1 Mwe dizuwa dya katatu dyo kufunga kwakwe, Esita avalaga mavalo yakwe ye kimalikia, aitaga na kukimala he balaza kundani mwe nyumba ya seuta, kukaulana na he difumbi dye kiseuta. Seuta andaga kundani naho ekalaga mwe difumbi dyakwe dye kiseuta, kukaula kwo mwingiilo we nyumba ye kiseuta. 2 Seuta eze amuone Esita kakimala he balaza, elelwaga naye na kumuonyekeza ngoda yakwe ya zahabu iyo andaga kaitoza mwo mkono wakwe. Esita niyo asogela na kuikwafa ingoda. 3 Aaho seuta niyo auza, "Waungai malikia Esita? Nigambile icho ukuunga nawe noupate hata uneva ni nusu ya useuta wangu miye nohwink'higwe."

4 Esita niyo amhitula, "Uneva inakwelela seuta, wize hamwenga na Hamani mwe fugo iyo niisank'hane kwajili yako."

5 Seuta niyo asigiila Hamani asunguze kwiza, enga ivo Esita alombeze. Ivo seuta na Hamani niyo waita kwe fugo iyo Esita aisank'hane. 6 Aho wandaga wakanywa divai, seuta amuuzaga naho Esita, haluse waungai? "Nigambile nawe noupate. Walombezai? Hata uneva ni nusu yo useuta wangu nowink'higwe."

7 Esita niyo amhitula, "Nalombeza naho naunga kugamba, 8 uneva nenizumilwe na seuta, naho seuta anona vedi kunink'ha idyo hulombeza na kunink'ha kiya huunga, seuta na Hamani weze naho luvi kwe fugo huunga husank'hanile. Miye name nenitende enga ivo seuta alongie."

9 Hamani alawaga uko kwe fugo akanda na kinyemi kitendese mwo moyo wakwe. Mna eze amuone Modekai he nk'hili ye nyumba ya seuta hakimalaga hegu kuzingiza, Hamani niyo anda na maya. 10 Hata ivo akekindilaga, na kukeitila kaya. Naho awalalikaga kwe kaya yakwe wambwiyaze, na kumlombeza Zeleshi mkaziwe akelunge nawo. 11 Naho Hamani akongaga kukeduvya mwo ugoli wakwe uwo ananao no uwingi wa wana kigosi, naivo seuta amwink'hile ukulu kujink'ha wakulu wose wa seuta. 12 "Hamani agendelaga kukeduvya," vituhu vakwe, "Malikia Esita halalikakaga mnt'hu mtuhu yeyose mna ni miye du hamwenga na seuta. Hata ivo luvi kakilalika miye na seuta. 13 Mna yose aya henelelwe nayo uneva nenigendeele kumuwona yudya Myahudi Modekai akanda he nk'hili ya seuta."

14 Ivo Zeleshi na mkaziwe hamwenga na wambwiyaze niyo wamgamba ivi, "Nii asekudamanyilwa mti wa kukomelwa, una utali wa mita milongo miidi na mbili? Luvi mtondo wadaha kulonga na seuta vileke Modekai akomigwe, vileke uite ukadye fugo hamwenga na seuta kwa kinyemi."

Fanyanyi iyo neimbwedeza Hamani naye niyo adamanya mti wa kukomela.