1 Isi wapangilwe welekwa wa Yusufu kwa kutoelwa kula wakongelaga kwo mto Yolodani, ulailo wa zuwa we zinc'hoko za Yeliko, kwombokela kwe dijangwa kubula hant'hu he milima kubula Beteli 2 Mhaka uno kulawa Beteli wahingaga Luzu niyo wombokela Ataloti uko wandaga wakekala Waaki. 3 Mhaka uwo useleza nt'hendelo ya usweelo wa zuwa wa Wayafuleti kubula Beti Holoni ya mondowaisi kubula Gezeli niyo yaheela kwe bahali ya Meditelania. 4 Welekwa wa Yusufu ne dikabila dya Manase na Ifulaimu wenk'wagwa isi iyo inde yawe.

5 Isi wapangilwagwa Waifulaimu ni ino. Imihaka yawe yandaga ni kulawa Ataloti Adali kubula Beti Holoni ya kukenya, 6 mhaka uwo wagendeelaga kubula kwe bahali ya Meditelania. Na kulawa Mikimetati kwe nt'hendelo ya mkoma mahanya wazungulukaga kuhinga Taanati Shilo, uko wombokaga kwe nt'hendelo ya ulailo wa zuwa kubula Yanoa. 7 Kulawa Yonoa wagendeelaga kubula Atoloti na Naala kubula Yeliko uko nouheela kwo mto wa Yolodani. 8 Kulawa Tapua mhaka wagendeelaga usweelo wa zuwa kubula kwa kazuto ka mazi ka Kana niyo waheela kwe bahali ya Meditelania. Ino niyo isi wenk'hwagwa Waifulaimu viligane ne zi nk'holo zawe, 9 ne mizi wongezelwagwa kulawa kwe dikabila dya Manase' 10 Ifulaimu hawawagulusaga Wakanaani wakwikala aho Gezeli, Wakanaani awo wagendeelaga kwikala kwa Waifulamu hata ivi dielo wakadamanya ndima za kutigizwa.