1 Ivi nivo lukzi lwo mzi lwazengwagwa: Eliashibu mlavant'hambiko mkulu hamwenga na walavant'hambiko weyawe watuhu wazengaga uhya he Nk'hili ye Ngoto. Wahaikaga kwajili ya Mnungu niyo wagele ne zinyivi zakwe, wzwngwaga naho mpaka kwo Mnala wa Gana dimwenga na komnala wa Hanaeli. 2 Hant'hu hatimile hazengwagwa naho na want'hu wa Yeliko. Zakuli mwana ywa Nimli niyo azenga hant'hu hatimile.

3 Nk'hili ya Samaki izengwa uhya ni lukolo lwa Hasena, waikaga mkimailo yakwe ne zinyivi zakwe, mitunga mikulu na mihindo ya kilama. 4 Hant'hu hatimile hazengagwa uhya ni Melemoti mwana Ulia uyoi mwezukuluwe dya Hakosi. Hatuhu hatimile hazengagwa uhya ni Meshulamu, mwana Belekia mwana Meshezabeli. Hant'hu hatimile hazengagwa uhya ni Sadoki, na mwana Baana. 5 Hant'hu hatimile hazengagwa ni want'hu kulawa mwo mzi wa Tekoa. Mna vilongozi wo mzi walemelaga kudamanya ndima izo wenk'higwe ni wakimalizi vileke wazidamanye.

6 Nk'hili yetangwagwa Nk'hili ya Kale yazengagwa naho na Yoyada mwana Pasea hamwenga na Meshulamu mwana Besodeya. Waikaga mikimailo ne mitunga mikulu, mihindo yakwe ya kilama. 7 Watimilaga mwe ndima yo kuzenga naho wandaga ni Melatia kulawa Gibeoni na Yadoni kulawa Melonoti hamwenga na want'hu wo mzi wa Gibeoni na Mizipa wandaga mwo udahi wo mkowa wa usweelo wa zuwa wo mto Efulate.

8 Hatuhu hatimile hazengwagwa naho ni Uzieli mwana Halikaya, msani ywe zahabu. Hant'hu hatimilaga mpaka kwo lukazi luzangalamu lwazengwagwa naho ni Hanania mdamanyi wo mhemp'he.

9 Lefai mwana Huli mkulu ywe nusu yo mzi wa Yelusalemu, niye azengaga naho hant'hu hatimile.

10 Yedaya mwana Halumafu azengaga naho hant'hu hatimilaga handaga hagihi ne nyumba yakwe.

Hatimilaga hatuhu hazengagwa naho ni Hatushi mwana Hashabineya.

11 Hant'hu hatimilaga hamwenga no mnala we nunda yo kokela mikate, yazengagwa naho ni Malikiya mwana Halimu hamwenga na Hashubu mwana Pahati Mmoabu.

12 Hant'hu hatuhu hatimile hazengagwa naho na Shalumu mwana Haloheshi, kilongozi we nusu int'huhu ya Yelusalemu. Akambizana na wanakike wakwe mwo uzesi uwo.

13 Nk'hili ye kwe Dikolongo yazengagwa ni Hanuni hamwenga na wakaya wo mzi wa Zanoa. Na kuwiika ink'hili hant'hu hakwe, niyo waugela mhindo wakwe. Wazengaga naho lukazi lwandaga na utali wa mita magana mane mpaka mwe Nk'hili ye Nt'hagata.

14 Nk'hili ya Nt'hagata yazengagwa naho ni Makia mwana Lekabu mkulu ywe wilaya ya Beti Hakelemu. Aizengaga uhya na kugela zinyivi zakwe ne madanaga yakwe ne mihindo yakwe.

15 Mwingiilo we zinc'hoko yazengagwa naho ni Shalumu mwana Kolihoze mkulu ywa Mizipa. Aiikaga hant'hu hakwe na kuitima, niyo aiikila mihindo ya kilama, na mitunga mikulu. Kwe dikawa dya Shela azengaga lukazi mpaka kwe kiunga che kiseuta na kugendeela kwe vibo vikuhinga kwo mzi wa Daudi. 16 Hant'hu hakutimila mpaka kwe vikuta va mzi wa Daudi, na kwe dikawa na kwe nk'hambi ya watowani vazengagwa naho ni Nehemia mwana Azibuki mkulu ywe nusu ye wilaya ya Beti suli.

17 Eze ajike uyo, Walawi wagendeelaga kuzenga wandaga, Lehumu mwana Bani. Hashabia kilongozi ywe nusu ya Keila naye aizengaga naho hant'hu hatimile haungwagwa hazengigwe ni want'hu we wilaya yakwe.

18 Bavai mwana Henadadi kilongozi ywe nusu int'huhu ye wilaya ya Keila azengaga hant'hu hatimile.

19 Hant'hu hakutimila ho lukazi, hakukaulana ne nyumba yo kuikila vitowanilo va nk'hondo mpaka kwe mp'hembe yo lukazi lwazengagwa naho na Ezeli mwana Yeshua kilongozi ywa Mizipa.

20 Hant'hu hatimilaga kukongela kwe mp'hembe yo lukazi kuhinga kwo mwingiilo we nyumba ya Eliashibu mlavant'hambiko mkulu yazengwagwa naho ni Baluku mwana Zabai.

21 Hant'hu hatimilaga mpaka kwo uheelo we nyumba ya Eliashibu hazengwagwa naho ni Melemoti mwana Ulia mwezukuluwe dya Hakosi.

22 Hant'hu hatimilaga hazengwagwa naho ni walavant'hambiko kulawa mwe zint'hendelo zimgihi no mzi wa Yelusalemu.

23 Benjamini na Hashubu wazengaga naho hant'hu hakutimila hagihi ne zinyumba zawe.

Uzia mwana Maseya mwezukuluwe dya Anania azengaga naho hant'hu hatimile ho lukazi hagihi ne nyumba yakwe.

24 Hant'hu hakutimila ni kukongela mwe nyumba ya Uzia mpaka kwe mp'hembe ye lukazi hazengwagwa ni Binui mwana Henadadi.

25 Hant'hu hakutimila kukongela mwe mp'hembe ya lukazi mpaka kwo mnala mtali we nyumba ye seuta hagihi no kigela cha wamizi, hazengwagwa naho ni Palali mwana Uzai, Pedaya mwana Paloshi.

26 Pedaya mwana Paloshi naye hamwenga na wandima we Nyumba ya Mnungu wakwikala kwa kagulu ka Ofeli, wazengaga naho hant'hu hatimile hant'hu hakukaulana ne Nk'hili ya Mazi, nt'hendelo ya ulailo wa zuwa wo mnala mtali.

27 Hant'hu hatimilaga ni kukongela mwo mnala mtali mpaka kwo lukazi lwa Ofeli, hazengagwa naho ni wakaya wo mzi wa Tekoa.

28 Kukongela kwe Nk'hili ye Falasi kwandaga na walavant'hambiko kila yumwenga akazenga hant'hu hakukaulana ne nyumba yakwe.

29 Sadoki mwana Imeli azengaga naho hant'hu hatimilaga hakukaulana ne nyumba yakwe. Shemaya mwana Shekania mwamizi ywe Nk'hili yo Ulailo wa zuwa azengaga hant'hu hatimilaga.

30 Hant'hu hatimilaga hazengagwa naho ni Hanania mwana Shelemia, akanda hamwenga na Hanuni mwana ywa mtandatu ywa Zalafu. Aha ni hant'hu hawe ha kaidi mwo kuzenga.

Meshulamu mwana Belekia naye azengaga naho hant'hu hatimilaga hakukaulana ne nyumba yakwe.

31 Makia msana zahabu azengaga hant'hu hakutimila mpaka kwe nyumba wekalaga wandima we Nyumba ya Mnungu hamwenga na wachuuzi yandaga hagihi ne Nk'hili yo Kulauila, hagihi ne chumba cha kulanga mwe mp'hembe hant'hu ha mkomamahanya na ulailo wa zuwa.

32 Wasana zahabu watuhu na wachuuzi watuhu wazengaga naho hant'hu ho kubindiliza kulawa kwe chumba mpaka kwe Nk'hili ya Ngoto.