1 Mwe dizuwa dya milongo miidi na mine dyo mwezi wa mfungate, want'hu wa Izilaeli waduganaga, wakafunga na kuvala mavalo ya magunia na kukehaka luvumbi mwe mitwi yawe kulagisa kinyulu kwa wavu wawe wadamanye. 2 Mwo lupisi ulwo wandaga wakepagula hale na want'hu hiyo Wayahudi, wakimalaga na kweiila wavu wawe na wavu wa wakale wawe uwo wadamanyaga. 3 Wasomaga imiko ya Zumbe Mnungu kwa masaa matatu. Naho kwa masaa matatu matuhu wandaga wakakweiila na kumvika Zumbe Mnungu, Mnungu ywawe. 4 Nokunda na kilingo kwajili ya Walawi aaho wakimalaga Yeshua na Bani na Kadimieli na Shebania na Buni na Shelebia na Bani na Kenani. Wakamlombeza Zumbe Mnungu ywawe kwa izwi kulu.

5 Walawi awo ni Yeshua na Kadimieli na Bani na Hashabuea na Sherebia na Hodia na Shebania na Pesahia wawagambaga want'hu,

"Kimaleni mumtogole Zumbe Mnungu ywenyu.

Mtunyeni mazuwa yose.

Kila yumwenga aditunye zina dyakwe dikukile.

Hamwenga na kugamba haihali nt'hogola yoyose ya kimnt'hu ikudaha kumwelela."

6 Ezila niyo alombeza akagamba,

"Weye wikedu niwe Zumbe Mnungu,

ni weye utendile mbingu ne zint'hondo zose,

si na bahali na vose vimndani mwawe,

naho weye niwe ukuvink'ha ugima,

na watumigwa wose wa kwe mbingu wafika madi na wafunamiza mitwi yawe hasi na kukuvika weye."

7 Weye ni we Zumbe Mnungu umsagule Abulamu,

niyo wamlava kulawa Uli ya Wakalidayo,

naho kumsakanyila zina tuhu niyo etangwa Ibulahimu.

8 Wamuona kunda mhuwilwa kwako, mhuwilwa kwako,

niyo waika Ndagano naye,

na kumlagana kuwenk'ha welekwa wakwe isi ya Wakanaani,

na isi ya Wahiti

na isi ya Waamoli

na isi ya Wapelezi

na isi ya Wayebusi

na isi ya Wagiligashi,

inde isi yawe.

Nokukint'hiza kulagana kwako, kwaviya weye wi mhuwilwa.

9 "Wayaonaga masulumizo ya wakale wetu umwo wandaga mwe isi ya Misili,

naho weze wakulombeze wambizi mwe bahali ya Shamu, wawategelezaga.

10 Wadamanyaga vihungi na vilagiso mwa falao,

wandima wakwe wose na want'hu wose mwe isi yakwe,

kwaviya wamanyaga ivo wawasulumizaga wakale wetu.

Weye mwenye wakepatila nt'hunyo mpaka ivi dyelo."

11 Waipangaga ibahali ha meso hawe,

niyo woho wawombosa mgatigati mwe bahali hant'hu hanyaile.

Wawa duulaga Wamisili mwa mazi matali

enga iwe dizamile dikudidimila mwe bahali.

12 Nomsi nokuwalongoza kwa mnala wa vunde,

nekilo kuwalongoza kwa mnala wa moto vileke uwazangazile sila yo kombokela.

13 Kudya kwo mnima Sinai waseelaga kulawa kwe mbingu

na kulonga nawo,

niyo wawenk'ha malagizo yakuungwa, miko ya kindedi, na vihendo na sigilizi.

14 Kwa kwombokela Musa mndima ywako,

kuwahiniza kudimtoza dizuwa dikukile dya kuhumula na kuwenk'ha sigilizi, malagizo ne miko yako.

15 "Umwo wandaga na sala wawenk'haga nk'hande ikwitangwa mana kulawa kwe mbingu.

Umwo wandaga na nk'hilu wawenk'haga mazi kulawa mwo luwe.

Naho wawalagizaga waiguhe isi

walaganaga kuwenk'ha."

16 Mna wakale wetu niyo wanda na weduvi na kunda wank'hani,

walemelaga kutimila sigilizi zako.

17 Walemelaga kuzitimila naho wajala vihungi vose wadamanyaga kwawe,

wandaga weduvi na kukesaguila kilongozi

ywa kuwavuza kwo utumwa uko Misili.

Mna weye Zumbe Mnungu ukulekela masa,

weye una mbazi na lukunde hiyo mhufu ywa maya.

Mbazi zako hezikulisa huwalekile.

18 Hata weze wakedamanyile hili dya kadama niyo wagamba niye Mnungu ywawe awalavile mwe isi ya Misili,

wakutendelaga wiihi utendese weye Zumbe.

19 Kwaviya weye una mbazi zitendese huwalekile kuwalongoza kudya kwe dijangwa.

hwa uusaga mnala we divunde uwo wawalongozaga nomsi,

hegu mnala wo moto kuwazangazila nekilo.

20 Naho kuwenk'ha muye ywako ywedi ywa kuwalangiliza ni kihi chedi cho kudamanya,

niyo wakuwenk'ha nk'hande ikulawa kwe mbingu ikwitangwa mana na mazi yo kunywa.

21 Wawalelaga vedi mwe dijangwa kwa lupisi lwa miyaka milongo mine,

naho hawaswesaga chochose,

suke zawe hazasakalaga,

viga vawe navo havatutukaga.

22 Naho wawatendaga wawahume maseuta na want'hu wawe na si,

na isi, zihakane nawo.

Waihumaga isi ya Heshiboni uko alongozaga seuta Sihoni,

naho waihumaga isi ya Bashani uko alongozaga seuta Ogu.

23 Wawatendaga welekwa wawe wande wabindile wingi enga nt'hondo zo ulanga,

na kuwegala mwe isi

iyo alaganaga na wakale wawe kugamba naawenk'he.

24 Ivo, welekwa awo wezaga na kwikala mwe isi iyo,

wawahumaga wakaya we isi iyo,

niyo want'hu wawenk'ha udahi wa kuwatendela maseuta wa Kanaani,

na want'hu wawe, vovose ivo waungaga.

25 Waitahaga mizi ina gomela,

na kuiguha isi ina ulozo, mazumba yana ugoli,

masima yasimbigwe, na nk'honde za mizaituni na mizabibu

hamwenga ne miti ina matunda yabindile wingi,

wadyaga na kwiguta enga ivo waungaga,

na kuonela kinyemi uwedi wako.

26 "Mna hawandaga wahuwilwa kwako.

Wakulekaga ne miko yako,

naho wawakomaga walotezi awo wandaga wakawakanya vileke wakuuwiye weye.

Mna wakuhomola vitendese."

27 Ivo niyo wawagela mwo udahi wa wank'hondo wawe woho nawo wasulumizwagwa.

Mna wandaga mwe masulumizo ayo, wakuiilaga vileke uwambize,

weye niyo waweva kulawa kwe mbingu.

Naho kwa mbazi zako zitendese, wawegailaga vilongozi wa kuwakombola,

niyo wakombolwa kulawa mwa wank'hondo wawe.

28 Mna utondowazi wize upatikane wadamanyaga wavu naho,

weye nawe wawalekaga wank'hondo wawe wawekaile.

Hata ivo weze wakweiile na kukulombeza wawayokolaga

Uko kwe mbingu wawevaga nk'hanana zose.

Wawayokolaga kwa mbazi zitendese.

29 Wawakanyaga watimile imiko yako na sigilizi zako.

Mna kwa weduvi wawe walekaga kuitimila imiko yako,

hata uneva kwa kutoza miko yako kwamtenda mnt'hu ekale vedi.

woho wandaga wank'hani naho wadala walemelaga kutegeleza.

30 Wawafinyilizaga kwa miyaka mingi,

na kuwakanya mwe sila yo muye ywako kwa kombokela walotezi wako,

hata ivo hawawategeleze.

Ivo wawalekaga watahigwe ni si nt'huhu.

31 Hata ivo kwa mbazi zako zitendese, hwalekaga wabanike na kuwajala, kwaviya weye ni Zumbe Mnungu mta mbazi na uwedi.

32 "We Mnungu, Mnungu ywetu mkulu,

watisa kwa ludole lwako!

weye ywi mhuwilwa, kukint'hiza yadya ukilagane mwe ndagano yako.

Kukongela mwo lupisi umwo maseuta wa Asilia wakakisulumiza,

mpaka ivi dielo,kisulumizisa,

maseuta wetu, wakulu wetu, walavant'hambiko wetu, na walotezi wetu,

na wakale wetu, na want'hu wako wose,

kukongela mwo useuta wa seuta wa Asilia

mpaka dyelo,

kumbukila ivo kisulumizwe.

33 Hata ivo una uwagilwa wa kukisulumiza,

kwaviya weye ywi mhuwilwa hamwenga na kugamba suwe kinda wadamanyi wo wavu.

34 Maseuta wetu na wakulu wetu na walavant'hambiko wetu,

na wakale wetu,

hawatozaga sigilizi zako

hawatimile miko yako na makanyo yako uwenk'hile.

35 Hata umwo wandaga wakei mwo useuta wawe,

wakauonela kinyemi uwedi wako utendese,

mwe isi nk'hulu uwenk'hile ina ulozo,

hawaungile kukuvika na kuleka sila zawe ziihile.

36 Mna kaula kinda watumwa dielo, watumwa mwe isi uwenk'hile wakale wetu,

isi ina sanga yedi ikukink'ha ulozo.

37 Kwajili yo wavu wetu ugoli we isi ino waita kwa maseuta,

wadya uwegale wakitendela ivo wakuunga kwajili yo wavu wetu,

naho hata mifugwa yetu waitenda ivo wakuunga,

naivo kimwe makunt'ho makulu!"

38 Kwajili ya aya yose yalaile, suwe Waizilaeli chaika ndagano itogile kwa kuwandika na wakulu wetu, Walawi na walavant'hambiko waika kiwalo na uwona.