1 Vilongozi wa want'hu nawakekala mwo mzi wa Yelusalemu, mzi ukukile. Want'hu tuhu wasigale kulawa mwe mizi ya Yuda na Benjamini watowaga simbi wasagule mp'huga imwenga imwenga kulawa mwe kila mp'huga mlongo iite ikekale mwo mzi ukukile wa Yelusalemu, lupisi uulo zimp'huga zint'huhu zisigale nezinda zikale mwe mizi mp'huga kenda zekalaga mwe mizi yawe mituhu. 2 Want'hu wose nawa mlombeza Mnungu awavikile wadya waungaga wenye kwikala mwo mzi wa Yelusalemu. 3 Mwe mizi mituhu want'hu wa Izilaeli na walavant'hambiko na Walawi na wandima we Nyumba ya Mnungu na welekwa wa Selemani, wekalaga kwawe kwe mizi yawe wenye.

Aya nayo mazina ye vilongozi wa majimbo wekalaga Yelusalemu 4 Wamwenga mwa want'hu we dikabila dya Benjamini na Yuda wekalaga mwo mzi wa Yelusalemu. Wo lukolo lwa Yuda wekalaga mwo mzi wa Yelusalemu ni. Atahaya elekwe ni Uzia, uzia elekwe ni Zekalia, Zakalia elekwe ni Amalia, Amalia elekwe ni Shefatia, Shefatia elekwe ni Mahalaleli. Wose awa ni welekwa wa Pelesi.

5 Naho Maaseya elekwe ni Baluku, baluku elekwe ni Kolihoze. Na wakale wakwe watuhu ni hamwenga na Hazaya na Adaya na Yoyalibu na Zakalia ywe mp'huga ikulawa Shilo.

6 Welekwa wose wa Pelesi wekalaga mwo mzi wa Yelusalemu wandaga wagosi watowani wadahi magana mane na milongo mtandatu na mnane.

7 Want'hu wa lukolo lwa Benjamini wekalaga mwo mzi wa Yelusalemu ni Salu, mwana Meshulamu, mwezukuluwe ywa Yoedi. Na wakale wakwe watuhu ni hamwenga na Pedaya mwana Kolaya, Kolaya mwana Maaseya, Maaseya mwana Itieli, Itieli mwana Yeshaya. 8 Watuhu wandaga Gabi na Salai wandugu wa hagihi wa Salu. Uwazilo wawe wandaga magana kenda na milongo miidi na mnane. 9 Yoeli mwana Zikili niye andaga kilongozi ywawe Yuda naye mwana wa Hasenua andaga kilongozi ywa kaidi wo mzi.

10 Walava nt'hambiko wekalaga mzi wa Yelusalemu wandaga, Yedaya, mwana wa Yoalibu na Yakini,

11 Selaya mwana wa Hiilkia, mwana wa Meshulamu, Na wakale wakwe ni hamwenga na Sadoki mwana wa Melayoti, Meloti mwana wa Ahitubu uyo andaga mlavant'hiko mkulu ywe Nyumba ya Mnungu. 12 Want'hu awo hamwenga na ndugu zawe wadamanyaga ndima mwe Nyumba ya Mnungu, wandaga want'hu magana mnane na milongo miidi na mbili, hamwenga na awo kwandaga na Adaya, mwana Yelohamu, mwana wa Pelalia. Amisi mwana wa Zekalia, Zekalia mwana wa Pashuli, Pashuli mwana wa Makiya. 13 Naho kwandaga na ndugu zawe wakulu mwa wakale wawe wose kwa hamwenga wandaga want'hu magana maidi na milongo mine na mbili. Na mlava nt'hambiko mtuhu ekalaga yelusalemu ni Amasai, mwana wa Azaleli, mwana wa Ahazai, Uzia mwana wa Meshilemoti, Meshiloti mwana wa Imeli. 14 Kwandaga na wandugu zawe gana dimwenga na milongo miidi na mnane, wandaga watowani wadahi, mkulu ywawe andaga Zabidieli mwana Hagedolimu. 15 Walawi wekalaga mwo mzi wa Yelusalemu wandaga ni Shemaya elekwe ni Hashubu, Ashibu elekwe ni Azilikamu, Wakale wakwe wandaga ni Hashabia na Buni.

16 Shabetai na Yozabadi wandaga vilongozi wa Walawi, wandaga wakimalizi we ndima za kuse ye Nyumba ya Mnungu.

17 Matania mwana Mika na mwezukuluwe dya Zabidi na mwelekwa ywa Asafu alongozaga wakemi kwe Nyumba ya Mnungu wakakema mila ya kulombeza na kumtogola.

Bakubukia andaga mwambizi ywakwe, hamwenga na awo wandaga

Abida mwana Shamu mwana wa Galali mwelekwa ywa Yedutuni.

18 Walawi wose wekalaga mwo mzi ukukile wa Yelusalemu, wandaga magana maidi na milongo mnane na wane. 19 Wamizi we zink'hili wekalaga Yelusalemu wandaga, Akubu na Talimoni hamwenga na wandugu zawe wandaga wakamila Zink'hili wandaga gana dimwenga na milongo mfungate na waidi.

20 Want'hu watuhu wa Izilaeli, na walavant'hambiko na Walawi wekalaga mwe mizi ya Yuda, kila yumwenga apangilwagwa hant'hu hakwe. 21 Mna wandima we Nyumba ya Mnungu wekalaga mwo mzi wa Yelusalemu hant'hu hakwitangwa Ofeli wakakimailwa ni Ziha na Gishipa.

22 Kilongozi ywa Walawi ekalaga mwo mzi wa Yelusalemu andaga ni Uzi mwana Bani, Bani mwana wa Hashabia, Hashabia mwana wa Matania, Matania mwana Mika ywo lukolo lwa Asafu, wenk'wagwa ndima ya ukemi mwe Nyumba ya Mnungu. 23 Seuta alavaga sigilizi mwe mitendele ye zindima zawe na yadya nawakayaunga kwa kila zuwa.

24 Petahia mwana Meshezabedi ywo lukolo lwa Zela mwe dikabila dya Yuda, andaga mlongi ywe zimbuli zose za seuta kwa want'hu wa Yuda.

25 Want'hu wamwenga wekalaga mwe mizi hagihi ne zink'honde zawe, watuhu nawo we dikabila dya Yuda wekalaga Kiliati Aliba na Diboni na Yekabizeeli hamwenga ne zikaya zizunguluke. 26 Watuhu wekalaga mwo mzi wa Yeshua na Molada na Bet Peleti, 27 na Hasali Shuali na Beel Sheba hamwenga ne zikaya zikuwazunguluka mizi iyo . 28 Watuhu wekalaga mwe zikaya za Zikilagi na Mekona ne zikaya zikuwazunguluka. 29 Watuhu nawo wekalaga mwe mizi ya Enilimoni na Zola na Yalimuti, 30 na Zanoa na Adulamu hamwenga ne zikaya zikuwazunguluka mizi iyo na Lakishi na nk'honde ikuwazunguluka, no Mzi wa Azeka hamwenga ne zikaya zikuwazunguluka. Nuko kugamba want'hu wa Yuda wekalaga hagati ya kwa mwenye mzi mwa Beel Sheba na Mkoma mahanya ye dikolongo dya Hinomu.

31 Want'hu wa Benjamini wekalaga Geba na Mikimashi na Ai na Beteli ne zikaya zakwe, 32 na Anoti na Nobu na Anania, 33 Hazoli na Lama na Gitimu, 34 Hadidi, Seboimu na Nebalati, 35 Lodi na Ono na mwe dikolongo dya wakudamanya vint'hu vihengi.

36 Walawi wamwenga wakalaga Yuda wegalwagwa wakekale hamwenga na want'hu we dikabila dya Benjamini.