1 Maseuta wose wa Waamoli wekalaga nt'hendelo ya kaidi ya usweelo wa zuwa wa Yolodani na maseuta wose wa Wakaanani wandaga wakekala hagihi ye bahali ya Meditelania, weze weve kugamba Zumbe Mnungu kayanyaza mazi ya mto Yolodani kwaajili ya Waizilaeli kubula aho wombokaga, wogohaga niyo wafa chevu kwa kogoha Waizilaeli.

2 Mwo lupisi ulo Zumbe Mnungu amgambaga Yoshua, "Damanya ngola ya iwe ditogile vileke uwavinile Waizilaeli." 3 Ivo elo, Yoshua adamanyaga ngola ya iwe ditogile na kuwavinila wana wa Izilaeli uko Gibea-Haalaloti. Nuko kugamba lugulu lwo kuvinilwa wagosi. 4 Waizilaeli wavinilwagwa kwaviya, wagosi wose walawile Misili awo wakudaha kuita kwe nk'hondo, wabanikaga mwo utafi kwe dijangwa aho weze walawe mwe isi ya Misili. 5 Wose awo walawaga Misili wavinilagwa, mna wadya wose welekwe mwo utafi uko kwe dijangwa aho weze walawe Misili wandaga wakei kuvinilwa. 6 Waizilaeli wandaga na utafi kwa lupisi lwa miyaka milongo mine kwe dijangwa, ivo wagosi wose awo wadahaga kuita kwe nk'hondo umwo wakalawa Misili wabanikaga kwaviya hawamtegeleze Zumbe Mnungu. Kwaviya Zumbe Mnungu akelisaga kugamba hawadahe kwingila mwe isi idya akelisaga kugamba naawenk'he watati zawe, isi yedi ina ulozo. 7 Wana wa want'hu awa wandaga hawavinilwe, awa nawo Yoshua awavinilaga kwaviya hawavinilwagwa umwo wandaga mwo utafi.

8 Wogosi wose aho weze wajike kuvinilwa wekalaga he nk'hambi kubula aho weze wahone. 9 Zumbe Mnungu niyo amgamba Yoshua, "Dyelo ino hiwausilani soni idya ya Misili." Ivo hant'hu aho niyo hetangwa Giligali hata ivi dielo.

10 Waizilaeli umwo weze watowe nk'hambi uko Giligali wadamanyaga zuwa dya kinyemi dya Pasaka kisingi mwe dizuwa dya mlongo na kane dyo mwezi kwe nt'hindiga za Yeliko. 11 Luvi yakwe ize isile Pasaka, wadyaga mikate heigeligwe ugwadu na mkazingo viligane no ulozo wa mwe isi idya. 12 Ivo Zuwa ditimile kukongela zuwa wadile nk'hande ye isi iyo, Waizilaeli hawapataga mana naho. kukongela umwaka uwo Waizilaeli wadyaga ulozo we isi ya Kanaani.

13 Zuwa dimwenga Yoshua eze ande hagihi na mzi wa Yeliko, aaho aonaga mnt'hu yumwenga akimale hameso hakwe na bamba mwo mkono wakwe. Yoshua ambasaga no kumuuza, "Weye umiyetu hegu mnk'hondo ywetu?" 14 Niyo amhitula, "Bule, hiyo ywenyu hegu mnk'hondo wenyu mna miye ni mkulu ywa watowani wa Zumbe Mnungu, hiza ivi haluse." Yoshua niyo afunama kubula hasi niyo amuuza, "Zumbe ywangu mndima ywako waunga nidamanyei?" 15 Uyo mkulu ywe watowani wa Zumbe Mnungu amgambaga, "Hambula vilatu vako kwaviya hant'hu aho ukimale hakuka." Yoshua niyo adamanya ivo.