1 Ywa nk'hongo kugela kiwalo andaga Nehemia mkulu ywo mkowa, niyo atimila Hakalila na Sedekia. 2 Walavant'hambiko wageile kiwalo mwe ndagano iyo ni, 3 Selaya, Uzia na Yelemia, 4 Pashuli, Amalia na Makiya, 5 Hatushi, Shebania na Maluki,

Halimu, Melemothi na, Obadia, 6 Danieli, Ginesoni na Baluku, 7 Meshulamu, Abiya na Miyamini, 8 Maazia, Biligai na Shemaya.

9 Naho mazina ya walawi ni aya. Yeshua mwana wa Azania na Binui ywo lukolo lwa Henadadi na Kadimieli, 10 walawi watuhu ni Shebania, Hodia, Kelita Pelaya na Hanani, 11 Mika, Rehobu na Hashabia, 12 Zakuli, Shelebia na Shebania, 13 Hodia, Bani na Beninu. 14 Aya nayo mazina ye vilongozi wa Waizilaeli wageile viwalo, Paloshi na Pahati uyo ywe dikabila dya Moabu, Elamu na Zatu na Bani. 15 Buni, Azigadi na Bebai, 16 Adoniya, Bigwai na Adini, 17 Ateli, Hezekia, Azuli, 18 Hodia, Hashumu na Bezai, 19 Halifu, Anatoti na Nebai, 20 Magipiashi, Meshulamu na Hezili, 21 Meshezabeli, Sadoki na Yadua, 22 Pelatia, Hanani na Anaya, 23 Hoshea, Hanania na Hashubu, 24 Haloheshi, Piliha na Shobeki, 25 Lehumu, Hashabina na Maaseya, 26 Ahia, Hanani na Anani, 27 Maluki, Halimu na Baana.

28 Suwe wose want'hu wa Izilaeli, walavant'hambiko na Walawi, wamizi we Nyumba ya Mnungu na wakemi na wandima we Nyumba ya Mnungu na want'hu wose wakeikile hale na want'hu hiyo Wayahudi, vileke wazitoze sigilizi za Mnungu, wakanda hamwenga na wavele wawe na wana wawe na wose wakudaha kukombaganya, 29 chalungana na wandugu zetu na wakulu wetu mwe kilapi. Hakina timile kilapi iki nekiligitwe, naho chaika kilapi kugamba nekikale kwa kutimila sigilizi za Mnungu izo akisigiile kwombokela Musa mndima ywakwe. Naho nekizumile yose ayo Mnungu, Mnungu ywetu akisigile.

30 Wana kike wetu hekiwaloze mwa want'hu wa si ino hegu wana wetu hawalombe kwawe.

31 Uneva want'hu wa si nt'huhu wanegala nk'hande hegu chochose cha kutaga mwe dizuwa dyo kuhumula hegu zuwa dyodyose dikukile, suwe hekigule kwawe. Kila ikabula mwaka wa mfungate, hekiilime isanga naho kila mtigizo nouuswe.

32 Chakeikila sigilizi kugamba kwa mwaka nekilave gilamu ya masawa kwaajili ye Nyumba ank'hulu ya Mnungu.

33 Iviya iviya nekilave, mikate ikukile na malavo na unga kila zuwa na malavo yo kokwa na malavo ya zuwa dyo kuhumula, mazuwa ye kinyemi cho mwandamo wo mnenge na malavo kwajili ya mazuwa matuhu ye kinyemi, ziikigwe, na vint'hu vituhu vikukile, malavo ya kuusa wavu vileke kuwadamanyila mwivano want'hu wa Izilaeli, na kila kikuungwa mwe Nyumba ya Mnungu ywetu.

34 Suwe wose na walavant'hambiko na Walawi Nekitowe simbi kila mwaka vileke kisagule lukolo nolwigale nk'huni za kokela nt'hambiko mwe kilingo cha Zumbe Mnungu viligane ne sigilizi.

35 Chazumila kwigala kila mwaka ulozo wetu wa nk'hongo ya matunda ya kila miti kwe Nyumba ya Munungu.

36 Nekigale kila nt'hulasasu ywe kilume, mwe kaya zetu, mwe Nyumba ya Mnungu ywetu kwa walavant'hambiko wakudamanya ndima uumwo vileke akaikwe kwajili ya Mnungu. Naho nekigale kila mwaka nt'hulasasu ye ng'ombe na mbuzi na ngoto zetu,Viligane na ivo iwandikwe sigilizi.

37 Kila unga wa nk'hongo na malavo yetu na matunda ye miti na divai na mavuta nekiviigale kwa mlavant'hambiko mwe Nyumba ya Mnungu ywetu. Naho nekigale fungu dyo mlongo mwo ulozo wetu kwa Walawi, kwaviya ni woho wakudamanya ndima na kuduganya fungu dyo mlongo mwe zikaya zetu. 38 Mlavant'hambiko mwelekwa ywa Haluni naande hamwenga na Walawi wakahokela fungu dyo mlongo. Akajika Walawi nawegale imwenga ya mlongo ye difungu idyo dyo mlongo dilavigwe mwe vyumba va kuikila vint'hu mwe Nyumba ya Mnungu. 39 Want'hu wa Izilaeli na Walawi nawayegale malavo ya unga na divai na mavuta ye mizeituni mwe vyumba umwo vikuikwa vint'hu vikukile. Na aho walavant'hambiko we mwo luzo na wamizi we Nyumba ya Mnungu na wakemi wakwikala.

"Naho mazuwa yose nekiikaulise Nyumba ya Mnungu ywetu."