1 Weze waihume isi idya Waizilaeli wose wakeduganyaga hadya Shilo niyo wazenga Hema Dikukile. 2 Mna kwandaga na makabila mfungate yandaga hayanati yahokele upasi wawe. 3 Yoshua niyo awagamba Wazilaeli, "Nomgoje kubula ini kugenda isi yenyu idya mwink'higwe ni Zumbe Mnungu ywa wakale wenyu? 4 Saguleni wagosi watatu kila kabila name niwatume waite wakapelembe isi na kuwandika ivo nounde upasi we isi wa kila kabila, akajika weze wanigambile. 5 Woho nawaipange isi iyo hant'hu mfungate. Yuda naasigale mwe isi ya Kwa mwenye mzi, dikabila dya Yusufu nadyo nawande mwe isi ya mkoma mahanya. 6 Mniwandikile utambalisi wose mwa aho hant'hu mfungate niyo mwanigaila, aho nenitowe kula ha Zumbe Mnungu ywetu. 7 Mna Walawi hawana ukipe mwenyu kwaviya undima wo ulavant'hambiko nuwo ukipe wawe, Gadi na Lubeni ne nusu ye dikabila dya Manase wahokela kale ukipe wawe kwe nt'hendelo ya ulailo wa zuwa wo mto Yolodani. Uko wenk'wagwa ni Musa mndima ywa Zumbe."

8 Ivo want'hu awo weze wakonge int'hambo yo kugenda kuipelemba isi iyo, Yoshua awasigiilaga akawagamba, "Iteni mkaipelembe na kuwandika utambalisi ukint'hile. Mkajika mnigaile icho muwandike name neni watoweleni kula aha Shilo ha Zumbe." 9 Want'hu awo waitaga niyo waizunguluka isi yose niyo wawandikaga zimbuli zakwe mwe kitabu na kuipanga imizi yakwe hant'hu mfungate. Akajika wamwigailaga Yoshua uko Shilo kwe nk'hambi. 10 Yoshua awatowelaga kula aho Shilo ha Zumbe, niyo awapangila Wizilaeli isi viligane na aho hant'hu mfungate.

11 Kula ya nk'hongo yandaga ni ya Benjamini viligane ne zink'holo zawe, isi yatowelwagwa kula yandaga hagatigati ha makabila ya Yuda na Yusufu. 12 Kwa mkoma mahanya mhaka wawe ukongela Yolodani, niyo wombokela kwe seleza ya mkoma mahanya ya Yeliko na usweelo wa zuwa we isi ye vigulu niyo wahinga usweelo wa zuwa kubula kwe nyika Beti Aveni. 13 Ukalawa aho, wombokelaga Kwa mwenye mzi ye seleza ya Luzi iyo Beseli na kuseela Ataloti Adali Kwa mwenye mzi ya kagulu ka Beti Halon ya hasi. 14 Mwe nt'hendelo ya ulailo wa zuwa kulawa mwe kagulu, kuhinga Beti Heloni mwe nt'hendelo ya Kwa mwenye mzi, mhaka nouhituka kuhinga mnk'handa ye isi ya Benjamini na kuhinga mwe mzi Kiliati Baali. 15 Kwe nt'hendelo ya Kwa mwenye mzi mhaka wakongelaga kwo lwega lwa Kiliati Yealimu niyo wahinga nt'hendelo ya usweelo wa zuwa. kwe zinc'hoko za Nefotoa 16 Mhaka nouseleza kwe diwandamo dyo lugulu Kwa mwenye mzi ye dikolongo dya mwana Hinomu mkoma mahanya ye dikolongo dya Walefaimu. Ugendeela kubula kwe dikolongo dya Hinomu, kuita Kwa mwenye mzi ye seleza yo mzi wa Wayebusi niyo waseela kubula Eni Logeli. 17 Naho niyo mhaka wahitukila mkoma mahanya kuita Eni Shemeshi, niyo wagendeela kuita Geliloti ikukaula kwe sila ya Adumimu na kuseleza kwe diwe dya Bohamu mwana Lubeni. 18 Kulawa aho mhaka wagendeelaga nt'hendelo ya mkoma mahanya yo lwega lwe dikolongo dya Alaba na kugendeela niyo waheela mwe dikolongo idyo. 19 Naho niyo waita kwe seleza ya mkoma mahanya ya kagulu ka Beti Hogala niyo yaheela mkoma mahanya kwe Bahali yo Munyu, aho wingiile mto wa Yolodani. Uno nuwo mhaka wakwe nt'hendelo ya Kusini. 20 Mto Yolodani nuwo wandaga mhaka kwe nt'hendelo ya ulailo wa zuwa. Ino niyo yandaga imihaka ye isi wenk'hwagwa nk'holo ze dikabila dya Benjamini kunda isi yawe.

21 Mizi ino niyo yandaga ye zink'holo za Benjamini ne nk'holo zawe. Yeliko na Beti Hogola na Emek Kesisi, 22 Beti Alaba na Semalaimu na Beseli, 23 Avimu na Pala na Ofula 24 Kefa Amoni na Ofini na Geba. Kwa hamwenga mizi wenk'higwe ni mlongo na miidi ne zikaya zakwe. 25 Naho kwandaga na mizi ya Gibioni na Lama na Beloti. 26 Mizipa na Kefila na Moza, 27 Lekem na Ilipeeli na Talala 28 Zela na Ha Elefu na Yebusi, niyo ikwitangwa Yelusalemu na Gibea na Yelimu. Uwazilo we mizi iyo wenk'higwe ni mlongo na mine hamwenga ne zikaya zakwe. Isi iyo niyo wenk'hangwa want'hu we dikabila dya Benjamini viligane ne zink'holo zawe inde ukipe wawe.