1 Zuwa iidyo seuta Ahusuelo amwink'haga Esita ugoli wose wa Hamani uyo andaga mnk'hondo ywa Wayahudi. Esita amgambilaga seuta kugamba Modekai ni nduguye. Kukongela zuwa idyo Modekai azumilagwa kwingila kwa seuta. 2 Seuta niyo aihambula imp'hete yakwe iyo amwink'haga Hamani na kumwink'ha Modekai na yehe Esita amwikaga Modekai kukimaila ugoli wose wa Hamani.

3 Esita alongaga naho na seuta, akakeduula hasi he viga va seuta uku akaila akamlombeza kugamba ahause mzungu uwo wiihile wa Hamani mwelekwa ywa Agagi, uwo awaikilaga Wayahudi. 4 Seuta niyo amchuluila Esita ingoda ya zahabu, Esita nae niyo akimala akagamba, 5 "Seuta, uneva vinakwelela, naho uneva unanizumila, lava sigilizi iyo Hamani aikaga itongelwe. Mzungu uwo wa mwana Hemedata mwelekwa ywa Agagi, uwo aikaga kugamba Wayahudi wose we mwe isi ya seuta wakomigwe. 6 Kwaviya nadaha vivihi kufinyiliza kuona makunt'ho mwa want'hu wangu Wayahudi naho nadaha vivihi kufinyiliza haona want'hu wangu wakomwa pele?"

7 Seuta Ahusuelo niyo amgamba malikia Esita na Modekai uyo Myahudi, "Kauleni himwink'ha Esita ugoli wose wa Hamani naye kanyogotolwa kale mwo mti wa kukomelwa kwajili yo mzungu wakwe wa kuunga kuwakoma Wayahudi. 8 Ivo elo wandikeni sigilizi nt'huhu yedi mwa Wayahudi iyo mkuunga inde kwa zina dyangu na kiwalo changu che kiseuta, kwaviya sigilizi inalavigwa kwa zina dyangu dye kuseuta na kutoigwa kiwalo changu heikudaha kuhitulwa."

9 Ivo mwo mwezi wa katatu ukwitangwa Siwani, Modekai awetangaga wakulu wose wa seuta na kuwagamba wawandike baluwa kwa Wayahudi na wakulu na vilongozi na wawandishi wose wa isi zose gana dimwenga na milongo miidi na mfungate, kukongela India mpaka Esiopia. Baluwa izo zawandikagwa kila isi naho mwe makabila yakwe na mawandiko yawe. 10 Modekai awandikaga baluwa izo kwa zina dya seuta Ahusuelo, azitoaga kiwalo kwa mp'hete ya seuta. Naho awo wazigalaga ni wegala ulosi wakwelaga mnanga mwe zifalasi zalawaga mwe didewa dya seuta.

11 Kwa sila izi ze baluwa seuta awazumilaga Wayahudi kudugana mwe mizi yawe hamwenga vileke kukeamila wikazi wawe. Nawanda na ulekelwa wa kubananga na kukoma fyo dyodyose dya want'hu hegu isi, zikuunga kuwakump'hukila woho na wanawe na ugoli wawe. 12 Mbuli ino idamanyika mwe isi yose ya seuta Ahusuelo, mwe dizuwa dya mlongo na nt'hatu yo mwezi wa mlongo na mbili uwo ukwitangwa Adali, zuwa dyandile Wayahudi wose wakomwe. 13 Baluwa izi zalavagwa enga mwiko ulavigwe mwe isi zose na kwa kila mnt'hu, vileke Wayahudi wakeike lumwe kulihiza kikoda mwe dizuwa iidyo dikabula kwa wank'hondo wawe. 14 Kwa sigilizi ya seuta, wegala ulosi wandaga mwe zifalasi zikugulukisa zandaga kwajili ya seuta uku wakatenda viligane na sigilizi ya seuta niyo lwabwelekezwa uko mwo mzi mkulu wa Susa.

15 Modekai ahalawaga ha seuta akanda kavala mavalo ye kiseuta ya langi ya buluu na ing'aile, na taji nk'hulu ya zahabu na nk'hazu ya zambalau na suke ing'aile. Want'hu wa mzi wa Susa wakwezaga izwi wakanga. 16 Aho Wayahudi waonaga kinyemi kitendese na want'hu watuhu nawanda wakawatunya. 17 Na mwe kila isi na mzi, hohose hadya baluwa iyo ize isomigwe, Wayahudi nawelelwa na kwanga, wadamanyaga zuwa dya kinyemi na zuwa dyo kuhumula, na want'hu wengi waketendaga Wayahudi, kwaviya nawakawogohesa Wayaudi.