1 Mwe dizuwa dya mlongo na katatu dyo mwezi wa mlongo na kaidi, ukwitangwa mwezi wa Adali, ize ibule zuwa idyo baluwa ya seuta yaungagwa kudamanyika na wank'hondo wa Wayahudi nawakawiila kuwahuma wayahudi, mna mbuli izo zahitukaga niyo Wayahudi wawahuma wadya wandaga wakawaihiya. 2 Wayahudi wakeduganyaga mwe mizi yawe mwa isi yose ya seuta Ahasuwelo vileke wawatowe wadya nawakaunga wawakome pele, mna hakwandaga na yeyose adahaga kuwahiga Wayahudi kwaviya want'hu wa si nt'huhu wandaga wakawogoha. 3 Naho vilongozi wose we isi na wakulu wa watowani wo useuta wawambizaga Wayahudi, kwaviya nawakamogoha Modekai. 4 Haluse Modekai kanda mnt'hu mkulu mwo useuta, naho nt'hogola zakwe nezigenyela mwe ziisi zose kugamba udahi wakwe noukongezekela. 5 Ivo Wayahudi wawakomaga wank'hondo wawe kwa sime na kuwachinja na kuwakoma pele enga ivo wakuunga.

6 Uko kwo mzi wa Susa Wayahudi wawakomaga want'hu milongo mishano. 7 Naho wawakomaga Pashandata na Dalifoni na Asipata, 8 Polata na Adalia na Alidata, 9 Palimashita na Alisai na Alidai na Waizata, 10 wana mlongo wa Hamani uyo andaga mnk'hondo wa Wayahudi uyo andaga mwana Hemedata, mna hawatahaga ivint'hu vawe.

11 Mwe dizuwa idyo seuta agambilagwa uwazilo wa want'hu wakomagwa mwo mzi wa Susa. 12 Naho seuta amgambaga malikia Esita, "Mwo mzi mkulu du Wayahudi wawakomaga want'hu milongo mishano hamwenga na wana mlongo wa Hamani. Wafanyanya vivihi uko kwe isi zisigale, Haluse waungai? Nowink'higwe icho ukuunga, nigambile waungai naho, nawe noupate."

13 Esita niyo agamba, "Weye seuta unaona ni vedi walekele Wayahudi weli mwo mzi wa Susa wauiye sigilizi enga ivo yandile dielo. Naho ulave sigilizi kugamba wana Hamani wahweelezwe mwo mti wa kukomela." 14 Seuta niyo azumila ayo yose yadamanywe, sigilizi niyo yalavigwa mwo mzi wa Susa, wana mlongo wa Hamani wahwelezwe mwo mti. 15 Mwe dizuwa dyo mlongo na kane dyo mwezi wa Adali, Wayahudi waduganaga naho, na kuwakoma want'hu magana matatu mwo mzi wa Susa. Mna hawatahaga vint'hu vawe.

16 Wayahudi wandaga mwe si nt'huhu wakepangaga kukeamila wikazi wawe, naho wayokolagwa kulawa kwa wank'hondo wawe, wawakomaga want'hu wakubula alufu milongo mfungate na mishano naho hawatahaga vint'hu vawe. 17 Zuwa idyo dyandaga dya mlongo na nt'hatu dyo mwezi wa Adali, Zuwa ditimile dya mlongo na kane wahumulaga wakaditenda ni dya kinyemi na fugo. 18 Mna Wayahudi wose wo mzi wa Susa wakeduganyaga mwe dizuwa dya mlongo na kane mna hawahumulaga. Waditendaga kunda zuwa dya kinyemi mwe dizuwa dya mlongo na shano. 19 Kwajili ye mbuli ino Wayahudi wakwikala mwe zikaya na mwe mizi midodo wadamanya kinyemi mwe dizuwa dya mlongo na kane dyo mwezi wa Adali kunda zuwa dyawo dye kinyemi, na kwigailana mageleko.

20 Modekai awandikaga mbuli izi zose, naho awawandikilaga baluwa Wayahudi wose wekalaga mwo useuta wa seuta Ahasuelo awo wandaga mwe isi za hale na zi mgihi. 21 Awaungaga kila mwaka wadamanye zuwa dya kinyemi mwe dizuwa dya mlongo na kane na zuwa dya mlongo na shano dyo mwezi wa Adali. 22 Kwaviya Wayahudi wawahumaga wank'hondo wawe mwe mazuwa ayo, na mwe dizuwa idyo kinyulu chawo chahitulagwa kunda kinyemi, na ndilo yawe kunda zuwa dya kwanga. Walagizagwa wakumbukile mazuwa ayo kwa kudamanya fugo kwigailana mageleko ya nk'hande na kuwenk'ha wakiwa vint'hu. 23 Ivo Wayahudi wazumilaga kugendeela kudamanya mazuwa ya kinyemi ayo wandaga wayakongaga enga ivo wawandikilwagwa ni Modekai.

24 Hamani mnk'hondo wa Wayahudi mwana Hemedata ywa Agagi, adamanyaga mzungu wa kuwakoma Wayahudi naho atoaga kula vileke kusagula zuwa dya kuwahonda na kuwakoma Wayahudi. 25 Mna Esita eze aite kwa seuta, seuta naye alavaga sigilizi kwa mawandiko kugamba udya mzungu uihile wa Hamani adamanyaga kwa Wayahudi umpate yehe mwenye na kwa wanawe kwa kuhwelezwa mwo mti wa kukomela. 26 Kwaivo waditangaga dizuwa idyo Pulimu nuko kugamba kutowa kula kwajili ya baluwa ya Modekai na mbuli izo azionaga yehe mwenye na yadya wayapataga. 27 Wayahudi waitendaga kunda kihendo kwawe na kwa welekwa wawe na kwa mnt'hu yeyose akelunganyaga nawo, kugamba kila lupisi lwa mwaka haheina kuswesa mazuwa ayo maidi yadamanywe kinyemi viligane ne sigilizi ya Modekai. 28 Naho wazumilana kugamba kila lukolo lwa Kiyahudi cheleko mpaka cheleko na mwe kila isi na kila mzi vaungwa kukumbukilwa zuwa dya kutowa kula na kudamanya fugo kwa lupisi lwose lukwiza.

29 Niho malikia Esita mwanakike ywa Abihaili akanda na Modekai Myahudi wawandikaga kwa udahi wose kulagisa ukindedi che baluwa ino ya kaidi mwe mbuli ino ya kutowa kula. 30 Baluwa iyo wawandikilagwa Wayahudi wose na nt'huhu kwigalwa mwe si zose gana dimwenga na milongo miidi na mfungate yo useuta wa Ahasuwelo. Baluwa iyo yawaungilaga Wayahudi utondowazi na makawiilo. 31 Baluwa izo zawatigizaga woho wenye na welekwa wawe wadamanye kinyemi cha uhumi wa Wayahudi kwa lupisi lwakwe, enga ivo nawakazikumbukila sigilizi za kufunga mwo lupisi lwa kuhongeza. Malagizo aya nayalavigwa na Modekai Myahudi hamwenga na Esita. 32 Baluwa iyo ya Esita niyo yazumila mbuli izo za Pulimu na kuwandikwa mwe kitabu cho kukumbukila.