1 Maseuta wose wandile ng'ambu yo mto Yolodani mwe isi ya vigulu na mwe makolongo na hant'hu hose ye mp'wani ya bahali ya Meditelania kuita Lebanoni na Wahiti na Waamoli na Wakanaani na Wapelizi na Wahivi na Wayebusii, 2 wakeduganya hamwenga vileke watowane nk'hondo na Yoshua akanda na Waizilaeli.

3 Mna wadya wakaya wa Gibeoni weze wapate ulosi ivo Yoshua aitendile mizi ya Yeliko na Ai, 4 wazungulaga mzungu wa kuwadant'ha Waizilaeli. Wagendaga kuketenda enga wegala ulosi, wakwezaga magunia yasakale na mabete yasakale yageiligwe vilaka mwe zimp'hunda zawe. 5 Wavalaga vilatu visakale na kusumwa na suke zisakale. Mikate yawe ye zink'hande neinyala naho neihota bwibwi. 6 Ivo waitaga kwa Yoshua mwe nk'hambi ya Giligali niyo wamgamba yehe na Waizilaeli, "Suwe kilawa mwe isi ya hale ivo chawalombelezani mdamanye lagano na suwe."

7 Mna Waizilaeli niyo wawahitula awo Wahivi, "Chadaha vivihi kudamanya lagano na nyuwe? Mafa nyuwe mwekala hagihi na suwe." 8 Niyo wamgamba Yoshua, "Suwe kiwandima wako." Yoshua niyo awauza, "Ni nyuwe wahii naho mwalawahi?" 9 Niyo wamhitula, "Suwe wandima wako, kilawa isi ya hale naho kiza kwaviya kiva nt'hogola ye dizina dya Zumbe Mnungu, Mnungu ywenyu, kiva zimbuli za kumanyika kwakwe na yose ayadamanye mwe isi ya Misili. 10 Kiva yose awatendile maseuta waidi wa Waamoli wendile ng'ambo yo mto Yolodani, seuta ywa Sihoni wa Heshiboni na seuta Ogu wa Bashani akwikala uko Ashitaloti. 11 Ivo wadala wetu na want'hu wose wa isi yetu, niyo wakigamba kiguhe mp'hamba kwaajili ya utafi, kize kibwilane na nyuwe na kuwagamba suwe ni wandima wenyu, ivo damanyeni lagano na suwe. 12 Mikate yetu ino neinda imoto umwo chaifunganye kudya kaya mwe dizuwa chakonga utafi umwo kikeza kwenyu. Mna kauleni ivi haluse inyala naho ingila bwibwi. 13 Vibete ivi chavimemezaga divai vikanda vihya mna ivi haluse vitatuka tatuka. Hata suke ne vilatu vetu visakala kwaviya utafi noutendesa uhale." 14 Ivo wakulu awo waguhaga nk'hande zawe, haheina kuuza kwa Zumbe Mnungu. 15 Yoshua adamanyaga nawo lagano dya utondowazi, aikaga Ndagano kugamba naawagambe wekale. Vilongozi wa Waizilaeli niyo waika kilapi kwaajili ye Ndagano. 16 Zuwa dya katatu aho weze waike Ndagano nawo, Waizilaeli wevaga kugamba want'hu awo wandaga hagihi naho wekalaga kwa hamwenga. 17 Ivo, Waizilaeli wakongaga utafi, aho weze wabule mwe dizuwa dya katatu mwe mizi yawe. Mizi iyo yandaga ni Gibeoni na Kefila na Beeloti na Kiliati-yealimu. 18 Mna waizilaeli hawawakomile, kwaviya vilongozi wa Waizilaeli wandaga wakelisa kwa zina dya Zumbe Mnungu, Mnungu wa Izilaeli. Ivo elo Waizilaeli wose niyo wawakalaliza vilongozi wawe. 19 Mna vilongozi wa Waizilaeli wawagambaga want'hu wawe, "Kwaviya chakelisaga kwa zina dya Zumbe Mnungu, Mnungu ywa Izilaeli, haluse hakikudaha kuwatendelani vihile. 20 Nekiwatendele ivi, Nekiwaleke wekale sema Mnungu anakifiile maya kwa kuusa kilapi icho chawaikilaga. 21 Wagendeelaga kugamba, walekeni wekale mna nawande wakela nk'huni na kuteka mazi kwajili yo mdugano wa Izilaeli enga ivo wakulu wawagambile." 22 Yoshua awetangaga Wagibeoni na kuwauza, "Nii mkidant'iliza kugamba mlawa isi ya hale kumbe mwekala hamwenga na suwe? 23 Haluse nyuwe mligitwa nanywe nomnde watumwa mazuwa yose kwa kukela nk'huni na kuteka amazi kwaajili ya Nyumba ank'hulu ya Mnungu ywangu."

24 Wamhitulaga Yoshua, "Kigambilwa kwa kindedi kugamba Zumbe Mnungu ywenyu amsigiilaga mndima ywakwe Musa awakome want'hu wose wa mwe isi ino nakuwenk'ha nyuwe isi ino inde yenyu. Kwa ivo chagohaga kwajili yo ugima wetu iyo niyo ikitendile kikadamanya mbuli ino. 25 Haluse suwe kimwo udahi wako, ukidamanyile enga ivo ukuona ni vedi kwako." 26 Ivo, Yoshua awayokola mwo udahi wa Waizilaeli vileke wasekuwakoma. 27 Mna kukongela dizuwa idyo, Yoshua awatendaga Wagibioni wande wakela nk'huni na wateka mazi kwaajili yo mdugano wa Waizilaeli wose na kwaajili ya hant'hu ha kumlavila nt'hambiko Zumbe Mnungu, aho mwenye asagule, nivo wakutenda hata ivi dielo.