1 Kwize kuche Yoshua hamwenga na want'hu wose wa Izilaeli wakongaga utafi kulawa Shitimu. Weze wabule kwo mto Yolidani, watoaga nk'hambi kwa lupisi wakanda wakei kudendeluka. 2 Mazuwa matatu yeze yomboke, vilongozi wagendaga mwe nk'hambi yose, 3 niyo wawagamba want'hu, "Aho mkeza kudiona Disanduku dye Ndagano dya Zumbe Mnungu ywenyu, dinulwa ni walava nt'hambiko Walawi, nomhalawe aho mwili niyo mwaditimila kunyuma. 4 Ivo nomuimanye sila yo kombokela, kwaviya sila ino hamnati muyombokele hata zuwa dimwenga. Mna msekudisogeela hagihi Disanduku dye Ndagano, mnde hale nadyo kwa uhale wa nk'hacho alufu imwenga."

5 Yoshua niyo awagamba want'hu, "Kekukizeni kwaviya luvi Zumbe Mnungu naadamanye mbuli zo kweheela mwenyu." 6 Naho awagambaga walavant'hambiko waguhe Disanduku dye Ndagano wawalongoele awant'hu. Woho nawo wadiguhaga na kuwalongoela awant'hu. 7 Zumbe Mnungu niyo amgamba Yoshua, "Dyelo nenikonge kukwinula hameso ya want'hu wose wa Izilaeli wamanye kugamba, enga viya nandile hamwenga na Musa, nivo neninde hamwenga na weye. 8 Wagambe awo walavant'hambiko wakwinula Disanduku dye Ndagano umwo wakabula hagihi no mto Yolodani wakimale mwe nk'halama zo mto, wagambe wakakimale mwo mto."

9 Ivo Yoshua niyo awagamba Waizilaeli, "Sogeleni hagihi vileke niwagambile zimbuli za Zumbe Mnungu ywenyu." 10 Yoshua agendeelanga kulonga akagamba, "Haluse nommanye kugamba Mnungu mta ugima emgati mwenyu naho naawakulumbuze pele iivi mkasinya awo, Wakanaani na Wahiti na Wahivi na Wapelizi na Wagiligashi na Waamoli na Wayebusi. 11 Kauleni Disanduku dye Ndagano dya Zumbe Mnungu we si yose dyomboka mto Yolodani iivi mkasinya. 12 Haluse elo, saguleni wagosi mlongo na waidi kulawa mwe makabila ya Izilaeli kila kabila mnt'hu yumwenga. 13 Neinde, umo zinyayo za walava nt'hambiko wakwinula Disanduku dye Ndagano dya Zumbe Mnungu, Zumbe we isi yose, zikeza kujata mazi yo mto Yolodani, mazi yo mto uwo nayaleke kuseela, naho yadya yakuseela kulawa mwe nt'hendelo iyo nayakeduganye hamwenga enga sugulu."

14 Ivo umwo, want'hu wahalawaga mwe zink'hambi zawe vileke wadendeluke mto Yolodani, walava nt'hambiko wenulaga Disanduku dye Ndagano wakanda wawalongoela want'hu, 15 naho awo wadinule Disanduku dye Ndagano weze wabule Yolodani, zinyayo zawe zize zijate mazi ye zink'halama zo mto Yolodani, kwaviya mto Yolodani wamemaga na kumwaguka hata mwo msimo wo uvuni, 16 mazi yandaga yakaseela kulawa nt'hendelo ya kukenya yakimaalaga kunda enga sugulu kubula mwe kaya ikwitangwa Adamu hagihi no mzi wa Saletani. Mazi yandile yakaseela kuita Bahali yo Munyu, yanyalaga. Want'hu nawo wadahaga kwomboka kuita haigihi na Yeliko. 17 Umwo Waizilaeli wandaga wakomboka, walava nt'hambiko wandaga wakenula Disanduku dye Ndagano wakimaalaga hant'hu hanyaile hagatigati ha Yolodani kubula aho want'hu wose wa Izilaeli weze womboke.