1 Yoshua adalahalisaga, miaka yakwe igendesa. Zumbe niyo amgamba, "Kudalahalisa naho miaka yako igendesa, mna ziyuko isi zibildile ingi heziinati kutahigwa. 2 Isi heziinati zitahigwe ni izi, isi yose ya Wafilisti hamwenga na idya yose ya Wageshuli, 3 kukongela kwo mto wa Shiholi kubula ulailo wa zuwa wa Misili kubula kwe isi ya Ekiloni kwe nt'hendelo ya Kasikazini, na kose kudya wakwikala Wakanaani, isi ya wakulu washano wa Wafilisiti uko Gaza, Ashidodi, Ashikeloni, Gathi, Ekloni na kwa Waavi kwe nt'hendelo ya Kusini. 4 Iviaivia zandaga ni isi yose ya Wakanaani kulawa Ala yandaga ya Wasidoni kubula Afeka uko kwo mhaka wa Waamoli, 5 na isi ya Wagebali na ulailo wa zuwa Lebanoni yose kuhinga ulailo wa zuwa wa Baali Gadi, na kulawa kwe diwandamo dyo mnima Helimoni kuita Lebo Hamati, 6 na want'hu wose wakwikala mwe isi ye vigulu kulawa Lebanoni kuita Misilefosi Maimu wekazi wakwe wandaga Wasidoni. Miye mwenye neni wakulumbuze wahalawe mwe isi ha meso ya Waizilaeli nawe nouwenk'he Waizilaeli isi iyo inde yawe enga ivo hugambile udamanye. 7 Ivo elo, ipange isi ino kunda ukipe kwa makabila kenda yasigale, ne nusu ya want'hu we dikabila dya Manase."

8 Inusu int'huhu ya makabila ya Manase hamwenga na Lubeni na Gadi awo wahokelaga kale isi yawe umwo Musa mndima ywa Zumbe awenk'haga kwe nt'hendelo ya kaidi ulailo wa zuwa wo mto Yolodani, 9 yandaga ni kukongela Aloeli kudya kwo lwega lwe dikolongo dya Alinoni, na kulawa hagati ye dikolongo, hamwenga ne nt'hindiga za Medeba kubula Diboni, 10 ne mizi yose ya seuta Sihoni ywa Waamoli uyo alongozaga Heshiboni kubula kwe mihaka ya Waamoni. 11 Yandaga ni hamwenga na Gileadi na isi ya Wageshuli hamwenga na Wamaaka no mnima wose wa Helimoni Bashani yose kubula Seleka, 12 no useuta wose wa Ogu uko Bashani, uyo ekailaga uko Ashitaloti na Edulei. Yehe andaga ni yumwenga mwa Walefai wasigalaga. Musa awahumaga wose awo na kuitaha isi yawe. 13 Hata ivo Waizilaeli hawawagulusaga Wageshuli na Wamaaka mwe isi, mna wekala mwa Waizilaeli hata ivi idielo.

14 Mna Musa hawapangile hant'hu hohose want'hu we dikabila dya Walawi kwaviya malavo yo kokwa pele hant'hu ha kulavila malavo akulavilwa Zumbe Mnungu ywa Izilaeli nayo ukipe wawe enga ivo Zumbe amgambilaga Musa.

15 Musa awapangilaga is want'hu we diakabila dya Lubeni viligane ne zink'holo zawe. 16 Isi yawe yakongelaga Aloeli iyo yandaga mwo lwega lwe dikolongo dya Alinoni no mzi wandaga mgatigati ye dikolongo ne isi ye nt'hindiga yandaga hagihi na Medeba. 17 Ino ni hamwenga ne mizi yose mwe nt'hindiga na Diboni na Bamoti baal na Beti Baali Meoni, 18 na Yahasa, Kedomosi na Mefaati, 19 hamwenga na Kiliatimu, Sibuma, na Zeleti Shahali mwa kagulu kwe dikolongo idyo, 20 Beti Peoli ne ziseleza za Pisiga hamwenga na Beti Yeshimoti, 21 nuko kugamba imizi yose mwe isi ye nt'hindiga no useuta wose wa seuta Sihoni ywa Waamoli uyo ekailaga Heshiboni, Musa amhumaga uyo Sihoni na awo wakulu wa Midiani. Wakulu awo wandaga ni Evi, Lekemu, Suli, Huli na Leba. Awo wose wekailaga isi iyo kwa zina dya seuta Sihoni. 22 Iviaivia Waizilaeli wamkomaga kwe nk'hondo Balaam mwana Beoli, yudya mgangana mwa awo watuhu wakomigwe. 23 Mhaka wa welekwa wa Lubeni wandaga nu mto Yolodani. Imizi iyo ne mihaka yakwe yandaga ye dikabila dya Lubeni viligane ne zink'holo zawe.

24 Iviaivia Musa awapangilaga isi dikabila dya Gadi na welekwa wakwe viligane ne zink'holo zawe.

25 Isi yawe yandaga ni kukongela Yazeli ne mizi ya Gileadi ne nusu ye isi ya Waamoni kuita Aloeli hagihi no mzi wa Laba, 26 na kukongela Heshiboni kuita Lamati mizipa na Betonimu na kulawa Mahanaimu kuita kwe isi ya Debili, 27 na kwe dikolongo dya Beti Halamu na Betinimila na Sukoti na Safoni, iyo isigale yo useuta wa Heshiboni. Mhaka wawe kwo usweelo wa zuwa wandaga nu mto Yolodani, nougendeela kubula kwe diziwa dya Galilaya. 28 Ino niyo imizi ne zikaya wenk'higwe welekwa wa Gadi kunda zawe viligane ne zink'holo zawe.

29 Naho Musa awapangilaga nusu ya welekwa we dikabila dya Manase, viligane ne nk'holo zawe. 30 Isi yawe yandaga ni kulawa Mahanaimu na Bashani yose no useuta wose wa Ogu seuta ywa Bashani ne mizi yose ya Yeili iyo iyuko Bashani, mizi milongo mtandatu. 31 Ino ni hamwenga ne nusu ya Gileadi, Ashitaloti, Adulei, iyo mizi ya Ogu seuta ywa Bashani. Iyo yose wapangilwagwa inusu ye zimp'huga za Makili mwana Manase viligane ne zink'holo zawe.

32 Ivi nivo Musa aipanga isi kwe nt'hendelo ya ulailo wa zuwa wa Yeliko na Yolodani umwo andaga kwe zint'hidiga za Moabu. 33 Mna Musa hawapangilaga Walawi hant'hu hohose kunda hawe, hant'hu hawe ni Zumbe Mnungu ywa Izilaeli.