1 Want'hu wa isi ya Yuda wamguhaga Yehoahazi mwana Yosia, wamuikaga ande seuta hant'hu ha ise uko Yelusalemu. 2 Yehoahazi andaga na miyaka milongo miidi na mitatu aho eze akonge kwikaila, naye alongozaga kwa lupisi lwa miezi mitatu uko Yelusalemu. 3 Seuta Neko ywa Misili amhausaga mwo useuta uko Yelusalemu na kuguha kodi ya isi ya kilo alufu nt'hatu na magana mane za masawa na kilo milongo mitatu na kane za zahabu. 4 Seuta ywa Misili amwiikaga Eliakimu, nduguye Yehoahazi kunda seuta ywa Yuda na Yelusalemu, ahitulaga zina dya Eliyakimu kunda Yehoyakimu. Mna Neko amguhaga Yehoahazi nduguye Eliyakimu na kumwigala Misili.

5 Yehoyakimu andaga na miyaka milongo miidi na shano umwo eze akonge kwikaila, alongozaga kulawa Yelusalemu kwa lupisi lwa miyaka mlongo na umwenga. Adamanyaga yaihile hameso ha Zumbe Mnungu, Mnungu ywakwe. 6 Nebukadineza seuta ywa Babeli amtowaga niyo amnyinya kwa minyololo ya shaba vileke amwigale kwe divugailo uko Babeli. 7 Nebukadineza aguhaga vyombo kulawa mwe Nyumba ya Zumbe Mnungu nakuvigala mwe Nyumba yakwe ya kiseuta uko Babeli. 8 Ivo udamanyi mtuhu wa Yehoyakimu hamwenga na yadya ahiizwe adamanye yaonekaga kwakwe, yawandikwa mwe kitabu cha Maseuta wa Izilaeli na Yuda. Yehoyakimu mwanawe andaga seuta hant'hu hakwe.

9 Yehoyakini andaga na miyaka mlongo na mnane umwo eze akonge kwikaila, alongozaga uko Yelusalemu kwa lupisi lwa miezi mitatu na mazuwa mlongo. Adamanyaga yaihile hameso ha Zumbe Mnungu. 10 Mwaka wize ukonge seuta Nebukadineza atumaga wegala ulosi, wamguhaga Yehoyakini kwe divugailo mpaka Babeli hamwenga na vyombo va yombe nk'hulu kulawa mwe Nyumba ya Zumbe Mnungu naye amtendaga Sedekia nduguye Yehoyakini kunda seuta ywa Yuda.

11 Sedekia andaga na miyaka milongo miidi na umwenga umwo akakonga kwikaila. Yehe alongozaga uko Yelusalemu kwa lupisi lwa miyaka mlongo na umwenga. 12 Adamanyaga yaihile hameso ha Zumbe Mnungu, Mnungu ywakwe, yehe hakekwezile hameso ha mlotezi Yelemia uyo alongaga ulosi ukulawa kwa Zumbe Mnungu.

13 Naho Sedekia asagukaga kwa seuta Nebukadineza uyo amtendaga akelise kwa zina dya Mnungu. Andilisaga mnk'hani naho mta moyo mdala, naho haungile kumuiya Zumbe Mnungu, Mnungu ywa Izilaeli. 14 Hamwenga na ayo vilongozi wose na walavant'hambiko wa Yuda hamwenga na want'hu waswesaga uhuilwa, wadamanyaga mbuli zose zihiile enga ziya wadamanye want'hu wa si nt'huhu waibanangaga Nyumba ya Mnungu iyo yehe mwenye andaga kaikukiza uko Yelusalemu. 15 Zumbe Mnungu ywa wakale wawe, agendeelaga kuwegaila ulosi kombokela wegala ulosi wakwe kwaviya andaga awaonela mbazi want'hu wakwe ne Nyumba ya Mnungu. 16 Mna wagendeelaga kuwabela wegala ulosi wa Mnungu, walemelaga ulosi wakwe na kuwaseka walotezi wakwe niyo maya ya Mnungu yakwela mwa want'hu wakwe naho hakwandile na sila yoyose ya kuyahoza.

17 Kwaivo Zumbe Mnungu amwigalaga seuta ywa Wakalidayo, uyo awakomaga wabwanga kwa sime mndani hant'hu hakukile naho hamwonele mbazi mnt'hu yeyose ande mbwanga hegu mvele hegu mdala hegu mnyonge. Mnungu awagelaga wose mwo udahi wa seuta ywa Babeli. 18 Aviguhaga kuita Babeli vyombo vose kulawa mwe Nyumba ya Mnungu, vikulu na vidodo, vindolo va Nyumba ya Mnungu hamwenga na vindolo va seuta na wakulu wakwe. 19 Wayokaga Nyumba ya Mnungu na kuzibogozola nk'handula za Yelusalemu, wayokaga mazumba yose ye kiseuta na kubananga kila kint'hu chakwe cha yombe. 20 Wadya wayokolwe kwe nk'hondo wegalwagwa Babeli uko wandaga watumwa wakwe na wa welekwa wakwe mpaka mwo lupisi lwa useuta wa Uwajemi. 21 Ivo wakint'haga ulosi wa Zumbe Mnungu alongile mlotezi Yelemia, "Isi neisigale haheina kulimigwa kwa miyaka milongo mfungate kuliha mazuwa yose ayo isi yekale haheina zuwa dyo kuhumula."

22 Mwo mwaka wa nk'hongo wo useuta wa Koleshi seuta ywa Uwajemi, vileke zikint'he mbuli ya Zumbe Mnungu alongile kwa sila ya mlotezi Yelemia, Zumbe Mnungu amtendaga Koleshi seuta ywa uwajemi abwelekeze sigilizi zikutimila mwo useuta wakwe wose iwandika ivi. 23 "Ivi nivo akulonga Koleshi seuta ywa Uwajemi. Zumbe Mnungu, Mnungu ywa kwe mbingu kanink'ha useuta wose wa kwe mbingu naho kanisigiila nimzengele Nyumba yakwe uko Yelusalemu mwe isi ya Yuda. Ivo haluse kila mnt'hu mwa nyuwe nyose mwi want'hu wakwe Zumbe Mnungu, haukeni mwite, naho Mnungu ywenyu ande hamwenga naye nyuwe nyose."