1 Ino niyo simo ya Nehemia mwana Hakalia, mkaya ywa Yelusalemu, umwo nandile mwo mzi mkulu wa Susa, mwo mwezi wa Kisilevu wo mwaka wa milongo miidi wo useuta wakwe Atashasita. 2 Hanani yumwenga mwa wandugu zangu ezega na wamwenga kulawa mwe isi ya Yuda. Naho nehiwauza mwe mbuli ya weetu Wayahudi wahonile, awo wauyaga kulawa Babeli kwo utumwa ne mbuli yo mzi wa Yelusalemu.

3 Woho wanigambaga, "Wayahudi wahonaga na kuuya mwe isi yawe, we mwe makunt'ho na soni. Nk'handula zo mzi wa Yelusalemu zamokaga pele, zink'hili zakwe zokagwa."

4 Nize nive ayo nekalaga hasi na kuila, nahongezaga kwa mazuwa. Nafungaga na kumlombeza Mnungu ywa kwe mbingu 5 hagamba, "Zumbe Mnungu ywa kwe mbingu, weye ywi Mnungu mkulu naho ywa kogohwa, watoza Ndagano yako na kulagisa lukunde lwako howiina uheelo kwa want'hu wose wakuzitoza sigilizi zako. 6 Nakulombeza unitegeleze, naho unikale miye mndima ywako, hakulombeza kwajili ya wandima wako kilo na msi. Nakweiila kwajili yo wavu wa want'hu wa Izilaeli. Miye hamwenga na want'hu wangu kizumila kugamba kidamanya wavu. 7 Kidamanya yaihise hako, hakitozile sigilizi zako, miko na malagizo yako umsigiile Musa mndima ywako. 8 Haluse kumbukila yadya umlagize mndima ywako Musa, wize ugambe uneva homnde wahuwilwa kwangu, neniwatendeni msambale mwe zi isi. 9 Mna mnauya kwangu na kutoza zisigilizi zangu na kuzitimila, hata uneva neni watendeni msambale hale, neni wavuzeni hant'hu nihasagule kunda hant'hu hangu ha kunivika.

10 "Want'hu awa ni wandima wako uwakombole kwa udahi wako mkulu na kwa ludole lwako. 11 Zumbe ywangu nakulombeza unitegeleze kiya hulombeza miye mndima ywako naho wandima wako wana kinyemi cha kukutunya weye. Nakulombeza unilagise uwedi wako dyelo, miye mndima ywako vileke seuta anionele mbazi."

Miye nehinda na ndima ya kumwigaila vo kunywa seuta.