1 Ivo, Yoshua niyo awetanga want'hu we dikabila dya Lubeni na Gadi na nusu ye dikabila dya Manase, 2 akamgamba, "Nyuwe mtimila yadya yose Musa mndima wa Zumbe Mnungu ivo amlagize naho mnizumila malagizo niwasigiile. 3 Naho hamuwalekele ndugu zenyu lupisi lwose lutali kubula dyielo, mna mtimila kwa wengele sigilizi ya Zumbe Mnungu. 4 Haluse Zumbe Mnungu kawenk'ha ndugu zenyu utondowazi, enga viya alagane, ivo uyeni kwenyu mwe isi iyo mwink'higwe ni Musa mndima wa Zumbe Mnungu inde ugoli wenyu, mwe digundi dya mto Yolodani. 5 Mnde na wengele na kuzumila sigilizi na miko iyo Musa mndima wa Zumbe Mnungu amlagizeni. Kumuunga Zumbe Mnungu wenyu mtimile icho akuunga na kutoza sigilizi zakwe, mwikale hamwenga naye na kumdamanyila ndima kwa moyo wose." 6 Ivo, Yoshua niyo awavikila na kuwalekela wauye kwe zikaya zawe. 7 Naho kwe nusu ye dikabila dya Manase Musa awenk'haga isi ya Bashani, mna kwe nusu isigale ye dikabila idyo Yoshua awapangilaga enga ivo wapangilwe wandugu zawe Waizilaeli. Yoshua awalagaga wauye kwe zikaya zawe niyo awavikila akawagamba, 8 "Mwauya kaya mkanda na ugoli mwingi, ng'ombe zenyu na masawa na zahabu na shaba na chuma na suke nyingi. Pangilaneni na ndugu zenyu ivo mtahile kulawa kwa wank'hondo wenyu."

Musa awapangilagwa inusu ye dikabila dya Manase hant'hu hawe uko Bashani. Naho Yoshua awapangilaga inusu ya kaidi ye dikabila idyo uko usweelo wa zuwa wa mto Yolodani enga ivo yapangilaga makabila yadya amatuhu.

9 Ivo want'hu wa Lubeni na Gadi na nusu ye dikabila dya Manase niyo wapangana na makabila matuhu ya Izilaeli uko Shilo mwe isi ya Kanaani, na kuuya kwawe mwe isi ya Gileadi, isi yawe wenye wa kwiikaila kwa sigilizi ya Zumbe Mnungu enga ivo amlagize Musa.

10 Aho makabila ya Lubeni na Gadi ne nusu ye dikabila dya Manase weze wabule Gilioti, wakanda wakei nt'hendelo ya usweelo wa zuwa wa mto Yolodani wazengaga hant'hu ha kuvikila nt'hambiko hakulu hedi hagihi no mto uwo. 11 Wadya Waizilaeli watuhu wagambilwagwa ivi, "Tegelezeni! Want'hu wa makabila ya Lubeni na Gadi na nusu ye dikabila dya Manase wazenge hant'hu hakulu hedi ha kulavila nt'hambiko uko Gilioti uko kwe nt'hendelo ya usweelo wa zuwa wa mto Yolodani mwe isi ya Kanaani uku wakakaula isi yawe." 12 Waizilaeli weze weve ivo, waduganaga uko Shilo wakatowane nk'hondo na ayo makabila ya ulailo wa Zuwa.

13 Niyo want'hu wa Izilaeli wamsigiila Fenehasi mwana mlavant'hambiko Eliyazali uko Gileadi kwa makabila ya Lubeni na Gadi ne nusu ye dikabila dya Manase. 14 Fenehasi niyo aita na wakulu mlongo naho kila yumwenga akanda niye mkulu ywe dikabila dyakwe. 15 Woho niyo waita kwa makabila ya Lubeni na Gadi na nusu ye dikabila dya Manase uko Gileadi wakawagamba, 16 "Nii mkaswesa kunda wahuilwa kwa Zumbe Mnungu ywa Izilaeli? Kwa kukezengela wenye kilingo cha kutambikila? Nyuwe msaguka kwa Zumbe! 17 Togoleni wavu kidamanye uko Peoli haukint'hile? Hamkuona kugamba hakinati kukekukiza naho makunt'ho yakwe yakei kuwasunk'hasunk'ha want'hu wa Zumbe Mnungu? 18 Nii elo mumleka kumtimila Zumbe Mnungu? Mnamleka Zumbe Mnungu dielo, luvi naawaihiye want'hu wose wa Izilaeli. 19 Ivo uneva isi yenyu haikuzumilwa kwa want'hu, soni uku kwe isi ya Zumbe uko dili Dihema dyakwe na kuguha hant'hu mwe isi hamwenga na suwe. Msekusaguka kwa Zumbe hegu kukitenda suwe kisaguke kwa kukezengela kilingo cho kutambikila kituhu kujink'ha hadya ha Zumbe Mnungu ywetu. 20 Togoleni Akani mwana Zela eze abalange na kuswesa uhuilwa mwe vint'hu vilemezwe, Maya hayawakump'hukile want'hu wose wa Izilael? Naho Akani habanikaga yehe ekedu kwa wavu wakwe."

21 Aho want'hu wa makabila ya Lubeni na Gadi ne nusu ye dikabila dya Manase wawahitulaga vilongozi wa makabila ya Izilaeli. 22 "Mnungu mta udahi niye Mnungu, yehe niye amanyize nii kidamanya ivo. Naho Waizilaeli nawo wamanye ivo.Uneva uku ni kusaguka asekukileka kukiyokola ivi dielo. 23 Uneva kimleka Zumbe Mnungu na kuzenga hant'hu hetu ha kuvikila milungu yetu vileke kilave malavo ya kokwa, ya unga na ya utondowazi, ivo Zumbe Mnungu naalihize masa. 24 Mna hiyo ivo ili. Nekizenga kwa kogoha kugamba mwa mazuwa yakwiza wana wenyu nawawagambile wana wetu, ‘Nyuwe mwikalana vivihi na Zumbe Mnungu, Mnungu ywa Izilaeli? 25 Hamkuona kugamba Zumbe Mnungu kaika mto Yolodani kunda mhaka mwa nyuwe na suwe? Nyuwe dikabila dya Lubeni na kabila dya Gadi hamna fungu dyodyose kwa Zumbe Mnungu.’ Ivo wana wenyu nawakadaha kulongole kutenda wana wetu waleke kumvika Zumbe Mnungu. 26 Ivo nivo vilekile kizenga hant'hu aha ha kulavila nt'hambiko naho hiyo kwaajili ya kulavila malavo hegu nt'hambiko, 27 ivo nekikaunga hant'hu aha ha kulavila nt'hambiko hande ha uwona mwa suwe na nyuwe na vyeleko venyu vikwiza kugamba suwe kina uwagilwa wa kumdamanyila ndima Zumbe Mnungu kwa malavo yetu na ya kokwa na nt'hambiko zetu, na kwa malavo yetu ya utondowazi mwe Dihema Dikukile, vileke wana wenyu wanase kuwagamba wana wetu kugamba hawana fungu dyodyose kwa Zumbe Mnungu. 28 Naho nekifanyanya kugamba uneva mbuli enga ino neilongwe umwetu hegu mwa welekwa wetu mwa mazuwa yakwiza, nekigambe, ‘Kauleni mliganyizo wa hant'hu ha kumvika Zumbe Mnungu iyo wakale wetu wazengile, hiyo kwajili ya kulavila malavo hegu nt'hambiko mna ni enga uwona mwa nyuwe na suwe.’ 29 Suwe nekinda hakikuunga kumleka Zumbe Mnungu na kuleka kuzenga hant'hu hakulavila malavo ya unga hegu nt'hambiko. Hakikuunga kulavila malavo hant'hu hatuhu vituhu vakwe ni hant'hu hakumvikila Mnungu ywetu iyo ikulongole mwo ukulu wakwe."

30 Mlavant'hambiko Fenehasi, vilongozi wa want'hu wose na wakulu wa Izilaeli weli hamwenga naye wevile mbuli izo za makabila ya Lubeni na dya Gadi ne nusu dikabila dya Manase, niyo waona ni vedi. 31 Na yehe Fenehasi mwana ywa mlavant'hambiko Eliyazali, nakayagambila makabila ya Lubeni ne dikabila dya Gadi na nusu ye dikabila dya Manase, "Diyelo kimanya kugamba Zumbe Mnungu ehamwenga na suwe kwaviya hamumdamanyile Zumbe Mnungu uwihi. Haluse muwayokola Waizilaeli wase kusengelwa ni Zumbe Mnungu."

32 Ivo, Fenehasi mwana ywa mlavant'hambiko Eliyazali hamwenga na vilongozi weyawe niyo wawalaga want'hu wa makabila ya Lubeni na kabila dya Gadi na kuhalawa mwe isi ya Gileadi, na kuuya mwe isi ya Kaanani kwa Waizilaeli na kuwagambila zimbuli izo. 33 Ulosi uwo niyo wawelela Waizilaeli, na kumtogola Zumbe Mnungu na kuleka mizungu yawe ya nk'hondo na mzungu wawe wa kubananga pele isi yandile ya makabila ya Lubeni na Gadi.

34 Want'hu wa makabila ya Lubeni na Gadi niyo wahenk'ha zina aho hant'hu ho kulavila nt'hambiko niho, "Kugamba ni Uwona wetu suwe wose hameso ha Zumbe Mnungu."