1 Want'hu wose weze womboke mto Yolodani Zumbe Mnungu niyo amgamba Yoshua, 2 "Sagula want'hu mlongo na waidi kulawa mwa awo Waizilaeli, mnt'hu yumwenga kulawa mwe kila kabila, 3 uwalagize kugamba, waguhe maiwe mlongo na mbili kulawa aha mgatigati ya Yolodani, hadya hant'hu walava nt'hambiko wakimaalaga, uwagambe waguhe maiwe ayo na kuyaika hadya wakuunga wagone kilo cha dielo."

4 Ivo Yoshua niyo awetanga want'hu awo mlongo na waidi awo awasagule mwa Izilaeli, mnt'hu yumwenga kulawa mwe kila kabila, 5 niyo awagamba, "Dilongoeleni Disanduku dye Ndagano dya Zumbe Mnungu, Mnungu ywenyu mwiite hagatigati yo mto Yolodani mkabula aho, kila yumwenga aguhe iwe dimwenga mwe diyega dyakwe, iwe dimwenga kwajili ya kabila dimwenga dya Izilaeli. 6 Mbuli iyo neinde kilagiso kwenyu na wana wenyu aho wakeza kuwauzani mwa mazuwa yakwiza kugamba maiwe aya yalagisai? 7 Nyuwe nomuwagambile ivo mazi yo mto Yolodani yalekaga kuseela umwo Disanduku dye Ndagano dya Zumbe Mnungu aho dyandaga dikomboka mto Yolodani. Ivo maiwe ayo nayande lukumbusa lwa ulo na ulo kwa want'hu wa Izilaeli kwa ayo yalaile aha."

8 Wadya wagosi wa Izilaeli wadamanyaga enga viya walagizwe ni Yoshua, waguhaga maiwe mlongo na maidi kulawa hagati yo mto Yolodani, iwe dimwenga kwaajili ya kila dikabila dya Izilaeli enga Zumbe Mnungu ivo amlagizaga Yoshua, niyo waita nayo kubula hant'hu hadya wagonile niyo wayaika aho. 9 Yoshua apangaga maiwe mlongo na maidi hagati yo mto Yolodani, hant'hu hadya wakimale walavant'hambiko wenule Disanduku dya Ndagano. Maiwe ayo yeyuko kubula ivi haluse.

10 Wadya walavant'hambiko wenulaga Disanduku dye Ndagano wakimaalaga hagati yo mto Yolodani kubula want'hu aho weze wabinde kudamanya kila kint'hu kiya Yoshua asigiilwe ni Zumbe Mnungu. Yoshua adamanyaga yose enga ivo Musa amgambile. Want'hu niyo wasunguza kwomboka mto. 11 Naho want'hu wose weze wabinde kwomboka, wadya walavant'hambiko wawalongoelaga want'hu ne Disanduku dye Ndagno dya Zumbe Mnungu. 12 Wagosi we dikabila dya Lubeni na Gadi na nusu ye dikabila dya Manase wakanda na vitowanilo vawe wawalongoelaga want'hu wa Izilaeli, enga viya walagizwe ni Musa. 13 Want'hu wandaga elufu milongo mine wakanda wakeika lumwe kwa nk'hondo wombokaga hameso ha Zumbe Mnungu wakaita kwe dikolongo dya mzi wa Yeliko. 14 Mwe dizuwa idyo Zumbe Mnungu amtendaga Yoshua atunywe ni Waizilaeli wose nawo niyo wamwogoha Yoshua enga ivo wamtunye Musa mwo wikazi wakwe.

15 Zumbe Mnungu niyo agamba Yoshua, 16 "Wagambe walava nt'hambiko wekwinula Disanduku dye Ndagano, wafose mwo mto Yolodani." 17 Ivo, Yoshua niyo awagamba wadya walavant'hambiko, "Foseni mwo mto Yolodani." 18 Awo walavant'hambiko wenulaga Disanduku dye Ndagano dya Zumbe Mnungu, aho weze wafose hagati yo mto Yolodani na kujata zink'halama zo mto Yolodani mazi yakongaga kuseela niyo yamema enga nk'hongo. 19 Want'hu wombokaga mto Yolodani mwe dizuwa dya mlongo dya mwezi wa nk'hongo, waikaga nk'hambi kwo mzi wa Giligali mwe nt'hendelo yo ulailo wa zuwa wa Yeliko. 20 Yoshua ayakimalisaga yadya maiwe mlongo na maidi uko Giligali yadya wayaguhile kulawa mwo mto Yolodani. 21 Yoshua niyo awagamba Waizilaeli, "Uneva wana wenyu wanawauzani mazuwa yakwiza, ‘Maiwe aya yalagisai?’ 22 Nomuwagambe ivi, ‘Want'hu wa Izilaeli wombokaga mto wa Yolodani hant'hu hanyaile.’ 23 Nomuwagambile kugamba Zumbe Mnungu ywenyu, anyazaga mazi yo mto Yolodani kwaajili yenyu kubula aho mwombokaga enga viya ainyazile bahali ya Shamu kwa ajili yetu kubula aho chombokaga. 24 Vileke want'hu wose wa mwe isi wamanye kugamba Zumbe Mnungu una udahi, vileke nanywe mumtunye Zumbe Mnungu ywenyu ulo na ulo."