1 Niyo kwalaila nk'halalizi kwa want'hu, wagosi kwa wavele wakawakalaliza wandugu zawe Wayahudi. 2 Wamwenga wagambaga, "Kina mp'huga nk'hulu kwaivo chaunga nk'hande kidye kise kubanika."

3 Watuhu nao wagambaga, "Kiikiza nk'honde zetu za mizabibu ne zinyumba zetu kwa wagoli, vileke kipate nk'hande digumbo."

4 Watuhu nao walabilaga wakagamba, "Vaungwa kikakope matundu vileke kilihile kodi ya seuta mwe nk'honde zetu na mwe mizabibu yetu. 5 Mna suwe ni enga du Wayahudi watuhu, wana wetu ni enga wana wawe. Hata ivi chatigizwa kuwatenda wana wetu kunda watumwa. Wamwenga mwa wanakike wetu wanda kale watumwa. Hakina udahi wa kukindila mbuli ino kwaviya kihokigwa nk'honde zetu ni want'hu watuhu."

6 Nize nive kulabila kwawe naihiyagwa vitendese. 7 Niho nafanyanyaga kuwakanya vilongozi na wakulu hawagamba, "Mwawatoza matundu ya kusump'hula wandugu zenyu."

Netangaga mdugano wa want'hu wose kilonge mwe mbuli ino 8 hagamba, "Viligane no udahi kinanao, chandaga kikawagula naho wandugu zetu Wayahudi wandaga watagigwa kwa want'hu wa si nt'huhu. Mna hata ivi haluse mwawatenda wandugu zenyu kunda watumwa wenyu!" Aho niyo vilongozi wanyamala haweina dyo kuhitula.

9 Niyo nawagamba, "Mbuli mkudamanya hiyo yedi. Chaungwa kudamanya yakumwelela Mnungu ywetu na kudamanya yawagilwe. Kwa kutenda ivo wank'hondo wetu hi Wayahudi hawa kibele. 10 Naho, miye mwenye na wandugu zangu na wandima wangu neki wakopeshe wandugu zetu matundu na nk'hande. Naho hekiguhe chochose kikusump'hula. 11 Msunguze dielo idi muwavuzile zink'honde zawe ze mizabibu na ze mizeituni na nyumba zawe na matundu yakusump'hula, unga na mavuta ayo nandile hawatigizani."

12 Woho niyo wahitula wakagamba, "Nekiwavuzile naho hekiwatigize wakilihe chochose. Nekidamanye enga ivo ulongile." Nawetangaga walavant'hambiko na kuwatenda vilongozi wose waike kilapi ho undiilo wa walavant'hambiko kugamba nawa tende enga ivo walagane. 13 Naho nakung'unt'haga msipi wangu wa mwe kigudi niyo nagamba, "Ivi nivo Mnungu naamkungunt'he nyumba na viya ananvo yeyose heekukint'hiza lagano dyakwe, naatoigwe na kumfoseza mwe nyumba yakwe. Ivo naande hana kint'hu."

Want'hu wose niyo wazumila wakagamba, "Taile." Naho want'hu awo wamtunyaga Zumbe Mnungu. Want'hu niyo watenda enga ivo walagane.

14 Kukongela aho nasagulwe kunda kilongozi ywe isi ya Yuda, kwa lupisi lwa miyaka mlongo na mbili kukongela mwo mwaka wa milongo miidi mpaka mwo mwaka wa milongo mitatu na miidi yo useuta wa Atashata, hyadaga nk'hande naungagwa kwink'higwa enga kilongozi, hegu ndugu zangu hawatendaga ivo. 15 Vilongozi wanilongoele wandaga nt'wika kwa want'hu wakatigiza nk'hande na divai, na kuwaunga wawalihe vibesu milongo mine va masawa kila zuwa hata wandima wawe wawatigizaga want'hu. Mna miye hidamanye ivo, kwaviya namtunya Zumbe Mnungu. 16 Nehinda nakombatizaga kwa ndima ya uzesi we lukazi, naho hyakepatile nk'honde ya mnt'hu uyo adunduge kuliha. Hata wandima wangu wadamanyaga ndima kwa kukombatiza.

17 Kila zuwa, nawenk'haga nk'hande want'hu gana dimwenga na milongo mishano wakanda Wayahudi na wakulu naho kwandaga na want'hu wezile kulawa kwe isi zint'huhu kuchambiza. 18 Kila zuwa, nawenk'haga nk'hande want'hu awo, nawenk'haga na nyama ya jeku dimwenga na ngoto zedi mtandatu na nguku nyingi. Kila zuwa dya mlongo nalavaga divai ihengi. Mna namanyaga want'hu wana nt'wika nt'huhu, ivo hyaungaga maliho heye wagilwe kwangu.

19 Weye Mnungu ywangu nikumbukile uwedi wangu mwe kila kint'hu nidamanye kwa want'hu awa.