1 Umwo ize yomboke miezi mine, mwezi ukwitangwa Nisani, mwo mwaka wa milongo miidi wo useuta wa Atashasta, umwo lwandaga lupisi lwa kwigala divai hakwe, naiguhaga na kumwigaila. Seuta hanati anione handa na kinyulu hakwe hata zuwa dimwenga uku haoneka kunda na kinyulu kitendese. 2 Seuta Atashasta aniuzaga, "Togola, nii waoneka kunda na kinyulu, nawe hwi mnyonge? Nakuona weye hiyo mnyonge, mna naona una kinyulu mwo moyo wako."

Niho nogohesaga. 3 Mna niyo namhitula, "Seuta wikalise! Nii nisekunda na kinyulu, umwo mzi wa Yelusalemu umwo vili vikuta va wakale wangu usigala hewiina kint'hu naho zink'hili zokigwa pele?"

4 Niyo seuta Atashasta amhitula, "Haluse walombezai?"

Aho niyo namlombeza Mnungu ywa kwe mbingu mwo moyo wangu, 5 hamgamba seuta, "Uneva seuta anelelwa na miye na kuzumila kunilekela, nakulombeza niite kwe isi ya Yuda vileke hauzenge uhya mzi uwo wandaga ne vikuta va wakale wangu."

6 Seuta niyo aniuza, mkaziwe akanda kekela hagihi naye, "Nounde uko kwa mazuwa mengahi naho nouuye ini aha?" Niyo namgambila lupisi neniuuye. Seuta niyo azumila.

7 Akajika niyo namlombeza seuta hamgamba, "Uneva yakwelela, nalombeza unink'he baluwa niigale kwa vilongozi we nt'hendelo ya usweelo wa zuwa ng'ambu yo mto Efulate, vileke wanizumile nombokele mwe isi ya Yuda. 8 Naho nakulombeza unink'he baluwa iyo awandikilwe Asafu mwamizi ywe mbago ye kiseuta vileke anink'he miti yo kudamanyila mikimaila ye nk'hili ye digomela dye Nyumbaya Mnungu, na kwajili yo lukazi lwo mzi ne nyumba yangu umwo nenikale." Seuta anink'haga kila icho nalombeze kwaviya Mnungu amtendaga anizumile. 9 Seuta awasigiilaga wakulu we difyo dya watowani na wakugendeza zifalasi kiitanye. Nize niwabwiile wakulu we isi ya usweelo wa zuwa yo mto Efulate, nawenk'haga ibaluwa ya seuta.

10 Mna Sanibalati kulawa mzi wa Beti holoni, na Tobia kilongozi ywa Waamoni na mndima ywakwe, weze weve kugamba hiza vileke kuwatendela ayedi want'hu wa Izilaeli, woho hawelelwe ne mbuli iyo.

11 Nize nibule Yelusalemu niyo nekala uko kwa mazuwa matatu. 12 Umwo nekilo miyo nahalwaga na want'hu wageke du. Hyagambilag mnt'hu yeyose kiya Mnungu aikile mwo moyo wangu cho kuudamanyila mzi wa Yelusalemu.

13 Kilo iicho nafosaga kwombokela kwe nk'hili ya kwe Dikolongo niyo nombokela kwe disima dikwitangwa Dizoka mpaka kwe nk'hili ye Nt'hagata, na kululaula Lukazi lo mzi wa Yelusalemu ulo lwandile lumoka hamwenga ne zink'hili zakwe izo zandile zokigwa. 14 Niyo naita mpaka kwe nk'hili ya nc'hoko na kwe dikawa dya seuta. Mna idya imp'hunda naigendezaga hayadahaga komboka kwajili ye kilundo cha mank'halank'hala. 15 Mwo lupisi lwa nekilo, nombokelaga mwe Dikolongo dyo mto Kidiloni na kulaula lukazi. Nauyaga naho ne sila iidya nezaga nayo kombokela kwe Nk'hili ya kwe Dikolongo. 16 Wakulu hawamanyaga hant'hu naitile hegu icho nadamanye. Naho hya wagambile Wayahudi, hegu walavant'hambiko hegu vilongozi na wakulu, hata want'hu wakuunga wadamanye ndima.

17 Niyo nawagamba, "Togoleni mwaona makunt'ho kinanayo kugamba mzi wa Yelusalemu unda mahame du, naho zink'hili zakwe zokigwa pele! Haluse kiteni kikazenge naho lukazi lwo mzi wa Yelusalemu veleke kisekunda na soni naho." 18 Naho nawagambilaga ivo Mnungu andile hamwenga na miye na kunidamanyila uwedi wakwe, na ivo seuta anigambilaga. Woho weze weve ayo, wagambaga, "Ni vedi, kikongeni ndima ya uzesi." Ivo niyo wakeika lumwe kwa ndima iyo iyedi.

19 Mna Sani balati na Tobia, na Mwalabu akwitangwa Geshemu weze weve mbuli iyo, wakisekaga na kukibela wakagamba, "Ni kint'hu chani iki mkudamanya? Togoleni mwaunga msaguke kwa seuta?"

20 Niyo nawahitula, "Mnungu ywa kwe mbingu naachambize kidahe kuidamanya indima ino. Suwe wandima wakwe nekikonge uzesi. Mna nyuwe homnde na ukipe wowose hegu uwagilwa hegu nk'humbukila mwo mzi wa Yelusalemu?"