1 Seuta Selemani adamanyaga kilingo cha shaba kina utali wa mita kenda na uzangalamu wakwe mita kenda na kimo chakwe mita nne na nusu. 2 Naho adamanyaga sima dya mazi dya shaba dya duala. Utali kuita hasi dyandaga mita mbili na lobo, uzangalamu wakwe mita nne na nusu, mzunguluko wakwe nawo wandaga mita mlongo na nt'hatu na nusu. 3 Hasi yo mzunguluko uwo, kwacholwagwa mahili ye zinjeku, zazungulukaga nt'hendelo zose ze disima idyo. Micholo ya mahili ye zinjeku izo zandaga safu mbili kunda kint'hu kimwenga ne disima idyo. 4 Sima idyo dyekalaga kulanga ya mahili ye zinjeku mlongo na maidi, mahili ayo matatu yakaulaga futa zawe kasikazini na matatu matuhu usweelo we dizuwa, matatu nayo kusini na matatu matuhu ulailo we dizuwa. Sima idyo dyekalaga kulanga mwa mahili ye zinjeku, nt'hendelo zawe za kunyuma zikanda kundani. 5 Unene wo lukazi lwe disima wandaga inchi nt'hatu, naho lukazi lwakwe lwandaga enga kikombe naho enga mabwali ya nt'hindimalo. Sima idyo dyaguhaga lita alufu milongo mtandatu za mazi. 6 Naho adamanyaga mabeseni mlongo ya kusunt'hila vihendo va nyama, naye ayaikaga mashano nt'hendelo ya kusini, mashano matuhu nt'hendelo ya kasikazini. Mabeseni ayo yasunt'hilaga vint'hu va kuikila malavo yo kokwa, mna diya disima dyandaga dya kuhakila walavant'hambiko.

7 Adamanyaga vinala mlongo va zahabu enga ivo ilagizwe, niyo aviika mwe nyumba ya Mnungu, vinala vishano nt'hendelo ya kulume vinala vituhu vishano nt'hendelo ya kumoso. 8 Adamanyaga meza mlongo niyo aziika mwe nyumba ya Mnungu, meza shano aziikaga mwe nt'hendelo ya kulume, meza nt'huhu shano nazo aziikaga nt'hendelo ya kumoso. Naho adamanyaga mabiga gana za zahabu.

9 Adamanyaga ukumbi wa walavant'hambiko na ukumbi mtuhu mkulu na nyivi zakwe, niyo azikiziga nyivi izo kwa shaba. 10 Aikaga sima mwe mp'hembe nt'hendelo ya kusini ya ulailo wa zua we nyumba ya Mnungu.

11 Hulamu adamanyaga nyungu na makoleo na nyiga. Ivo Halamu abindaga indima iyo ya seuta Selemani mwe nyumba ya Mnungu. 12 Idya mikola miidi ne zinyiga ne zitaji zimbili zandile kulanga ye mikola iyo, ne zinyavu zimbili zo kugubikila zinyiga ze zitaji ziikigwe mnanga mwe mikola, 13 iyo micholo enga makomamanga magana mane kwaajili ye zinyavu izo mbili, na safa mbili ziligane za makomamanga kwa kila nyavu za kuhambila zinyiga ziya zimbili kwa taji izo zandile kulanga ya kila mkola. 14 Naho adamanyaga vint'hu va kwinuila mabiga yandaga mnanga mwe visimiko vakwe. 15 Na sima diya dimwenga na mahili ye zinjeku mlongo na mbili hasi ye disima idyo. 16 Naho nyungu na makoleo na vyombo vituhu vose vadamanywaga mwe ndima iyo. Vint'hu vose ivo Hulamu Abi amdamanyilaga Selemani kwaajili ya nyumba ya Mnungu vandaga va shaba isunt'higwe.

17 Vint'hu vose ivo seuta avidamanyaga uko kwe kiwasa kwe nt'hindiga ya Yolodani hant'hu handile na ulongo wedi uwo wandaga uko Sukoti na Seleda. 18 Vint'hu vose ivi seuta Selemani avidamanye vandilisaga vingi, mna uzami we shaba iyo hawamanyikaga.

19 Selemani adamanyaga vint'hu vose ivo vandaga mwe nyumba ya Mnungu, kilingo cha zahabu na meza za kuikila mikate ikuikwa ha Mnungu, 20 vinala na vimuli vakwe va zahabu yedi va kumulikila hant'hu hadya Hakukise enga ivo ilagizwe, 21 micholo ya mabwali na vimuli na makoleo, vose vikanda va zahabu yedi, 22 mikasi ya zahabu yedi ne zinyiga na mabiga vihungu vo ubani na nyetezo vo kwinuila moto, vose navidamanywa kwa zahabu yedi. Nyivi za zahabu ya nyumba ya Mnungu, na nyivi za kundani ya hant'hu Hakukise ivo navo yadamanywagwa kwa zahabu yedi.