1 Modekai eze amanye yose yalaile, azitatulaga zisuke zakwe na kuvala valo dya gunia na kukehaka maivu. Niyo omboka mgatigati yo mzi akaila kwa izwi na kwa usungu. 2 Aitaga mpaka kwe nk'hili ya seuta, mna hadahaga kwingila kwaviya hahali mnt'hu akuzumilwa kwingila akanda kavala valo dya gunia. 3 Naho kila isi habwelekezagwa sigilizi iyo, ndilo nk'hulu yawabwiilaga Wayahudi, wafungaga wakaila na kuhongeza, na watuhu wawe wagonaga mwe maivu wakanda wavala magunia.

4 Malikia Esita eze agambilwe ni wandima wakwe we kike zimbuli za Modekai engilisaga kinyulu, amwigailaga Modekai suke za kuvala hant'hu ha kuvala gunia, mna Modekai azilemelaga. 5 Ivo Esita amwitangaga Hataki, yumwenga mwa wagosi wafunt'higwe wa seuta asagulwagwa ni seuta amdamanyile ndima Esita, akamuuze Modekai kugamba kint'hu chani nekikamgela sungusungu, naho nii kikalaila. 6 Ivo Hataki aitaga kwa Modekai kwe lwazo we nk'hili ya seuta. 7 Modekai, amsimuilaga kila kint'hu icho champataga hamwenga no uwazilo wose wa masawa ayo Hamani alaganaga kuliha mwe kindolo kwajili ya kuwakoma pele Wayahudi. 8 Amwink'haga baluwa imwenga yo kubwelekezwa ulosi uwo ulavigwe mwo mzi wa Susa ukuunga Wayahudi wose wakomigwe, Modekai amlombezaga Hataki amgambile Esita ivo vili na kumgamba Esita amlombeze seuta awaonele mbazi Wayahudi want'hu wakwe Esita. 9 Hataki niyo agenda kumgambila Esita yose alongaga Modekai. 10 Naye Esita amgambilaga Hataki auye amgambile Modekai, 11 "Wandima wose wa seuta na want'hu wa si yose ye kiseuta wamanya kugamba mnt'hu yeyose yudya ywe kigosi hegu ywe kivele uyo neingile he balaza na kumlombeza seuta haheina kwitangwa vaungwa akomigwe. Uyo akudaha kuyokolwa ni yudya du naaonyekezwe ingoda yakwe ya zahabu vileke kumyokola. Mna miye hinati kwitangwa na seuta yabula mwezi umwenga haluse."

12 Modekai eze apate ulosi wa Esita, 13 amvuzilaga uhituzi akamgambe, "Unase kufanyanya kugamba wiyaho he nyumba ye seuta nouyokolwe kujink'ha myahudi yeyose yudya. 14 Unanyamala mwo lupisi enga ulwu, wambizi nouwezile Wayahudi kulawa kwe mbingu, naho woho nawayokolwe mna weye noubanike, na mp'huga ya iso nayo neikomwe pele. Niani amanyaga kugamba kuikwa kunda malikia kwa lupisi enga ulu!"

15 Esita niyo asigiila egailwe uhituzi Modekai kugamba, 16 "Ita ukawaduganye Wayahudi wose wekwo mzi wa Susa. Fungeni msekudya hegu kunywa kwa mazuwa matatu kilo na msi, kwaajili yangu, miye na wandima wangu we kike nekitende iivyo. Niho neniite kwa seuta hata uneva ni mwiko. Uneva ni kukomwa nenikomwe."

17 Ivo Modekai aitaga na kudamanya enga ivo Esita amsigilaga.