1 Ivo Selemani abindaga indima yose adamanyaga kwaajili ye nyumba ya Mnungu, Selemani niyo aviika kundani vint'hu viya ise Daudi aviikaga kwajili ye ndima ya Zumbe Mungu. Vint'hu ivo vandaga ni, masawa na zahabu na vint'hu vituhu vose na kuviika mwe kindolo che nyumba ya Mnungu.

2 Ivo seuta Selemani niyo awetanga uko Yelusalemu vilongozi wose wa makabila na nk'holo za Izilaeli vileke wadiguhe Disanduku dya Ndagano dya Zumbe Mnungu kulawa mwo mzi wa Daudi wadiigale mwe nyumba ya Mnungu uwo wamanyikaga Siyoni. 3 Niho want'hu wose wa Izilaeli wezaga hamwenga kwa seuta mwe dizuwa dya kinyemi dya mwezi wa mfungate. 4 Vilongozi wose wa Izilaeli weze wabule, Walawi wadinulaga Disanduku dye Ndagano, 5 nawo wadikwezaga Disanduku dye Ndagano ne Dihema dikukile hamwenga na vyombo vose vikukile ivo vandaga mwe dihema. Walavant'hambiko na Walawi waviinulaga vint'hu ivo, 6 seuta Selemani no mdugano wose wa Izilaeli uwo udugane wandaga he Disanduku, wakalava nt'hambiko nyingi za ngoto na ng'ombe hezikudaha kuwazigwa. 7 Niho walavant'hambiko waletaga Disanduku dya Ndagano dya Zumbe Mnungu mpaka hant'hu hakwe mndani mwa hant'hu Hakukile he Nyumba ya Mnungu, nuko kugamba hant'hu Hakukise na kudiika hasi ya mawawa ya wadya viumbwa. 8 Viumbwa viligane enga makelubi wakunguzulaga mawawa yawe no kugubika Disanduku dye Ndagano ne Disanduku ne mihiko yakwe ye kudiinuila vandaga hasi ya mawawa. 9 Kwaviya mihiko iyo yandilisaga mitali, kusongoka kwakwe kwaonekaga zisomokela kulawa hant'hu hakukise mwe chumba cha kundani mna heikaoneka kwa kuse. Mihiko iyo iyaho hata ivi dielo. 10 Mndani ye Disanduku hakwandaga na kint'hu chochose mna zandaga du ziya zimbao zimbili za maiwe izo Musa aziikaga mndani mwakwe uko kwo mnima wa Holebu, hant'hu aho Zumbe adamanye Ndagano na Waizilaeli umwo wakalawa Misili.

11 Aho walavant'hambiko weze wahalawe aho hant'hu hakukile, walavant'hambiko wose wandile uko wakekukizaga haheina kukaula mafyo yawe. 12 Walawi wose wakemi wakanda ni hamwenga na Asafu na Hemani na Yedusuni hamwenga na Walawi watuhu we zink'holo zawe, wakanda wavala suke zawe zing'aile naho wakanda wenula lupatu na vinanda na mazeze, wakimalaga nt'hendelo ya ulailo wa zuwa we kilingo. Walavant'hambiko gana na milongo miidi watowa magunda wandaga hamwenga nawo. 13 Watowa magunda na wakemi niyo walungana mwe izwi kunda enga izwi dimwenga, wakamtogola, nawo wenulaga izwi kwa hamwenga na watowa magunda na lupatu na vyombo vituhu va ukemi, wamtogolaga Zumbe wakagamba,

"Yehe ni ywedi,

lukunde lwakwe ni lwa ulo na ulo." Niyo Nyumba ya Mnungu yamemezwa vunde.

14 Walavant'hambiko nawo hawadahaga kukimala kudamanya chochose kwaajili ye divunde idyo, kwaviya ukulu wa Zumbe Mnungu wamemaga mwe Nyumba ya Mnungu.