1 Mwe dizuwa idyo dye kinyemi, kitabu cha Musa nekisomigwa kwa izwi kulu ha want'hu niyo waona hant'hu hakugamba, Waamoni na Wamoabu wasekulungana na want'hu wa Mnungu. 2 Ino ni kwaviya want'hu wa Izilaeli umwo wandaga wakatamba kulawa Misili kuita Kanaani. Waamoni na Wamoabu hawawenk'haga nk'hande na mazi, vituhu vakwe wamfumbasaga Balaamu vileke awaligite Waizilaeli. Mna Mnungu ywetu ahitulaga diligito kunda uvikilwa. 3 Want'hu wa Izilaeli weze weve Umwiko uwo hawakehanganyaga na want'hu hiyo Wayahudi.

4 Zuwa dye kinyemi umo dyandaga hadinati, mlavant'hambiko Eliashibu uyo andaga kasagulwa akaule vyumba ve Inyumba ank'hulu ya Mnungu ywetu, andaga na umbuya na Tobia uyo andaga mnk'hondo ywetu. 5 Eliashabu amlekelaga Tobia chumba kikulu icho aho nk'hongo chandaga chakuikila nt'hambiko na nk'hande na ubani na vyombo na divai na fungu dya mlongo na mavuta na vint'hu ivo walagizagwa kuwenk'ha Walawi na wakemi na waamizi we Nyumba ya Mnungu na malavo kwa walavant'hambiko. 6 Umwo aya yakalaila miye hyandaga Yelusalemu kwaviya mwo mwaka wa milongo mitatu na mbili wo useuta wa Atashasta wa Babeli, nehiuya kwa seuta vileke hamgambile yalaile. Mazuwa mageke kulongole namlombezaga seuta vileke niuye naho Yelusalemu, naye niyo anizumila. 7 Nize niuye Yelusalemu naho nabunk'hulaga wiihi wa Elishibu wa kumwink'ha chumba Tobia mwe Nyumba ank'hulu ya Mnungu. 8 Nehiihiwa vitendese na kuviduula kuse vint'hu vote va Tobia. 9 Niyo nasigiila want'hu, woho niyo wavitendaga ivyumba ivo vizumilwe kwa ndima ya Mnungu, name niyo navuza naho vint'hu va mwe Nyumba ya Mnungumalavo ya unga no ubani.

10 Naho niyo nabunk'hula kugamba wakemi na Walawi watuhu wahalawa Yelusalemu na kuuya kwe zink'honde zawe kwaviya want'hu wa Izilaeli hawawenk'hile nk'hande na vint'hu vikuungwa kwa wikazi wawe. 11 Nawakanyaga vilongozi hagamba, "Nii Nyumba ank'hulu ya Mnungu ilekigwa?" Nawaduganyaga Walawi na wakemi wauye kwe Nyumba ya Mnungu na kudamanya ndima zawe. 12 Niyo want'hu wose wa Izilaeli wakonga naho kwigala fungu dya mlongo dya unga na divai na mavuta ya mizeituni mwe vindolo. 13 Nawasagula want'hu wande wakaulizi we vindolo. Mlavant'hambiko Shelemia na Sadoki mhinizi ywe miko na Pedaia ywe dikabila dya Lawi, na Hanani mwana Zakuli na mwezukuluwe Matania ande mnt'hu ywa kuwambiza. Want'hu awa wandaga wahuwilwa mwe ndima yawe yandaga ni kuwapangila wandima weyawe icho wakuunga.

14 Weye Zumbe Mnungu ywangu, unikumbukile kwajili ya aya yose no wedi nidamanye mwe Nyumba yako na kwajili yo undima wako.

15 Mwo lupisi ulwo nawaonaga want'hu wa Yuda wakakama zabibu zuwa dyo kuhumula. Naho watuhu wandaga wakakweza nt'hanu mwe zimp'hunda zawe unga, divai na zabibu na tini na vint'hu vituhu wavigalaga kwo mzi wa Yelusalemu. Nakuwakanya kugamba hawakuungwa kutaga vint'hu ivo mwe Dizuwa dyo Kuhumula. 16 Want'hu watuhu kulawa mwo mzi wa Tilo wekalaga Yelusalemu, wegalaga samaki na vint'hu vituhu mwo mzi wa Yelusalemu na kuwatagila want'hu wetu Zuwa dyo Kuhumula. 17 Nawakanyaga vilongozi wa Yuda hagamba wavu wani uno mkuudamanya, "Mwaditenda Dizuwa dyo Kuhumula kunda hadikukile? 18 Togoleni wakale wetu hawadamanyaga wavu enga uno na kumtenda Mnungu ywetu akibanane hamwenga no mzi uno? Naho mkei mwegala ubanangi mwe Izilaeli kwa kudibalanga Dizuwa dyo Kuhumula."

19 Ivo niyo nalagiza kugamba zink'hili zose zo mzi wa Yelusalemu zivugalwe umwo Dizuwa dyo Kuhumula dikakonga, ziza dikakonga kwingila, naho sema yanakomolwe mpaka zuwa dyo kuvika dikajink'ha. Nehiwaika want'hu wangu mwe zink'hili na kuwalagiza kugamba kint'hu chochose sema kinaletigwe mwo mzi mwe Dizuwa dyo Kuhumula. 20 Kaidi hegu katatu, wachuuzi ndaga wakachuuza vint'hu vi hengi yawaungaga wagone kuse yo mzi mwe Dizuwa dyo Kuhumula dikanda dikei kukonga. 21 Nehiwakanya hawagamba, "Hiyo vedi kugona kuse yo mzi, mna uiya naho neniwagwileni." Ivo kukongela zuwa idyo hawauyaga naho mwe Dizuwa dyo Kuhumula. 22 Nehiwalagiza Walawi wakekukize wakamile kwe nk'hili vileke Dizuwa dyo Kuhumula dinde dikukile.

Mnungu ywangu unikumbukile hata kwa idi, unionele mbazi viligane no lukunde lwako lukulise.

23 Naho nabunk'hulaga kugamba Wayahudi walomba wavele kulawa Ashidodi na Amoni na Moabu, 24 ne nusu ya wana wawe wandaga wakalonga ulosi wa Kiashidodi hamwenga aha walonga ulosi wa want'hu watuhu, naho hawadahaga kulonga ulosi wa Kiibulania. 25 Nehiwakanya na kuwaligita mpaka wamwenga wawe nawatowaga na kuwachutula fili zawe na kuwatigiza wakelise kwa zina dya Mnungu ywawe kugamba wasekuwaloza naho wana kike wawe hegu wakilume kwa wana wa want'hu hi Wayahudi hegu du hata nyuwe wenye. 26 Nagambaga, "Togoleni! Selemani hadamanyaga wavu kwajili ya wavele we hengi? Yehe nakanda seuta mkulu kujink'ha maseuta watuhu wa si nt'huhu. Mnungu amuungaga na kumtenda kunda seuta ywa want'hu wose wa Izilaeli, hata ivo wavele wa si nt'huhu wamtendaga adamanye wavu. 27 Togoleni! Kitimile mliganyizo wenyu kidamanye wavu uno mkulu wa kuleka kumzumila Mnungu ywetu, kwa kulomba wavele wa watakwiza?"

28 Yumwenga mwa wana wa Yoyada uyo andaga mwana Eliyashibu mlavant'hambiko mkulu, amlombaga mwana kike ywa Sanibalati kulawa mwo mzi wa Beti Haloni, kwaivo namgulusaga Yoyada ahalawe kuse ya Yelusalemu.

29 We Mnungu! Kumbukila want'hu ivo wageile usavu ulavant'hambiko ne Ndagano wiikile na walavant'hambiko na Walawi.

30 Nehiwakukiza want'hu kulawa mwe ivint'hu viihile va watakwiza. Niyo naika ve imitendele kwajili ya walavant'hambiko na Walawi vileke kila yumwenga amanye indima yakwe. 31 Nehiwapanga want'hu wo kwigala nk'huni zo kokela malavo he kilingo zigalwe kwa lupisi lukuungwa, naho want'hu wegale malavo ya fungu dya mlongo no ulozo wa nk'hongo mwo lupisi lukuungwa.

We Mnungu ywangu, unikumbukile kwa aya yose naho unink'he uwagilwa wako.