1 Malikia ywa Sheba eze eve mbuli za Selemani abulaga Yelusalemu vileke amgeze Selemani kwa muuza mbuli ndala. Alongozanaga na wandima wakwe hamwenga na ngamia zinule vint'hu va mhemp'he wedi na zahabu nyingi na maiwe ya yombe kulu. Eze abule kwa Selemani, amuuzaga mbuli zose izo andile nazo mwo moyo wakwe. 2 Selemani niyo amhitula yadya yose amuuzile, hakwandile na mbuli yoyose ndala adunduge kumgambila. 3 Malikia wa Sheba eze aone mzungu wa Selemani ne nyumba izo azengile, 4 naho eze aone nk'hande iyo yendile mwe meza yakwe na kuona ivo wakulu wa want'hu wakwe ivo wekale he meza, naivo wandima wakwe wandaga wakadamanya na ivo wavaile, naho wadya wakuwenk'ha vo kunywa ivo wavaile, na malavo yo kokwa ayo Selemani alavaga mwe Nyumba ya Mnungu, eze ayaone ayo ehelwagwa vitendese. 5 Ivo amgambaga seuta, "Yose niyevile mwe isi yangu mwe zindima zako ne mizungu yako ni ya kindedi. 6 Mna hya huwile mbuli izi mpaka aho nize nibule na kuwona kwa meso yangu mwenye. Vituhu vakwe ayo nigambilwe hayabuile hata nusu yakwe, mzungu wako no ugoli wako vijink'ha mwa yadya nivile. 7 Wavikilwa want'hu wako! wavikilwa wandima wako awo wakukimala halongole hako mazuwa yose nakutegeleza mzungu wako. 8 Atogolwe Zumbe Mnungu, Mnungu ywako uyo elelwe na weye niyo akutenda seuta hant'hu hakwe Zumbe Mnungu, Mnungu ywako. Kwaviya Zumbe Mnungu kawaungisa Waizilaeli na kuwatenda watoge mazuwa yose, kakuika unde seuta ywawe vileke uwatendele uwagilwa na uhuhilwa." 9 Naye amgelekaga seuta kilo alufu nne za zahabu na vint'hu va mhep'he wedi na maiwe ya yombe kulu. Hainati kulaila kwa yoyose kugelekwa ni Malikia wa Sheba vint'hu ivo va mhep'he amwink'hile seuta Selemani. 10 Iviyaiviya wandima wa Hulamu hamwenga na wandima wa Selemani wegale zahabu kulawa Ofili, wegalaga miti yedi na maiwe ya yombe kulu. 11 Selemani aguhaga miti iyo ya msandali niyo adamanya vibo kwaajili ya Nyumba ya Mnungu na kwaajili ya nyumba ya kiseuta naho kwaajili ya kudamanyila ving'weng'we na mazeze kwaajili ya wakemi. Mbuli enga izo hazinati zilaile mwe isi ya Yuda. 12 Seuta Selemani naye amwink'haga Malikia wa Sheba kila kint'hu icho aungile, chochose alombeze ukaleka viya vint'hu amwigaile seuta. Malikia niyo ahalawa na kuuya kwe isi yakwe hamwenga na wandima wakwe.

13 Kila mwaka nezikegalwa enga kilo alufu milongo miidi na nt'hatu za zahabu kwa seuta Selemani, 14 kuleka zahabu ahokele kulawa kwa waguzi na wachuuzi. Maseuta wose wa Alabia na wakulu wa mikowa wa Izilaeli nawo wamwigailaga Selemani masawa na zahabu. 15 Seuta Selemani adamanyaga nk'hindo nk'hulu magana maidi, kila imwenga yakizigwagwa enga kilo mfungate ya zahabu isanigwe. 16 Naho adamanyaga nk'hindo ndodo magana matatu, kila imwenga yakizigwagwa zahabu impaka kilo nt'hatu, niho seuta aziikaga mwe nyumba ye kiseuta ikwitangwa mbago ya Lebanoni. 17 Iviyaiviya seuta adamanyaga fumbi kulu dya kiseuta dyahamagwa kwa mahembe ya nt'hembo niyo dyakikizigwa zahabu yedi. 18 Difumbi idyo dyandaga na vibo mtandatu na hant'hu ha kuikila viga va zahabu. Nt'hendelo yo kulume na nt'hendelo yo kumoso ya fumbi idyo handaga ha kwegemela mikono, naho handaga na mahili maidi ya simba yakimale kila nt'hendelo. 19 Kwandaga na mahili mlongo na maidi ya simba yakimale mwo uheelo wa kila kibo. Fumbi enga idyo hedinati didamanywe mwo useuta wowose. 20 Vikombe vose va seuta Selemani vandaga va zahabu na vint'hu vose vandaga mwe nyumba ye kiseuta ye Mbago ya Lebanoni vandaga va zahabu yedi. Masawa haya fanyanywagwa kunda kint'hu cha yombe kulu mwo lupisi lwa seuta Selemani. 21 Seuta andaga na meli nezikiitaga Talishishi na wandima wa Hulamu, naho kila inabula miyaka mitatu, meli izo zauyaga zikamwigaila zahabu na masawa na mahembe ya nt'hembo na manyani na tausi. 22 Seuta Selemani andaga mgoli na mizungu kujink'ha maseuta wose wa mwe si. 23 Maseuta wose wa mwe isi zose nawao waungaga kuita kwa Selemani vileke wategeleze mzungu uwo enk'higwe ni Mnungu. 24 Kila yumwenga ywawe amwigailaga mageleko; Vyombo va masawa na zahabu na suke na vitowanilo na vint'hu va mhemp'he na falasi na mp'hunda falasi. Mageleko aya ayahokelaga kila mwaka. 25 Seuta Selemani andaga na viheha alufu nne kwaajili ya falasi na magali ye nk'hondo, na watowani wakugendeza falasi alufu mlongo na mbili izo aziikaga mwe mizi ina hant'hu haa kuikila falasi za nk'hondo, wamwenga nawo andaga nawo uko Yelusalemu. 26 Selemani awekailaga maseuta wose kukongela mto Eufulate mpaka kwe isi ya Wafilisiti na kugendeela mpaka mwo mhaka wa Misili. 27 Ivo Selemani ayatendaga masawa mwe Yelusalemu yande enga maiwe du, mielezi nayo yandaga mingi enga miti ya mikuyu iyo yandaga mwe mawandamo ye vigulu. 28 Selemani egailagwa zifalasi kulawa Misili na isi nt'huhu.

29 Mbuli nt'huhu za useuta wa Selemani kukongela nk'hongo mpaka uheelo, zawandikagwa mwe kitabu cha Mlotezi Nasani na mwo ulotezi wa Ahiya Mshiloni, na mwo uwona wa muona Ido, uwo ukulonga iviaivia zimbuli za Yeloboamu mwana Nebati. 30 Selemani alongozaga isi yose ya Izilaeli kwa miyaka milongo mine. 31 Selemani niyo abanika nakumoselwa msanga mwo mzi wa ise Daudi. Lehoboamu mwanawe niyo ekaila hant'hu ha ise.