1 Umwo kinyemi cha kaidi kize kisile, want'hu wose wa Izilaeli waitaga mwe mizi yose ya Yuda, watulaga mikola ya maiwe na kuyakant'hakant'ha mahili ye milungu ya Ashela, mnungu ywa kivele. Wabanangaga hant'hu ha kulanga ha kuvikila milungu mituhu hamwenga ne vilingo vakwe kila hant'hu mwe Yuda na Benjamini na Efulaimu na Manase. Umwo weze wabanange ivi vose, Waizilaeli wauyaga mwe mizi yawe wenye. 2 Seuta Hezekia awaikaga walavant'hambiko na Walawi mwe mafyo, kila fyo viligane na ivo wakuunga watende, uneva ni walavant'hambiko hegu Walawi vileke walave malavo yo kokwa na malavo yo utondowazi na kudamanya ndima mwe Nyumba ya Mnungu na kugamba nivedi na kukema wila he nk'hili ye Nyumba ya Mnungu. 3 Seuta alavaga malavo yakwe kulawa mwo ugoli wakwe mwenye kwaajili ya malavo yo kokwa mtondo na kisingi vileke zinde za dizuwa dyo kuhumula na mwe dizuwa dye kinyemi na dyo kulawa kwo mnenge na kwaajili ya mazuwa tuhu na ya kinyemi ayo yasigiilwe viligane ne miko ya Zumbe Mnungu. 4 Seuta awalagizaga wadya wakwikala Yelusalemu walave kila kiya kikuungwa wenk'higwe walavant'hambiko na Walawi vileke woho wakelave kwa uhuilwa mwe zindima ze miko ya Zumbe Mnungu. 5 Umwo ize ilawe sigilizi, want'hu wa Izilaeli walavaga malavo yawe ya nk'hongo ya nk'hande na divai na mavuta ya zaituni na uki hamwenga na vihandwa va kwe nk'honde. Naho waletaga malavo imwenga ya mlongo ya kila kint'hu. 6 Want'hu wa Izilaeli na Yuda wekalaga mwe mizi ya Yuda naho waletaga malavo yawe ya ng'ombe na ngoto na vint'hu vituhu niyo waviika kwaajili ya ndima ya Zumbe Mnungu. Waikaga vint'hu ivo mwe viumbiko. 7 Mwo mwezi wa katatu wakongaga kuviika vedi vint'hu ivo na kubinda mwezi wa mfungate. 8 Seuta Hezekia na wandima wakwe weze waone viumbiko ivo wamtunyaga Zumbe Mnungu na want'hu wakwe wa Izilaeli. 9 Seuta Hezekia awauzaga walavant'hambiko na Walawi ivo yeli viambiko ivo. 10 Uzia mlavant'hambiko mkulu uyo andaga mwelekwa ywa Sadoki niyo amhitula, "Kukongela umwo want'hu weze wegale malavo yawe mwe Nyumba ya Mnungu, kina nk'hande ikint'hile naho kina kindolo kikulu. Zumbe Mnungu kawavikila want'hu wakwe nivo vikuleka kipata vint'hu ivi vose."

11 Niho seuta Hezekia awalagizaga wadamanye magulu mwe Nyumba ya Mnungu nawo niyo wadamanya. 12 Niyo kwa uhuilwa wawe waletaga malavo yawe imwenga ya mlongo na kuikwa kwa ndima ya Mnungu. Wamwiikaga Konania Mlawi ande mkulu ywawe mwe kukimaila vint'hu ivo vilavigwe na Shemei nduguye ande mwambizi ywakwe. 13 Nawo Yehieli na Azazia na Nahati na Asaheli na Yelemoti na Yozabadi na Elieli na Isimakia na Mahati na Benaya waikagwa wande wakimalizi mwo ukimalizi wa Konania na Shimei nduguye. Awa wose wasagulwagwa na seuta Hezekia na Uzia mkulu ywawe mwe Nyumba ya Mnungu. 14 Kole mwana Imna, Mlawi uyo andaga mwamizi we nk'hili yo Ulailo wa zuwa mwe Nyumba ya Mnungu akimailaga malavo yose ya want'hu walavile kwa kuunga wenye kwa Mnungu, naho apangaga malavo kwaajili ya Zumbe Mnungu na yadya malavo yakukile. 15 Na Edeni na Miniamini na Yeshua na Shemaya na Amalia na Shekania wamwambizaga kudamanya ndima iyo kwa uhuilwa mwe idya mizi mituhu wekale walavant'hambiko. Wawapangilaga ndugu zawe Walawi nk'hande kuligana na mafyo yawe wakulu kwa wadodo, 16 naho haheina kukaula lukolo lwawe uko wawadikilwe, wawenk'hagwa hant'hu wadya wana we kilume awo wandaga ana miaka mitatu na kugendeela, naho awo wengilaga mwe Nyumba ya Zumbe Mnungu mazua yose kwa kukint'hiza zindima zawe. Kila yumwenga apataga hant'hu hakwe viligne ne ndima adamanye mwo luzo lwakwe. 17 Walavant'hambiko wawandikagwa viligane ne zink'holo zawe, Walawi wabuzaga miaka milongo miidi na kugendeela wawandikwagwa viligane ne zindima zawe no luzo lwawe. 18 Wawandikagwa wose hamwenga na wana wawe wadodo na wakaziwe na wana wawe we kilume na wana wawe wa kike. Kwaviya wandaga wahuwilwa mwo kukekukiza. 19 Iviya iviya mwa awo welekwa wa Haluni, walavant'hambiko awo wandaga wakekala mwe zink'honde izo zizunguluke kuse ye mizi yawe kwandaga na want'hu wasagulwe kwe mizi iyo awo wawapangile want'hu nk'hande. Wawenk'haga nk'hande kila mgosi mwa walavant'hambiko na kila yumwenga uyo awandikwagwa mwo lukolo lwa Walawi. 20 Ivi nivo seuta Hezekia adamanyaga uwagilwa na uhuilwa ha Zumbe Mnungu, Mnungu wakwe mwe isi yose ya Yuda. 21 Andaga mpati kwaviya kila kint'hu icho adamanye mwe undima wakwe mwe Nyumba ya Mnungu na mwe kutimila miko na sigilizi, amzungulaga Mnungu ywakwe na kudamanya ndima kwa moyo wakwe wose.