1 Mwo lupisi Ezila umwo akalombeza na kweiila, akeduulaga hasi he Nyumba ank'hulu ya Mnungu, fyo kulu dya want'hu wa Izilaeli wagosi kwa wavele hamwenga na wana wakeduganyaga hagihi naye wamzunguluka wakaila kwa usungu. 2 Niho Shekania mwana Yehieli ywa lukolo lwa Elamu, amgambaga Ezila, "Kiswesa uhuwilwa kwa Mnungu kwa kulomba wavele hi Wayahudi we isi ino ikizunguke, mna hata ivo kuna kawiilo kwajili ya want'hu wa Izilaeli. 3 Kwaivo kidamanye ndagano na Mnungu ywetu, kilekane na wavele awa na wana wawe, kwa kutimila ulangilizi wako na wadya wakutimila sigilizi za Mnungu. Yose yadamanywe kwa kutimila sigilizi ya Zumbe. 4 Inuka, mbuli ino imwako, suwe naswe kihamwenga na weye. Keink'he moyo kwa kutenda ivo."

5 Ivo Ezila enukaga na kukonga kuwatenda walavant'hambiko na vilongozi na Walawi na Waizilaeli wose wekelise kugamba nawatende enga ivo ilongigwe, nawo niyo wazumilana kwa kilapi. 6 Niyo Ezila ahalawa mwe Nyumba ya Mnungu, na kuita kaya kwa Yehohanani mwana Eliashibu. Ezila andaga uko haheina kudya chochose hegu kunywa mazi, kwaviya agendeelaga kuhongeza kwa kuswesa uhuwilwa kwa want'hu walawaga uko wasamizilagwa.

7 Nokubwelekezwa kila hant'hu mwe isi ya Yuda na mwo mzi wa Yelusalemu, kwa wose walawaga uko wasamizilagwa kugamba wadugane Yelusalemu. 8 Inanda mnt'hu naaswese kubula kwa mazuwa matatu, viligane na sigilizi ilavigwe na vilongozi, ugoli wakwe wose nouguhigwe, yehe mwenye naye naalemelwe kukelunga na want'hu walawaga uko wasamizilagwa.

9 Mwa mazuwa ayo matatu, mwe dizuwa dya milongo miidi yo mwezi wa kenda, want'hu wose wekale mwe isi ya Yuda na Benjamini wabulaga Yelusalemu na kuduganyika mwe kiwasa che Nyumba ya Mnungu. Want'hu wose wandaga kwajili ye mbuli iyo wetangilwe na kwaviya nokukanya fula.

10 Niyo mlavant'hambiko Ezila akimala halongole ha want'hu, niyo awagamba, "Hamwandaga wahuwilwa kwa kulomba wavele hi Wayahudi, na ivo muitenda Izilaeli kundilisa na masa. 11 Haluse kweiileni kwa Zumbe Mnungu ywa wakale wenyu mkadamanye yadya yakumwelela. ikaleni hale na wakaya we isi ino na kuwasa wavele wenyu hi Wayahudi."

12 Want'hu wose wahitulaga kwa hamwenga, "Ni vedi! Vaungwa kidamanye enga ivo ukulonga." 13 Mna niyo wagendeela kulonga, "Want'hu wabindaingi naho fula yanyelesa. Hekidahe kugendeela kukimala aha he kiwasa, na ino hiyo mbuli ikuunga isile kwa zuwa dimwenga hegu mazuwa maidi, kwaviya kidamanyisa wavu mwe mbuli ino. 14 Nevinde vedi wakulu wetu wasigale Yelusalemu kwa mbuli ino kwajili ya want'hu wose. Kila mnt'hu alombaga mvele hi Myahudi eze kwa lupisi lwakwe na vilongozi na walavant'hambiko wa mzi wakwe, kubula aho maya yatendese ya Mnungu nayande yausigwa mwetu." 15 Mzungu uno nouzumilwa, mna niyo wahigwa ni Yonasani mwana Asaheli na Yazeya mwana Tikwa na Meshulamu uyo akwitangwa Mlawi Shebetai.

16 Want'hu wose wauyaga kulawa uko wasamizilwagwa wazumilaga mzungu uno, kwaivo mlavant'hambiko Ezila awasagulaga wagosi wandaga wakulu we zimp'huga, yumweyumwe kulawa mwe kila lukolo niyo awawandika mazina yawe. Mwe dizuwa dya nk'hongo dyo mwezi wa mlongo, want'hu awo wakongaga kuipelemba imbuli iyo. 17 Mwe dizuwa dya nk'hongo dyo mwezi wa nk'hongo, wandaga wabinda kale upelembi wawe mwe mbuli ya wadya walombaga wavele hi Wayahudi.

18 Uno nuwo uwazilo wa wagosi walombaga wavele hi Wayahudi, Walavant'hambiko viligane na nk'holo zawe. Lukolo lwa Yoshua mwana Yosadaki na wanduguze, Maaseya na Eliazali na Yalibu na Gedalia. 19 Awo waikaga kilapi kuwaleka wavele wawe, na kulava ndolome kwajili ya malavo yawe ya masa yawe.

20 Walavant'hambiko wa lukolo lwa Imeli

ni Hanani na Zebedia.

21 Kulawa mwo lukolo lwa Halimu ni Maaseya na Elia na Shemaya na Yehieli na Uzia.

22 Kulawa mwo lukolo lwa Pashuli ni Eliehoenai na Maaseya na Ishmaeli na Netaneli na Yozabadi na Elasa.

23 Kulawa mwo lukolo lwa Lawi ni Yozabadi na Shimei na Kelaya uyo etangwagwa Kelita, na Petahia na Yuda na Eliezeli.

24 Walombaga wavele hi Wayahudi kulawa mwa wakemi ni

Eliashibu.

Kulawa mwa Wamizi we nk'hili ye Nyumba ank'hulu ya Mnungu ni

Shalumu, na Telemu na Uli.

25 Mwa want'hu watuhu wa Izilaeli

Kulawa mwo lukolo lwa Paloshi ni

Lamia na Izia na Malikiya na Miyamini na Eleazali na Malikiya na Benaya.

26 Kulwa mwo lukolo lwa Elamu ni

Matania na Zekalia na Yehieli na Abdi na Yelemoti na Eliya.

27 Kulawa mwo lukolo lwa Zatu ni

Eliashibu na Matania na Yelemoti na Zabadi na Aziza.

28 Kulawa mwo lukolo lwa Bebai ni

Yehohanani na Hanania na Zebai na Atilai.

29 Kulawa mwo lukolo lwa Bani wandaga

Meshulamu na Maluki na Adaya na Yashubu na Sheali na Yelemoti.

30 Kulawa mwo lukolo lwa Pahath Mmoabu wandaga

Adina na Kelali na Benaya na Maaseya na Matania na Besaleli na Binui na Manase. 31 Kulawa mwo lukolo lwa Halimu wandaga ni Eliezeli na Ishiya na Malikiya na Shemaya na Shimioni, 32 na Benjamini na Maluki na Shemalia. 33 Kulawa mwo lukolo lwa Hashumu ni Matenai na Matata na Zabadi na Elifeleti na Yelemai na Manase na Shimei. 34 Kulawa mwo lukolo lwa Bani ni, Madai na Amilamu na Ueli, 35 Benaya na Bedeya na Keluhi, 36 Wania na Melemoti na Eliashibu, 37 Matania na Matenai na Yaasu. 38 Kulawa mwo lukolo lwa Binui ni, Shimei, 39 na Shelemia na Nasani na Adaya, 40 na Makenadebai na Shashai na Shalai, 41 Azaleli na Shelemia na Shemalia, 42 Shalumu na Amalia na Yosefu. 43 Kulawa mwo lukolo lwa Nebo ni Yeieli na Matitia na Zabadi Zebina na Yadai na Yoeli na Benaya.

44 Wagosi awa wose wandaga walomba wavele wa hi Wayahudi naho wamwenga wawe welekaga nawo wana, ivo wawalekaga wavele awo wakeitile kwawe hamwenga na wana wawe.