1 Aho ndima yo uzesi wo lukazi ize yajike nagelaga zinyivi, niyo naika wamizi we zink'hili, wakemi na Walawi watuhu nawo nawenk'haga ndima iyo waungwagwa wadamanye. 2 Nasagulaga want'hu waidi walongoze Yelusalemu awo Hanani ndugu ywangu na Hanania uyo andaga mkulu ywe digomela mwe Yelusalemu kwaviya andaga mnt'hu mhuilwa naho akumvika Mnungu, hakwandaga na mtuhu enga yehe. 3 Niyo nawagamba, "Zink'hili za Yelusalemu zisekukomolwa kilo chose mpaka zuwa dikakwela. Aho wamizi wakanda wakei kuhalawa, zink'hili zose zivugalwe ne mihindo yakwe. Saguleni wamizi mwa wakaya wa Yelusalemu, kila yumwenga ande hant'hu hakwe watuhu nawo wamile hagihi ne zinyumba zawe."

4 Mzi wa Yelusalemu wandaga mkulu, mna wakaya wakwe wandaga wageke naho zinyumba zakwe zandaga zikei kuzengigwa. 5 Mnungu aikaga mwo moyo wangu kuunga kuwaduganya want'hu na vilongozi vileke kimanye nk'holo zawe na kupata kina mazina ya want'hu wauiye kulawa kwo utahigwa aho nk'hongo. Naho want'hu awa nawo wawandikwe mndani mwakwe.

6 Wadya wandaga mwo utumwa kudya Babeli, wauyaga mwo mzi wa Yelusalemu na mwe isi ya Yuda, kila yumwenga auyaga mwe kaya yakwe. Nk'holo zawe zandaga zikekala mwe isi za watakwiza uko Babeli kukongela mwo useuta wa Nebukaduleza uko awaguhaga watahigwa. 7 Weze wauye walongozagwa na Zelubabeli na Yoshua na Nehemia na Uzia na Laamia na Nahamani na Modekai na Bilishani na Misipeleti na Bigivai na Nehumu na Baana.

Ulu nulo ludongo lwe zink'holo za Izilaeli zauyaga kulawa kwo utumwa.

8 Lukolo lwa Paloshi wandaga alufu mbili na gana dimwenga na milongo mfungate na waidi, 9 lukolo lwa Shefatia magana matatu na milongo mfungate na waidi, 10 lukolo lwa Ala magana mtandatu na milongo mishano na waidi, 11 lukolo lwa Pahati Mmoabu awo welekwa wa Yoshua na Yoabu alufu mbili na milongo mnane na gana dimwenga na mnane, 12 lukolo lwa Elamu alufu imwenga na magana maidi na milongo mishano na wane, 13 lukolo lwa Zatu, alufu mnane na magana mane na milongo mishano, 14 lukolo lwa Zakai magana mfungate na milongo mtandatu, 15 lukolo lwa Binui magana mtandatu na milongo mine na mnane, 16 lukolo lwa Bebai magana mtandatu na milongo miidi na wane, 17 lukolo lwa Azigadi, alufu mbili na milongo magana matatu na milongo miidi na waidi, 18 lukolo lwa Adonikamu magana mtandatu na milongo mtandatu na mfungate, 19 lukolo lwa Bigivai alufu mbili na milongo mtandatu na mfungate, 20 lukolo lwa Adini magana mtandatu na milongo mishano na washano, 21 lukolo lwa Ateli awo iviya iviya lwetangwa Hezikia, milongo kenda na mnane, 22 lukolo lwa Hashumu magana matatu na milongo miidi na mnane, 23 lukolo lwa Bezai magana matatu na milongo miidi na wane, 24 lukolo lwa Halifu gana dimwenga na mlongo umwenga na waidi, 25 lukolo lwa Gibeoni milongo kenda na mishano. 26 Na want'hu we mizi mituhu wauyaga. Wa mzi wa Betelehemu na Netofa, gana dimwenga na milongo mnane na wane, 27 want'hu wo mzi wa Anatoti, gana dimwenga na milongo miidi na mnane, 28 want'hu wo mzi wa Bet Azimaweti, milongo mine na waidi, 29 want'hu wo mzi wa Kiliati Yealimu na Kefila na Beeloti, magana mfungate na milongo mine na watatu, 30 want'hu wo mzi wa Lama na Geba, magana mtandatu na milongo miidi na yumwenga, 31 want'hu wo mzi wa mikimashi gana dimwenga na milongo miidi na waidi, 32 want'hu wo mzi wa Beteli na Ai gana dimwenga na milongo miidi na watatu, 33 want'hu wo mzi mtuhu wa Nebo milongo mishano na waidi, 34 want'hu wo mzi mtuhu wa Elamu, alufu imwenga na magana maidi na milongo mishano na wane, 35 want'hu wo mzi wa Halimu, magana matatu na milongo waidi, 36 want'hu wo mzi wa Yeliko, magana matatu na milongo mine na washano, 37 want'hu wo mzi wa Lodi na Hadidi na Ono, magana mfungate na milongo miidi na umwenga, 38 want'hu mzi wa Senaa, alufu nt'hatu na magana kenda na milongo mitatu.

39 Ulu nulo ludongo lwa walavant'hambiko wauyaga kulawa kwo utahigwa. Walavant'hambiko wo lukolo lwa Yedaya, wandaga wa cheleko cha Yeshua magana kenda na mfungate na watatu, 40 walavant'hambiko wo lukolo lwa Imeli, alufu imwenga na milongo mishano na waidi, 41 walavant'hambiko wo lukolo lwa Pashuli, alufu imwenga na magana maidi na milongo mine na mfungate, 42 walavant'hambiko wo lukolo lwa Halimu, alufu imwenga na mlongo umwenga na mfungate, 43 Walawi wauyaga kulawa mwo utahigwa wandaga ni kulawa mwo lukolo lwa Yeshua na Kadimieli welekwa wa Hodavia, wandaga milongo mfungate na wane. 44 Wakemi awo welekwa wa Asafu wandaga gana dimwenga na milongo mine na mnane. 45 Wamizi we Nyumba ya Mnungu kulawa mwo welekwa wa Shalumu na Ateli na Talmoni na Akubu na Hatita na Shobai wandaga gana dimwenga na milongo mitatu na mnane.

46 Nk'holo za wandima we Nyumba ya Mnungu wauyaga kulawa mwo utahigwa zandaga ni za Ziha na Hasafa na Tabaoti, 47 lukolo lwa Kelosi na Siaha na Padoni, 48 lukolo lwa Lebana na Hagaba na Shalimai, 49 lukolo lwa Hanani na Gideli na Gahali, 50 lukolo lwa Leaya na Lesini na Nekoda, 51 lukolo lwa Gazamu na Uza na Pasea, 52 lukolo lwa Besai na Meunimu na Nefushesimu, 53 lukolo lwa Bakubuki na Hakufa na Halihuli, 54 lukolo lwa Basiluti na na lukolo lwa Mehida na na lukolo lwa Halishu, 55 lukolo lwa Balikosi na na lukolo lwa Sisela na na lukolo lwa Tema, 56 lukolo lwa Nezia na lukolo lwa Hatifa.

57 Nk'holo za wandima wa seuta Selemani wauyaga kulawa mwo utumwa zandaga za lukolo lwa Sotai na lukolo lwa Sofeleti na lukolo lwa Pelida, 58 na lukolo lwa Yaala na lukolo lwa Dalikoni na lukolo lwa Gideli, 59 na lukolo lwa Shefatia na lukolo lwa Hatili na lukolo lwa Pokeleti, Hasebaimu na lukolo lwa Amoni.

60 Ivo wandima wose we Nyumba ank'hulu ya Mnungu na welekwa wa wandima wa Selemani, wauyaga kulawa mwo utumwa wandaga magana matatu na milongo kenda na waidi.

61 Mizi ya Teli Mela na wa Teli Halishu, na wa Kelubu na wa Adoni na wa Imeli, mna hawadahaga kukelavanya kugamba wandaga welekwa wa Izilaeli.

62 Welekwa wa Delaya na Tobia na wa Nekoda, nawanda want'hu magana mtandatu na milongo mine na waidi. 63 Welekwa wakutimila wauyaga kulawa mwo utumwa nk'holo zawe hazaonekaga. Lukolo lwa Hobaya na wa Hakozi na wa Balizilai uyo andaga kalomba mwana Balizilai Mgileadi, na niyo aguha zina dya lukolo ulo.

64 Awo wazungulaga mazina yawe mwa watuhu wawandikwagwa mwe nk'humbukila ye zink'holo, mna lukolo lwawe halwandile umo, kwaivo hawazumilagwa kuikwa mwo undima wo ulavant'hambiko. 65 Kilongozi amgambaga kugamba hawakuzumilwa kudya nk'hande ikukile, mpaka mlava nt'hambiko mta ulamuzi wa Ulimu na Thumuni eze.

66 Want'hu wose wauyaga kulawa mwo utahigwa wandaga alufu milongo mine na waidi na magana matatu na milongo mtandatu. 67 Kwandaga na wandima wagosi na wavele alufu mfungate na magana matatu na milongo mitatu na mfungate. Naho kwandaga na wakemi wagosi na wavele wose wandaga magana maidi na milongo mine na shano. 68 Kwandaga falasi magana mfungate milongo mitatu na mtandatu na mph'unda falasi magana maidi na milongo mine na shano, 69 naho kwanda ngamia magana mane na milongo mitatu na shano na mp'hunda alufu mtandatu na magana mfungate na milongo miidi.

70 Wamwenga mwe vilongozi we zink'holo walavaga vint'hu kwajili ye ndima yo kuzenga uhya Nyumba ya Mnungu. Miye Nehemia mkulu ywo mkoa nalavaga kilo mnane za zahabu na nyiga milongo mishano na mavalo ya walava nt'hambiko magana mashano na milongo mitatu. 71 Naho wamwenga mwa wakulu we zink'holo walavaga kilo gana dimwenga na milongo mtandatu na mnane ya zahabu, na kilo alufu imwenga na magana maidi na milongo mishano ya masawa. 72 Vint'hu vose vilavigwe na want'hu watuhu wose vandaga ni kilo gana dimwenga na milongo mtandatu na mnane za zahabu na kilo gana dimwenga na milongo mine ya masawa na mavalo ya walavant'hambiko milongo mtandatu na mfungate.

73 Ivo walavant'hambiko na Walawi na wamizi we Nyumba ya Mnungu, na wakemi na want'hu watuhu na wandima we Nyumba ya Mnungu na want'hu wose wa Izilaeli wekalaga mwe mizi yawe.