1 Sanibalati eze eve kugamba kikonga naho kuzenga lukazi, aihiyagwa vitendese, niyo akonga kukibela, 2 halongole ha wambwiyaze na ha watowani wa Wasamalia akagamba, "Awa Wayahudi wasokezi watendai aha? Togola fanyanyi yawe ni kuuzenga mzi naho? Togola wafanyanya kwa kulava nt'hambiko nawadahe kubinda ndima kwa zuwa dimwenga du? Nawadahe kuyatenda maiwe ya mwe mazala yakudaha kuzengela?"

3 Tobia kulawa kwe isi ya Waamoni akimalaga hagihi naye niyo agamba, "Wazengai? Hata uzi dinakweela umo dyadaha du kumola lukazi lwawe lwa maiwe!"

4 Naho namlombezaga Mnungu hagamba, "Zumbe Mnungu ywetu, Tegeleza ivo wakukibela, uwavuzile mabelo ayo kwakwe wenye na uwaleke watahigwe mwe isi ya watahigwa. 5 Naho unase kuwalekela masa yawe hegu unase kujala wavu wawe kwaviya wakihomola suwe wazesi wako."

6 Ivo kigendeela kiluzenga lukazi mpaka mwe nusu yo utali kuita kulanga kwaviya want'hu wagendeela kuuzenga kwa mioyo yawe.

7 Mna umwo Sanibalati na Tobia na Waalabu na Waamoni na Waashidodi weze weve kugamba ndima yo kuzenga lukazi lwa Yelusalemu wagendeela, naho hahana hohose hehezengigwe uhya, waihiyagwa vitendese. 8 Waikaga mzungu kwiza Yelusalemu kuutowa na kwigala nt'hulumundu. 9 Ivo chamlombezaga Mnungu ywetu naho nekiika wamizi kilo na msi.

10 Want'hu wa Yuda wakongaga kukema wakagamba,

"Wazesi wo lukazi wahungukilwa ludole,

naho kuna mank'halank'hala yabindile wingi ya kwinula.

Nekidahe vivihi kuluzenga lukazi?"

11 Naho wank'hondo wetu wandaga wakagamba, "Hawadahe kumanya hegu kuona, mpaka kize kibule kwawe na kuwakoma na kukindila indima."

12 Wayahudi wekalaga hagihi na wank'hondo wetu weze weve mbuli izo, wezaga nk'hanana nyingi kukikanya wakagamba, "Wank'hondo wetu naweze kulawa nt'hendelo zose wakitowe."

13 Ivo kundya kunyuma kwandaga no lukazi luguhi na kila hant'hu handaga hakei kusila, napangaga want'hu viligane ne zink'holo zawe wakanda na sime na mijungo na nyuta. 14 Nize nione kugamba want'hu wogohesa, nakimalaga niyo nawagamba wakulu ne vilongozi wose wa want'hu, "Mse kogoha. Kumbukileni ivo Zumbe Mnungu eli mkulu na wa kogohwa, na ivo towaneni kwaajili ya wandugu zenyu, na wana wenyu na wavele wenyu ne zikaya zenyu."

15 Wank'hondo weze weve kugamba fanyanyi zawe kizibunk'hula naho Mnungu abanangaga fanyanyi zawe, niho suwe chose chauyaga kiluzenge naho lukazi.

16 Kukongela mwe dizuwa idyo na kugendeela, nusu ya wandima wangu wagendeelaga no uzesi na inusu int'huhu ni kwaajili yo wamizi wakanda ne mijungo na nk'hindo na nyuta na mavalo ya kukindila kifua. Vilongozi wetu wandaga wakawagela moyo want'hu wa Yuda, 17 awo wandile wakazenga lukazi. Hata wadya nawekenula vint'hu va kuzengela wazengaga no mkono umwenga, mkono mtuhu nawo ukanda utoza vitowanilo. 18 Kila mzesi andaga ne sime yakwe inyinyigwe mwe kigudi na akagendeela kuzenga, mnt'hu akutowa digunda naye andaga hagihi na miye.

19 Nawagambaga wakulu na want'hu wose kwa hamwenga, "Lukazi ulu lutendesa utali, naho lukitenda kisambale kila mnt'hu ehale na miyawe. 20 Umwo ukadamanya ndima niyo weva izwi dya gunda, gulukila kwetu. Mnungu ywetu naakitowanile!"

21 Ivo chagendeelaga kudamanya ndima ne nusu ya want'hu wetu wenulaga vitowanilo va nk'hondo kukongela kilokilo mpaka nekilo zint'hondo zikaoneka kwe mbingu.

22 Mwo lupisi ulwo niyo nawagamba want'hu, "Kila mgosi na mndima ywakwe neekale Yelusalemu nekilo, vileke kinde na wamizi wa nekilo, na mwo lupisi lwa msi nawagendeele na ndima." 23 Ivo miye na wandugu zangu na wandima wangu hata wamizi wandile hamwenga na miye, hachahambulaga zisuke zetu, kila yumwenga ywetu hachahambulaga suke zetu mazuwa yose.