1 Ivo seuta hamwenga na Hamani wagendaga kudya nk'hande kwa malikia Esita. 2 Mwe dizuwa dya kaidi, umwo wandile wakanywa divai, seuta amuuzaga naho Esita, "Haluse malikia Esita waungai naho? Nigambile nawe noupate, walombezai? Hata uneva ni nusu yo useuta wangu nohwink'he."

3 Malikia Esita niyo amhitula, "Uneva hipata kuzumilwa kwako seuta naho uneva nouzumile icho hulombeza, Miye nalombeza miye na want'hu wangu kinde wagima. 4 Kwaviya miye na want'hu wangu kitagigwa vileke kikomigwe, kisekunda aaho naho na kuuswa pele. Vandile chatagigwe kikande watumwa wa kilume na wa kike hegu nehinyamala, kwaviya mbuli enga ino ya kutagwa hyaungile kukugela nk'huswank'huswa weye seuta, mna chaungigwa kukomigwa."

5 Aho seuta Ahusuelo niyo amuuza malikia Esita, "Ni ani uyo adamanye mbuli enga iyo? Mnt'hu uyo eihi?"

6 Esita niyo amhitula, "Mk'hondo wetu mkulu ni uyu mwiihi Hamani!"

Aho Hamani niyo engilwa ni wogohi ha seuta na malikia. 7 Seuta niyo akimala akanda na maya, afosaga kuse niyo aita kwe kiunga che nyumba ye kiseuta. Hamani eze abunk'hule kugamba seuta naamsengele asigalaga kunyuma vileke amhembeleze malikia Esita ayokole wikazi wakwe. 8 Akajika, seuta auyaga naho, eze engile kwe chumba umwo wandile wakanywa divai, ambwilaga Hamani kakeduula he difumbi andile Esita kekala. Seuta eze aone ivo alongaga kwa izwi kulu, "Ivi mnt'hu uyu aunga amkakalise malikia Esita iivi hakaula aha he nyumba yangu ye kiseuta?" Ivo seuta akanda hanati abinde kulonga, wandima wa seuta wagubikaga futa ya Hamani. 9 Halibona yumwenga mwa wandima wa kigosi wa seuta, agambaga "Hamani adamanyaga mti wa kumkomela Modekai uyo ayokolaga wikazi wako seuta. Mti uwo una utali wa mita milongo miidi na mbili. Mti uwo wiyuko kwe kaya yakwe. Aaho seuta niyo asigiila,

"Mnyogotoleni Hamani mwo mti uuwo."

10 Naye Hamani anyogotolagwa mwo mti wo kukomela uwo amdamanyilaga Modekai. Ivo maya ya seuta niyo yasila.