1 Aya nayo yalailaga mwo lupisi lwo useuta wa Ahasuelo. Seuta uyo andaga akalongoza mikoa gana dimwenga na milongo miidi na mfungate kulawa India mpaka Kushi iyo ikwitangwa Esiopia. 2 Andaga akalongoza kulawa mwo mzi wa Susa. 3 Mwo mwaka wa katatu wo useuta wakwe, seuta Ahusuelo awalalikaga vilongozi na wandima wakwe we isi na wakulu wa watowani we isi ya Uajemi na Media, wana wa maseuta na wakulu we mikoa. 4 Ivo kwa lupisi lwa miezi mtandatu Ahusuelo andaga akalagisa ugoli wo useuta wakwe ukukile na ukulu wo useuta wakwe. 5 Lupisi ulo lwize lwajike, seuta awalalikaga want'hu wose wo mzi mkulu wa Susa, wakulu kwa wadodo. Wila uwo wandaga wa mazuwa mfungate yadamanyikaga hekiwasa mwe kiunga chakwe. 6 Hant'hu aho handaga hahambigwa na mahambo ya langi ing'aile ya vitambala va langi ya buluu. Mapazia ayo yandaga yanyinyigwa na mp'hete za matundu kwa sigi za kitambala king'alise na vint'hu va langi ya zambalau, na kuhwelezwa mwo mkimailo uzengigwe kwa maiwe zihambigwe na malumalu. Na mafumbi ya zahabu na matundu yandaga yaikigwa hasi hadamanywe na viiwe va langi na malumalu ina langi ya buluu na maiwe ya yombe kulu. 7 Want'hu wenk'hagwa vo kunywa mwe vikombe vi hengi va zahabu, naho divai ya kiseuta yandilisaga nyingi viligane no ukise wa seuta. 8 Seuta alavaga malagizo kugamba kila mta kwiza alekelwe anywe haheina kulemezwa kwaviya seuta andaga kawalagiza wapasi wose we divai wawenk'he kila mnt'hu divai viligane na ivo wakuunga. 9 Mwo lupisi ulwo malikia Vashiti naye awalalikaga wavele mwe fugo wa mwe nyumba ye kiseuta ya Ahusuelo. 10 Mwe dizuwa dya mfungate dye fugo iyo, seuta Ahusuelo asangalaga mwo moyo wakwe aho eze anywe divai, awetangaga wagosi mfungate wafunt'higwe wandaga wakamdamanyila ndima yehe ekedu, awo wandaga ni Mehumani, Bizita, Halibona, Bigita, Abagita, Zetali na Kalikasi, 11 awasigilaga wandima wakwe wamwigale Vashiti kwakwe akanda kavala taji yakwe. Vashiti andaga na futa yedi itendese, ivo seuta aungaga kuwalagisa wata kwiza na vilongozi ivo eli mndele. 12 Mna wandima we nyumba ye kiseuta weze wamgambile malikia Vashiti, viya walagizwe ni seuta, malika vashiti alemelaga sigilizi ya seuta, mbuli iyo yamwiihiyaga seuta na kutendesa andilise na maya.

13 Kwavia neinda ni kihendo cha seuta kupata ulangilizi kulawa kwa wata umanyi, ivo awetangaga walamuzi na walangilizi na wamanyi we imiko, vileke wamgambile dyo kudamanya. 14 Walangilizi wakwe wandaga Kalishena na Shetali na Adimata na Talishishi na Malesi na Malisena na Memukani na vilongozi mfungate wa Uwajemi na Wamedi wandaga wakulu hasi yakwe.

15 Awazaga ivi "Togoleni Malikia Vashitine atendigwe vivihi viligane ne miko? Kwaviya nehiwasigiila wandima kwakwe mna yehe hazumile lwitango lwangu miye seuta Ahusuelo."

16 Aaho Memukani niyo amhitula seuta na vilongozi we hasi yakwe, "Malikia Vashiti hiyo kugamba katenda vihile kwa seuta du, yehe katenda vihile iviaivia kwa wakulu na want'hu wose we mikoa yose ihasi yo useuta wa Ahasuelo! 17 Mbuli ino aidamanye malikia Vashiti inamanyika kwa wavele wose, woho nawo nawawabele wagosi zawe wakagamba, ‘Seuta Ahusuelo amsigiilaga malikia Vashiti aite kwakwe mna malikia Vashiti alemelaga.’ 18 Dyelo ino wavele wa Uajemi na Media awo wevile mbuli ino atendile malikia Vashiti, nawawatendele iivo wakulu wose we hasi ya seuta. Hahande na uheelo wo lubezo na nk'humbizi. 19 Elo seuta unaona ni vedi, lava sigilizi nt'huhu kugamba Vashiti asekwiza naho kwa seuta Ahusielo. Sigilizi iyo iwandikwe mwe miko ya Uwajemi na Umedi, naho isekuhitulwa kugamba Vashiti asekwiza naho kwa seuta Ahasuwelo. Naho hant'hu hakwe ho umalikia enk'higwe mvele mtuhu ywedi kujink'ha yehe. 20 Sigilizi iyo ya seuta ikabwelekezwe nt'hendelo zose zo useuta wako, kila mvele naamogohe mgosiwe akanda mgoli hegu mkiwa."

21 Fanyanyi iyo neimbwedeza seuta na vilongozi we hasi yakwe, adamanyaga enga ivo alangilizwe ni Memukani. 22 Ivo, egalaga baluwa kila isi iyo aikaile na kila kabila, na mawandiko yakumanyika ya kugamba kila mgosi ande niye mkulu ywe nyumba yakwe na kuibwelekeza baluwa iyo kwa kila mnt'hu kwa ulosi wakwe.