1 Mwo mhilimo wa nk'hongo wo useuta wa Koleshi seuta ywa Uwajemi, vileke mbuli ya Zumbe Mnungu iyo alongile kwa sila ya mlotezi Yelemia ikint'he. Zumbe Mnungu autendaga moyo wa Koleshi seuta ywa Uwajemi abwelekeze sigilizi mwo useuta wakwe na kuwandika kugamba, 2 Ivi nivo akulonga Koleshi seuta ywa Uwajemi,

"Zumbe Mnungu ywa kwe mbingu kanink'ha useuta wose wa mwe isi naho kanisigiila nimzengele nyumba ya Mnungu Yelusalemu uko Yuda. 3 Kila yumwenga ywenyu mwa want'hu wakwe, Mnungu ande na nyuwe, mwiite Yelusalemu, naho mkaizenge nyumba ya Zumbe Mnungu, Mnungu ywa Izilaeli. 4 Kila yumwenga asigale mgima mwo kusama, naaungwe kwambizwa ni want'hu wakwikala hagihi naye, neenk'higwe masawa, zahabu, vint'hu na mifugwa hamwenga na malavo ya kuunga mwenye kwaajili ya Nyumba ya Mnungu uko Yelusalemu."

5 Ivo elo, vilongozi we zink'holo za makabila ya Yuda na Benjamini na walavant'hambiko na Walawi, na kila yumwenga enk'higwe moyo wa kugenda kuizenga Nyumba ya Mnungu uhya uko Yelusalemu, wahalawaga na kugenda kufunganya. 6 Want'hu wa hagihi nawo wawambizaga want'hu awo kwa kuwenk'ha vint'hu vidamanywe kwa masawa na zahabu na vint'hu vituhu va yombe, na mifugwa na mageleko ya yombe, hamwenga na malavo yakulavigwa kwa kuunga wenye kwajili ye Nyumba ya Mnungu.

7 Seuta Koleshi awavuzilaga vyombo ivo seuta Nebukaduleza andaga kaviguha kulawa Yelusalemu na kuviika mwe nyumba ya milungu ywakwe. 8 Seuta Koleshi ywa Pesia amwink'haga Miteledati uyo mwamizi ywe chumba cho kuikila vyombo, vyombo ivo aviwazaga ha Shezihabaza kilongozi ywa Yuda.

9 Ivi nivo vint'hu viwazigwe: Nyiga milongo mitatu za zahabu, nyiga alufu imwenga za masawa, nyiga nt'huhu milongo miidi na kenda, 10 nyiga ndodo za zahabu milongo mitatu, nyiga ndodo za masawa milongo mine na mlongo na vint'hu vituhu alufu imwenga.

11 Vint'hu vose va zahabu na masawa vandaga alufu shano na magana mane. Vose ivi Sheshibaza aviguhaga kubula Yelusalemu mwo yehe na want'hu watuhu waitaga kwo utahigwa uko Babeli kuita Yelusalemu.