na Waizilaeli kwe nk'hondo, vileke wakomigwe pele haheina mbazi enga ivo Zumbe amsigiilaga Musa.

21 Mwo lupisi ludya,Yoshua agendaga kuwakoma Waanaki wose wekalaga kwe isi ye vigulu na Hebuloni na Anabu na kwe isi yose ye vigulu ya Yuda na kwe isi yose ye vigulu ya Izilaeli. Yoshua awakomaga pele woho na kuibananga mizi yawe. 22 Hakwandaga na yeyose mwa Waanaki asigalaga kunda mgima mwe isi ya Izilaeli. Wasigalaga wageke du uko Gaza, Gathi na Ashidodi. 23 Ivo Yoshua aitahaga isi yose viligane na ivo Zumbe amsigiilaga Musa. Yoshua niyo awenk'ha Waizilaeli inde isi yawe, wakepangile viligane na makabila yawe. Isi niyo yahumuzwagwa kulawa mwe nk'hondo.