1 Seuta Manase andaga na miyaka mlongo na miidi umwo eze akonge kwikaila Yuda, alongozaga uko Yelusalemu kwa lupisi lwa miyaka milongo mishano na mishano. 2 Adamanyaga yaihile ha Zumbe Mnungu kwa kutimila sila ziihile za want'hu hewemmanyize Mnungu awo Zumbe Mnungu ayagulusaga umwo want'hu wakwe wa Izilaeli wandaga wakengila mwe isi. 3 Azengaga uhya hant'hu ha kuvikila milungu aho Hezekia ise ahabanangaga, naho akimalisaga vilingo va milungu ya Baali ne mikola ya Maashela. Niyo Avivikila vint'hu vose va kwe mbingu na kuidamanyila ndima. 4 Azengaga kilingo cha kuvikila milungu aho he Nyumba ya Mnungu hant'hu aho Zumbe Mnungu andaga kagamba, "Zina dyangu nedivikwe Yelusalemu ulo na ulo." 5 Azengaga kilingo cho kuvikila vint'hu vose va kwe mbingu mwe zi lwazo mbili mwe Nyumba ya Mnungu. 6 Naho awalavaga wanawe enga malavo yo kokwa mwe dikolongo dya Hinomu. Atowaga mnamulo na kulagula na usai naho adamanyaga ndima na wata mp'hepo na wasai. Adamanyaga mbuli nyingi ziihile ha Zumbe Mnungu, Zumbe Mnungu aihizwagwa. 7 Adiguhaga diya dihili disongolwe niyo adiika mwe Nyumba ya Mnungu uyo Mnungu awagambaga Daudi na mwanawe Selemani kugamba, "Mwe Nyumba ino aha Yelusalemu na mwa makabila mlongo na mbili ya Izilaeli ni hant'hu nihasagule nivikwe ulo na ulo. 8 Naho uneva want'hu wa Izilaeli wanadamanya yose niwalagize, wanatimila miko yose na malagizo na sigilizi zilavigwe kwa mkono wa Musa, ivo heniwaleke waguluswe kulawa mwe isi iyo niwenk'hile watati zawe." 9 Mna Manase awazaganyaga want'hu wa Yuda na Yelusalemu wage niyo wadamanya wihi kujink'ha isi izo Zumbe Mnungu azibanangaga hameso ha want'hu wa Izilaeli.

10 Zumbe Mnungu amkanyaga Manase na want'hu wakwe mna hawamtegeleze. 11 Kwaivo Zumbe Mnungu awegalaga watowani wakulu we difyo dya seuta ywa Asilia. Watowani awo wamgwilaga Manase kwa mjungo una nduwano niyo wamnyinya kwa minyololo ya shaba na kumwigala mpaka Babeli. 12 Umwo andaga mwe makunt'ho alombezaga aonelwe mbazi na Zumbe Mnungu, Mnungu ywakwe, akeselezaga vitendese hameso ha Mnungu ywa wakale wakwe. 13 Naye umwo andaga akalombeza, Mnungu evaga kulombeza kwakwe niyo amvuza Yelusalemu mwo useuta wakwe. Niho Manase amanya kindedi kugamba Zumbe Mnungu niye Mnungu. 14 Umwo yeze yajike ayo, Manase azengaga nk'handula tuhu nt'hendelo ye kuse yo mzi wa Daudi, usweelo we dizuwa mwa Gihoni mwe dikolongo, auzengaga mpaka mwe nk'hili ye Samaki, azungulusaga mpaka mwe vibo niyo awinulisa kulanga. Hamwenga na ayo awaikaga wakulu wa watowani mwe mizi yose ya Yuda ya magomela. 15 Alavaga mwe Nyumba ya Mnungu milungu yose ya watakwiza na mahili hamwenga na vilingo vose ivo andaga kazizenga mwo mnima we Nyumba ya Zumbe Mnungu na mwe Yelusalemu, aviduulaga kuse yo mzi. 16 Akivuzaga kilingo cho kumvikila Zumbe Mnungu, niyo alava nt'hambiko zo utondowazi na za nt'hogola mnanga mwake, naye awalagizaga want'hu wa Yuda wamvike Zumbe Mnungu, Mnungu ywa Izilaeli. 17 Hata ivo want'hu wagendeelaga kulava malavo hant'hu ha kulanga henuke mna wazilavaga du kwa Zumbe Mnungu, Mnungu ywawe.

18 Udamanyi mtuhu wa Manase, malombezo yakwe kwa Zumbe Mnungu na ulosi agambilwe ni walotezi walongaga naye kwa zina dya Zumbe Mnungu, Mnungu ywa Izilaeli, ayo yose yawandikagwa mwe kitabu cha maseuta ywa Izilaeli. 19 Malombezo yakwe hamwenga na ivo Mnungu amzumile, wavu wakwe wose andaga hiyo mhuwila, hant'hu azengile ha kuvikila na ivo adamanye Ashela na mahili akanda akei kukeseleza, ayo yawandikagwa mwo kumbukila za walotezi. 20 Manase abanikaga na kumoswa msanga mwe nyumba ye kiseuta, mwanawe andaga seuta hant'hu hakwe.

21 Amoni andaga na miyaka milongo miidi na miidi umwo eze akonge kwikaila Yuda, alongozaga miyaka miidi uko Yelusalemu. 22 Adamanyaga yaihile ha Zumbe Mnungu enga viya Manase ise adamanyaga. Naho alavaga malavo na kuidamanyila mahili ndima ayo yasongolwagwa ni Manase. 23 Naye hakeseleze hameso ha Zumbe Mnungu enga ivo atendile ise Manase, mna yehe andilisaga mwiihi kujink'ha ise ivo andaga. 24 Akajika wandima wakwe waikaga mzungu wiihile na kumkoma mwe nyumba yakwe ye kiseuta. 25 Mna want'hu wa Yuda wawakomaga wadya want'hu waikile mzungu wiihile. Wamtendaga Yosia mwanawe kunda seuta hant'hu hakwe.