1 Zize zajike mbuli izo, seuta Ahusuelo amwink'haga ukulu Hamani, niyo anda mkulu kujink'ha watuhu. Hamani andaga mwana Hamedata na mwelekwa ywa Agagi. 2 Seuta asigilaga wakulu wakwe wose wamzumile Hamani kwa kumfikila madi na kumfunamila. Mna Modekai hatendile ivo. 3 Wakulu wamwenga wandaga ho lwivi lwa kiseuta wamuuzaga Modekai, "Nii weye waibela sigilizi ya seuta?" 4 Kila zuwa wamgambaga aleke mbuli iyo, mna Modekai hawazumile. Alemelaga kudamanya ivo kwaajili yehe ni Myahudi naho hakudaha kumfikila madi Hamani. Ivo wamgambilaga Hamani vileke akaule uneva naafinyilize ivo akutenda Modekai. 5 Hamani apataga maya eze amanye kugamba Modekai hakumfikila madi na kumfunamila. 6 Naho eze amanye kugamba Modekai andaga Myahudi, ahitulaga fanyanyi za kumkoma Modekai ekedu, ivo aikaga mzungu vileke Wayahudi wose wakomigwe mwo useuta wa seuta Ahasuelo.

7 Mwo mwaka wa mlongo na kaidi wo useuta wa seuta Ahasuelo, mwo mwezi wa nk'hongo ukwitangwa Nisani, Hamani alagizaga kutowa kula nuko kugamba pulimu idamanywe kuzungula zuwa no mwezi uwo akuunga adamanye mzungu wakwe. Ivo kula iyo niyo yagweela zuwa dya mlongo na nt'hatu mwezi wa mlongo na mbili ukwitangwa Adali.

8 Ivo Hamani niyo amgamba seuta Ahasuelo, "Weyaho want'hu wa lukolo kila hant'hu mwe isi yako, naho want'hu awo wana sigilizi zi hengi na want'hu watuhu wose. Naho hawakutimila sigilizi za seuta, ivo hiyo vedi seuta kuwafinyiliza want'hu awa. 9 Ukaunga seuta, sigilizi ilavigwe, want'hu awa wakomigwe. Miye name nalagana kuika kilo alufu milongo mitatu na milongo mfungate na shano za masawa mwe kindolo cha seuta kwajili ya want'hu wakuunga wadamanye indima iyo."

10 Seuta niyo ahambula mp'hete yakwe ya kugeela kiwalo mbuli zizumilwe kudamanywa na kumwink'ha Hamani mwana Hamedata mwelekwa ywa Agagi mnk'hondo ywa Wayahudi. 11 Naho seuta amgambaga Hamani, "Kwink'hwa want'hu wose na masawa damanya enga ivo ukuona kunda vedi."

12 Ivo zuwa dya mlongo na nt'hatu yo mwezi wa nk'hongo, Hamani awetangaga wawandishi wose wa seuta, wawandikaga kwa kila isi na mwe kila ulosi wa want'hu enga sigilizi ya Hamani ivo ilaile kwa seuta kwa wakulu we zi isi zi hengi na wakulu wa want'hu we hengi. Baluwa izo neziwandikwa kwa zina dya seuta Ahasuelo mwenye na kugeligwa kiwalo che mp'hete yakwe mwenye. 13 Wegala ulosi wegalaga baluwa kila isi mwo useuta wa seuta. Ulosi uwo walongaga kugamba kwa zuwa dimwenga du, dizuwa dya mlongo na nt'hatu dyo mwezi wa longo na mbili ukwitangwa Adali, Wayahudi wose wabwanga na wandele, wadala na wavele na wana wadodo, wose vaungwa wakomigwe pele, naho ugoli wawe wose utahigwe. 14 Baluwa izo zaungwa kusomwa mwe kiyeti mwe kila isi vileke kila mnt'hu akeike lumwe mwe dizua idyo. 15 Wegala ulosi niyo wahalawa na kusunguza kwigala sigilizi ya seuta, niyo yabwelekezwa uko Susa. Seuta na Hamani wekalaga wakanywa divai, mna want'hu wa Susa nawengila kiyangayanga.