1 Akajika maya yakwe yeze yasile, seuta Ahasuelo amkumbukilaga vashiti, akanda afanyanya ivo alemele na ivo alavile sigilizi yakwe mwa yehe. 2 Ivo, wandima wakwe wandile wamdamanyila ndima, wamgambaga "Hake goja uzunguilwe wali na mazanga wahombweele, nii usekuzunguilwa yumwenga? 3 Wadaha kusagula wakulu kila isi yo useuta wako, na kuwalagiza wawegale wandele watana wose mwe gane dya wavele aha Susa, mzi mkulu. Akajika wawaike mwo useuta wa Hegai uyo mgosi afunt'higwe mkaulizi ywa wandele wako na aaho wenk'higwe mavuta na mahambo matuhu vileke wakehambe, 4 yudya naamwelele vitendese seuta atendigwe malikia hant'hu ha Vashiti."

Seuta niyo aonaga kugamba mbuli iyo ni yedi naye niyo atenda iivo.

5 Mwo mzi wa Susa kwandaga na mnt'hu yumwenga Myahudi, zina dyakwe Modekai mwana Yaili na mwana Shemei, mwana Kishi ywe dikabila dya Benjamini. 6 Modekai andaga mwa wadya want'hu watahagwa mwo lupisi lwa seuta Yekonia wa Yuda umwo atahagwa na seuta Nebukaduleza ywa Babeli, 7 Modekai andaga na soviye akwitangwa Esita uyo zina dyakwe kwa Kiibulania etangwagwa Hadasa. Esita andaga mndele mdodo ahombweele. Welesi wakwe weze wabanike, Modekai amguhaga Esita niyo amlela enga mwanawe.

8 Sigilizi ya seuta ize ibwelekezwe mwe kiyeti, wandele wengi wegalagwa Susa mzi mkulu no kuikwa mwo wamizi wa Hegai. Esita naye egalagwa mwe nyumba ya kiseuta na kuikwa mwo wamizi wa Hegai ywa yudya mwamizi ywa wandima wa kike. 9 Esita amwelelaga Hegai. Aaho amwink'haga Esita mavuta na nk'hande yedi, naho amsamizaga hant'hu hedi he nyumba iyo ya wavele, naho amsaguilaga wandima wa kike mfungate kulawa mwe nyumba ya kiseuta wamdamanyile ndima.

10 Esita andaga akei kukelavanya kwe mp'huga yakwe ne dikabila dyakwe, kwaviya Modekai amlemezaga asekutenda ivo. 11 Kila zuwa Modekai azungulukaga ho lwazo lwe nyumba iyo ya wavele vileke amanye ivo Esita akugendeela ne zimbuli zikuunga zimlaile.

12 Umwo lupisi ulo lwa uyo mndele lwo kuita kwa seuta Ahasuelo lwandaga halunati lubule, waungwagwa wabuze miezi mlongo na miidi yo kukehamba enga ivo yaikwagwa. Kwa miezi mtandatu nawaungwa wakehake mvuta ya manemane, miezi mtandatu mituhu nawaungwa wakehake mavuta yana mhem'phe. 13 Mwo lupisi lwa kuita kwa seuta, kila mwali na mazanga enk'hagwa chochose icho waungaga kwa kukehamp'ha kulawa mwe nyumba ya wavele na kuita nacho kwe nyumba ye kiseuta. 14 Kisingi nulo lupisi lwa kuita, naho mtondo wakwe mwali egalagwa mwe nyumba int'huhu ya wavele, akanda akauliswa ni Shaashigazi, uyo mgosi afunt'hitgwe uyo andaga mkaulizi ywa wawele wa seuta. Mwali uyo hakaungwa kuuya kwa seuta mpaka seuta elelwe naye na kusigiila kugamba egalwe kwakwe.

15 Lupisi lwa Esita lwa kuita kwa seuta nolubula, uyo mwana kike ywa Abihaili soviye dya Modekai naho alelwagwa ni Modekai, halombezaga kint'hu kituhu mwa viya apangilwe na Hegai, mgosi afunt'higwe mkulu ywe nyumba ya wavele wa seuta. Kila mnt'hu amuonaga Esita, elelwaga naye. 16 Ivo Esita egalagwa kwe nyumba ye kiseuta mwo mwaka wa mfungate mwo useuta wa Ahasuelo, mwezi wa mlongo ukwitangwa Tebeti. 17 Seuta amuungisaga Esita kujink'ha ivo awaungisaga wandele watuhu wose. Aungisagwa vitendese kujink'ha wavele watuhu. Ivo seuta niyo amvika taji ya kiseuta mwo mtwi wakwe na kumtenda malikia saviya ya Vashiti. 18 Niyo seuta adamanya wila mkulu kwaajili ya Esita na kuwalalika wandima na vilongozi wose we isi yakwe. Naho abwelekeza zuwa dyo kuhumula mwe isi yakwe yose na kupanga mageleko ye kiseuta kwa ukise.

19 Wandele weze wakeduganye kaidi, Modekai andaga kasagulwa kunda kilongozi mwe nyumba ye kiseuta. 20 Esita andaga hanati kuketambalisa lukolo lwakwe hegu dikabila dyakwe enga ivo Modekai amkanyaga asekutenda ivo, Esita naye niyo amzumila enga viya andaga mwana. 21 Mwo lupisi ulwo ekalaga mwo lwivi lwa seuta Bigitana na Teleshi, waidi mwa wagosi wafunt'higwe awo wandaga wamizi we nyumba ye kiseuta waihiyagwa niyo waika mzungu wa kumkoma Ahasuelo. 22 Ivo Modekai abunk'hulaga mbuli iyo niyo amgambila malikia Esita, Esita naye amgambila seuta. 23 Upelembi wize udamanywe, wabunk'hulaga kugamba ni kindedi. Ivo awo want'hu waidi niyo wahwelezwa mwo mti wa kukomela na mbuli iyo yawandikagwa mwe kitabu cha nk'humbukila che kiseuta.