1 Sanibalati na Tobia na Geshemu, akwitangwa Mwalabu na wank'hondo wetu watuhu, weze weve kibinda uzesi wo lukazi naho na kugamba hahana hohose halekigwe hamwenga na kugamba hakinati kugela zinyivi kwe mingiilo. 2 Sanibalati na Geshemu watumaga ulosi kwangu wakagamba, "Soo kidugane mwo mzi umwenga we nt'hindiga ya Ono. Mna uno nounda mnyanyiko wa kunikoma." 3 Ivo, nawegailaga ulosi hagamba, "Ndima hudamanya haikuungwa kuswesa. Ivo hikudaha kugenda kuikimalisa vileke nize kwenyu."

4 Wanigailaga ulosi uwo nk'hanana nne, name kwa nk'hanana nne nawenk'haga uhituzi uudya nawahitulaga.

5 Nk'hanana ya shano Sanibalati asigiilaga yumwenga mwa wandima wakwe kwangu andaga ne baluwa yadahaga kusomigwa ni mnt'hu yeyose. 6 Naho baluwa yenye yawandikwagwa ivi,

"Geshemu agamba mwe isi mwivika dihambwehambwe, kugamba weye na Wayahudi weyawo mwaunga msaguke. Nivo vikuleka mwaluzenga naho lukazi. Naho weye waika mnyanyiko wa kuketenda mwenye kunda seuta ywawe. 7 Naho kukeikila walavant'hambiko mwo mzi wa Yelusalemu vileke wabwelekeze kugamba weye ywi seuta ywe isi ya Yuda. Seuta Atashasta naagambilwe zimbuli izi, ivo nafanyanya kidugane vileke kisimuile mwe mbuli ino."

8 Name niyo namhitula kugamba. "Ayo ukulonga hiyo ya kindedi, ayo kutunga mwenye."

9 Wadamanyaga ivo vileke wakitise wakafanyanya kugamba, nekinde wasokezi mwe ndima, kwaivo indima heisile. Name niyo namlombeza Zumbe Mnungu ywangu hagamba, "Weye, Mnungu ywangu nakulombeza unink'he ludole."

10 Zuwa dimwenga nize niite kaya kwa Shemaya mwana Delaya na mwezukuluwe Mehetabeli uyo heekulekelwa kufosa kuse, anigambaga, "Kite kibwiilane kwe Nyumba ya Mnungu kikakefise, naho nyivi zakwe kizivugale kwaviya kilo cha dielo naweze wakukome." 11 Mna miye niyo namhitula, "Togoleni mnt'hu enga miye adaha kunyilika na kukefisa? Wafanyanya kugamba miye nadaha kwingila mwe Nyumba ya Mnungu vileke niyokole wikazi wangu? Bule! Henidahe kudamanya ivo." 12 Nize nifanyanye vedi nabunk'hulaga kugamba Mnungu halongile na Sanibalati, vituhu vakwe Tobia na Sanibalati wamfumbasaga, vileke anigambile mbuli izi. 13 Nakafumbaswa vileke anitise vileke miye nitende wavu. Vileke wande na luneka lwa kubalanga zina dyangu na kuwatenda want'hu wanibele.

14 Namlombezaga Mnungu hagamba, "Mnungu kumbukila yadya watendile Tobia na Sanibalati, hamwenga na yudya mlotezi mvele Noadia na walotezi watuhu awo wagezaga kunitisa."

15 Ivo ndima yo uzesi yasilaga mwe dizuwa dya milongo miidi na mishano yo mwezi ukwitangwa Eluli, ndima iyo yaguhaga mazuwa milongo mishano na maidi niyo yasila.

16 Wank'hondo wetu mwe isi zikukizunguluka weze weve kugamba kiibinda indima, wogohaga na kukeiva soni, kwaviya wamanyaga kugamba ndima yajika kwa wambizi wa Mnungu.

17 Naho mwa mazuwa ayo yose, vilongozi wa Wayahudi wandaga wakawandikilana baluwa na Tobia. 18 Want'hu wengi mwa Wayahudi wandaga ywawe kwaviya andaga mkwewe ywa Shekania, mwana Ala. Naho Yehohanani mwana Tobia amlombaga mwana Meshulamu uyo mwana Belekia. 19 Naho nawakanigambila ayedi adamanye, na kumwigaila zimbuli zangu. Tobia naye andaga akanigaila baluwa nyingi za kugeza kunitisa.