1 Umwo wize ubule mwezi wa mfungate want'hu wose wa Izilaeli waduganaga mwo mzi wa Yelusalemu ho lwazo lwi hagihi no Nk'hili yo Mazi. Niyo wamgamba Ezila mlavant'hambiko naho mwandisi, akilete kitabu che Miko ya Musa iyo Zumbe Mnungu awenk'haga want'hu wa Izilaeli. 2 Ezila akiletaga kitabu icho che Miko ya Musa he difyo dya want'hu, wagosi na wavele na wana wadahaga kukombaganya iyo Imiko. Zuwa idyo dyandaga dya nk'hongo dyo mwezi wa mfungate. 3 Ivo Ezila awasomelaga imiko ya Musa akanda he Nk'hili yo Mazi kukongela mtondo mpaka nomsi. Want'hu wose wategelezaga kwa wengele icho kiwandikwe mwe kitabu che Miko.

4 Ezila uyo mwandisi andaga kakimala halongole hant'hu henukile hatile kudamanyanywa kwa mbao kwajili ye mbuli iyo, kulume kwakwe wakimalaga Matisia na Shema na Anaya na Ulia na Hilikia na Maseya, kumoso kwakwe nako wakimalaga Pedaya na Mishaeli na Makiya na Hashumu na Hashibadana na Zekalia na Meshulamu.

5 Ezila akimalaga he kilingo,

ha want'hu wose, awo want'hu wose wamkaulaga. Ezila eze agubule kitabu che Miko want'hu wose wakimalaga kwa kumtunya Mnungu. 6 Ezila niyo agamba, "Atunywe Zumbe Mnungu, Mnungu mkulu!" Want'hu wose wenulaga mikono yawe kulanga wakagamba, "Taile! Taile!" Naho want'hu wafikaga madi niyo wafunamizaga mitwi yawe hasi wakamvika Zumbe Mnungu.

7 Niyo wakimala kila mnt'hu hant'hu hakwe, Walawi wakutimila wawambizaga Waizilaeli vileke wakombaganye Imiko. Walawi awa ni Yeshua na Bani na Shelebia na Yamini na Akubu na Shabetai na Hodia na Maaseya na Kelita na Uzia na Yozabadi na Hanani na Pelaya. 8 Wasomaga vedi mwe kitabu che Miko ya Mnungu na kuwatambalisa vedi want'hu vileke wakombaganye kiya kiwandikwe.

9 Want'hu wose weze waive Imiko, wakongaga kuila. Nehemia uyo andaga kilongozi, na Ezila mlavant'hambiko naho mhinizi we miko, hamwenga na Walawi, wawahinizaga want'hu wakawagamba, "Mse kuila, Zuwa idi dikuka kwa Zumbe Mnungu, ywenyu, mse kuhongeza hegu kuila. 10 Haluse uyeni kaya mkadamanye wila mdye vedi na kunywa divai yedi mna kumbukileni kuwenk'haga wadya heweena, kwaviya dyelo ni zuwa dikukile kwa Zumbe ywetu. Msekunda na kinyulu kwaviya kinyemi akuwenk'ha Zumbe Mnungu ni ludole kwenyu."

11 Ivo Walawi wawabasaga want'hu nakuwagamba waleke kuila, "Nyamaleni kwaviya zuwa dya dyielo ni zuwa dikukile msekunda na kinyulu."

12 Want'hu wose wauyaga kaya niyo wadya no kunywa kwa kinyemi na kuwenk'ha nk'hande watuhu kwaviya wakombaganyaga yose wagambilagwa.

13 Zuwa ditimile wakulu we zink'holo hamwenga na walavant'hambiko na Walawi waduganaga kwa Ezila uyo mhinizi ywe miko vileke wahine Imiko. 14 Wabunk'hulaga kugamba, Mwiko wa Mnungu uwo amwink'haga Musa wawaungaga want'hu wa Izilaeli wekale mwe viheha mwe dizuwa dya kinyemi che viheha cho mwezi wa mfungate. 15 Ivo wawagambilaga want'hu mwe mizi yose na uko Yelusalemu wakagamba, "Iteni kwe vigulu mkakant'he matambi yo mzeituni na mizaituni mbago na misingano na mitende na miti mituhu yo kuzengele viheha, enga ivo viwandikwe mwe miko."

16 Ivo want'hu wegalaga matambi na kuzenga viheha kila yumwenga mwe ditembe dyakwe, na mwo lwazo lwakwe, na ho lwazo lwe Nyumba ya Mnungu, na lwazo lwa want'hu wose hagihi ne Mwingilo wa Mazi ne mwingilo wa Efulaimu. 17 Want'hu wose wauyaga kulawa mwo utahigwa wazengaga viheha na kwikala umwo. Ino neinda nk'hanana ya nk'hongo want'hu kwikala mwe viheha kukongela mwa mazuwa ya Yeshua mwana Nuni. Want'hu wandaga na kinyemi kikulu.

18 Kukongela zuwa dya nk'hongo mpaka dyo uheelo Ezila awasomelaga want'hu kitabu che Miko ya Mnungu. Watendaga kinyemi icho kwa mazuwa mfungate na mwe dizuwa dyo mnane wadamanyaga mwivano wa kubindiliza kinyemi enga ivo iwandikwe mwo kitabu che miko.