1 Ukutimila ni ludongo lwa walavant'hambiko na Walawi wauyaga kulawa kwo utahigwa hamwenga na Zelubabeli mwana Shealtieli na mlavant'hambiko mkulu Yeshua.

Walavant'hambiko awa ni Selaya, Yelemia na Ezila, 2 Amalia, Maluki, Hatushi 3 Shekania, Lehumu na Melemoti, 4 Ido, Ginetoni na Abiya, 5 Miyamini, Maadia na Biligai, 6 Shemaya, Yoyalibu na Yedaya, 7 Salu na Amoki na Hilikia na Yedaya, awo wandaga ni vilongozi wa walavant'hambiko na wandugu zawe umwo Yeshua andaga mlavant'hambiko mkulu.

8 Lukolo lwa Walawi wauiye ni hamwenga na Yeshua na Binui na Kadimieli na Shelebia na Yuda na Matania wandaga wakimalizi wo ukemi we nt'hogola wakanda na wanduguze. 9 Na awo Bakukia na Uno na Walawi weyawe, wakimalaga hagihi na woho wakazumila mwo ukemi.

10 Yoshua amwelekaga Yoakimu na Yoakimu amwelekaga Eliashibu na Eliashibu amwelekaga Yoyada, 11 Yoyada amwelekaga Yonasani na Yonasani amwelekaga Yadua.

12 Yoakimu eze ande mlavant'hambiko mkulu, walavant'hambiko wakutimila wandaga wakulu we zink'holo zawe, Uyo Melaya wa lukolo lwa Selaya na Hanania kulawa mwo lukolo lwa Yelemia 13 Meshulam kulawa mwo lukolo lwa Ezila, Yehohanani kulawa mwo lukolo lwa Amalia, 14 Yonasani kulawa mwo lukolo lwa Maluki, Yosefu kulawa mwo lukolo lwa Shebania, 15 Adina kulawa mwo lukolo lwa Halimu, Hekai kulawa mwo lukolo lwa Melayoti, 16 Zekalia kulawa mwo lukolo lwa Ido, Meshulamu kulawa mwo lukolo lwa Ginetoni, 17 Zikli kulawa mwo lukolo lwa Abiya, naho kwandaga na kilongozi kulawa mwo lukolo lwa Miniamini; Piltai kulawa mwo lukolo lwa Moadia, 18 Shamua kulawa mwo lukolo lwa Biligai, Yehonatani kulawa mwo lukolo lwa Shemaya, 19 Matenai kulawa mwo lukolo lwa Yoalibu, Uzi kulawa mwo lukolo lwa Yedaya, 20 Kalai kulawa mwo lukolo lwa Salai, Ebeli kulawa mwo lukolo lwa Amoki, 21 Heshabia kulawa mwo lukolo lwa Hilikia, Netaneli, kulawa mwo lukolo lwa Yedaia,

22 Umwo Eliashibu na Yoyada na Yohanani na Yadua wakulu wa walavant'hambiko kwandaga na ludongo lwa wakulu wa mp'huga za walava nt'hambiko na Walawi, ludongo ulwo lwaheelaga mwo ulongozi wa seuta Dalio. 23 Wakulu we zimp'huga za Walawi kwavovose wawandikwagwa mwe kitabu che nk'humbukila mpaka mwo lupisi lwa Yohasani mwezukuluwe ywa Eliashibu.

24 Awa nawo vilongozi we zink'holo naho welekwa wa Lawi: Hashabia na Shelebia na Yoshua mwana Kadimieli, na watuhu wakepangile mwe mafyo maidi, mafyo ayo yandaga yakasinyana umwo yakamtogola Mnungu na kumtunya kwa kuhokelana, wadamanyaga ivo viligane ne miko ya seuta Daudi mnt'hu ywa Mnungu.

25 Wamizi we Nyumba ya Mnungu wandaga: Matanuia na Bakibukia na Obadia na Meshulamu na Talimoni na Akubi, naho wandaga wamizi we vyumba vo kuikila vint'hu hadya he Zink'hili. 26 Want'hu awo wekalaga mwo lupisi lwa Yoakimu mwana Yoshua na mwezukuluwe Yosadaki naho mwo lupisi lwa Nehemia andaga mkulu we isi, na hata mwo lupisi lwa Ezila mlavant'hambiko mhinizi ywe Miko.

27 Niyo mwo lupisi lwo kuluvikila lukazi lwa Yelusalemu, Walawi wegalwagwa kulawa kila hant'hu aho wekalaga weze Yelusalemu kunda hamwenga mwe kinyemi cho kuvikila lukazi, wakeme mila ya nt'hogola kwa kutowa mazeze na lupatu na vilangu. 28 Welekwa wa wakemi wakeduganyaga kulawa mwe nt'hendelo zose za Yelusalemu na kaya zakwe za Wanetofati, 29 naho kulawa Beti Giligali, nt'hendelo ya Geba na Azamaweti kwaviya wakemi wakezengelaga kaya mnk'handa mwa Yelusalemu. 30 Walavant'hambiko na Walawi wakekukiza kwajili ya kumvika Mnungu hamwenga na kuwakukiza awant'hu ne zink'hili no lukazi.

31 Nehiwaduganya vilongozi wose wa Yuda mnanga mwo lukazi na kuika kunda vilongozi wa mafyo maidi makulu ya wakemi kuuzunguluka mzi kwa kinyemi, fyo dya nk'hongo nedihinga kulume yo lukazi na tuhu dihinga mwe Nk'hili ye Nt'hagata. 32 Wakemi awo watimilwagwa ni Hoshaya akanda ne nusu ye vilongozi wa Yuda, 33 kunyuma kwawe watimilwagwa ni walavant'hambiko wandaga wakatowa magunda awo wakina Uzia na Ezila na Meshulamu, 34 na Yuda na Benjamini na Shemaya na Yelemia. 35 Watimilwagwa ni walavant'hambiko wakina Zekalia, mwana wa Yonasani, mwezukuluwe dya Shemaya. Wakale wawe ni hamwenga na Matania na Mikaya na Zakuri wo lukolo lwa Asafu. 36 Kunyuma kwakwe atimilwagwa ni wanduguze wo lukolo lwa Zekalia awo wakina, Shemaya na Azaleli na Milalai na Gilalai na Maai na Netanieli na Yuda na Hanani. Awo wose wandaga wakatowa vint'hu va kukemela enga viya andaga akatowa seuta Daudi mndima ywa Mnungu. Ezila Mhinizi ywe Miko niye alongozaga difyo idyo. 37 Mwe Nk'hili ye Zinc'hoko wakwelaga mwe vibo kuhinga kwo mzi wa Daudi, wajink'haga Nyumba ye kiseuta ya Daudi na kuuuya mpaka kwo lukazi kwe Nk'hili ya Mazi ulailo wa zuwa.

38 Fyo tuhu dikemile ukemi we nt'hogola na kumtunya nedihinga nt'hendelo ya kumoso mnanga mwe lukazi. Miye natimilana ne difyo idi hamwenga ne nusu ya want'hu. Chombokaga mwo Mnala we Nunda mpaka kwe lukazi luzangalamke. 39 Na kulawa aaho chombokaga kwe nk'hili ya Efulaimu ne nk'hili ya Yeshana, ne Nk'hili ya Samaki, no Mnala wa Hananeli na Mnala wa Gana dimwenga mpaka kwe Nk'hili ya Ngoto. Chabindaga utafi wetu hagihi ne Nk'hili ya Wamizi.

40 Ivo mafyo yose maidi yandaga yakakema ukemi we nt'hogola yakimalaga mwe Nyumba ank'hulu ya Mnungu hamwenga na miye ne nusu ye vilongozi. 41 Iviya iviya walavant'hambiko wandile wakatoa magunda awo wakina Elikana na Maaseya, Miniamini, Mikaya, Eliehoenai, Zekalia na Hanania, 42 awo watimilagwa na Maaseya na Shemaya, Eleazali, Uzi, Yehohanani, Makiya, Elamu na Ezeli. Wakemi wakemaga wakalongozwa na Yezilahia naho nawakakema kwa izwi kulu. 43 Zuwa idyo want'hu walavaga nt'hambiko zitendese na kunda na kinyemi kwaviya Mnungu awatendaga wande na kinyemi kikulu. Naho wavele na wana wose wandaga na kinyemi na kutoa nk'helegele za kinyemi. Maizwi yao kulawa mwo mzi wa Yelusalemu yagendesaga hale.

44 Mwo lupisi ludya wasagulwagwa wakimalizi we vyumba vo kuikila malavokwajili ye Nyumba ya Mnungu, yakanda ni hamwenga na imwenga ya mlongo, ulozo wa nk'hongona ulozo wa kila mwaka. Want'hu awa nawo wandaga nd ndima yo kuvidugunya vint'hu ivo kulawa mwe zink'honde zimgihi na mizi ihengi, malavo kwajili ya walavant'hambiko,na Walawi viligane ne Miko. Want'hu wose wa Yuda welelwagwa kwe zindima zose zandile zikadamanywa ni walavant'hambiko, 45 umwo wandile wakadamanya vint'hu va kuwatenda zumilwe kumvika Mnungu enga ivo wadamanye wakemi na wamizi we nk'hili viligane na malagizo yaikagwa ni seuta Daudi na seuta Selemani uyo mwanawe. 46 Kukongela mwo lupisi lwa seuta Daudi na mkemi Asafu, wakemi walongozaga ukemi wa kumtunya na nt'hogola kwa Mnungu. 47 Mwo lupisi lwa Zulubabeli na Nehemia want'hu wose wa Izilaeli walavaga mageleko ya kwambiza wakemi na wamizi we nk'hili, naho want'hu niyo walava mageleko yawe yakukile kwa walawi, walawi nao waikaga hank'handa fungu dya mlongo na kuwenk'ha walavant'hambiko awo welekwa wa Haluni.