1 Seuta Yehoshafati ywa Yuda auyaga vedi kwe dizumba dyakwe dye kiseuta uko Yelusalemu. 2 Mna mlotezi Yehu mwana Hanani akwelaga kugenda kumtalamkila niyo naye amgamba seuta Yehoshafati, "Togola nouwambize waihi na kuwaungisa wadya wakumwihiya Zumbe Mnungu? Zumbe kakuihiya kwajili ya ayo udamanye. 3 Hata ivo kuna ayedi yakuoneka kwako kwaviya kuyausa mahili yose ya Ashela, mnungu ywa kivele naho kutimila yadya yakumwelela Zumbe Mnungu kwa moyo wako wose."

4 Seuta Yehoshafati ekalaga Yelusalemu naye aitaga kila isi mwa want'hu kukongela Beeli Sheba kusini mpaka mwe isi ye vigulu va Efulaimu nt'hendelo ya kasikazini niyo awahitula want'hu wamuuhiye Zumbe Mnungu, Mnungu ywa wakale wawe. 5 Asagulaga walamuzi mwe mizi yose ya Yuda ina magomela. 6 Niyo awagamba, "Mnde na wengele umwo mkalamula, kwaviya usengelo uwo mkulava hamkulava kwa sigilizi ya mnt'hu mna kwa sigilizi ikulawa kwa Zumbe Mnungu uyo e hamwenga nanywe kila mkalava ulamuzi. 7 Haluse mwogoheni Zumbe Mnungu, mnde na wengele mwe kila mbuli mkudamanya kwaviya kwa Zumbe Mnungu haafinyilize kwazaganya uwagilwa, hegu kwazagula, hegu kuguha matundu yakwazanya uwgilwa."

8 Mwo mzi wa Yelusalemu Yehoshafati asagulaga Walawi na walavant'hambiko na vilongozi we zimp'huga za Waizilaeli vileke walave usengelo kwaajili ya Zumbe na kuwalamula hewekuivana. Nawo wekalaga uko Yelusalemu. 9 Awenk'haga malagizo aya, "Vaungwa kumdamanyila Zumbe Mnungu ndima kwa uhuilwa naho kwa moyo wose kwa kutimila malagizo yake Zumbe. 10 Kila lupisi wakulawa mwo mzi wowose udya wakawegailani malongelezo yoyose mwe mbuli yo ukomi, kubananga imiko, na sigilizi na malagizo, walangilizeni vedi vileke wasekutenda vihile kwa Zumbe Mnungu. Hamna tendile ivo nyuwe hamwega na wandugu zenyu nombwiilane na maya ya Zumbe Mnungu. Mna tendeni ivo vikuungwa homnde na masa. 11 Amalia, mlavant'hambiko mkulu niye akuunga akimaile mbuli zose za Zumbe Mnungu, naye Zebadia mwana Ishumaeli kilongozi we dikabila dya Yuda naande mwetu mwe mbuli yoyose ya seuta. Walawi nawo nawande wakimalizi enga watowani wakulu hameso henyu. Kenk'heni moyo naye Zumbe Mnungu naande hamwenga na wadya wakudamanya ayedi!"