1 Naho Yehoshafati mwana Asa andaga seuta hant'hu ha ise, akeikaga lumwe kwa udahi kuhigana na Izilaeli. 2 Aikaga watowani mwe mizi yose ya Yuda ina magomela, naho aikaga watowani mwe Yuda na mwe mizi ya Efulaimu iyo yatahagwa ni ise. 3 Zumbe Mnungu amvikilaga Yehoshafati kwaviya atimilaga wikazi wa nk'hongo wa Daudi baakwe wa kumvika Mnungu naho hamvikile mnungu Baali. 4 Yehe amtimilaga Mnungu ywa wakale wakwe na kuzumila sigilizi zakwe naho hatimile udamanyi wiihile wa want'hu wa Izilaeli. 5 Zumbe Mnungu autendaga useuta wa Yuda utoge mwo useuta wa Yehoshafati, na want'hu wose wamwigailaga mageleko, ivo andaga na ugoli mwingi na nt'hunyo. 6 Aungisaga vitendese kumvika Zumbe Mnungu hamwenga na ayo ahabanangaga hant'hu hose ha kulanga ha kuvikila milungu mituhu na mahili ya Ashela, mnungu ywa kivele mwe isi ya Yuda.

7 Mwo mwaka wa katatu mwo useuta wakwe, Yehoshafati awatumaga wakulu wakwe awo Beni Haili na Obadia na Zekalia na Nataneli na Mikaya vileke wakahinize mwe mizi ya Yuda. 8 Walawi kenda na walavant'hambiko waidi waitaga hamwenga nawo. Walawi wandaga ni Shemaya na Netania na Zebadia na Asaheli na Shemilamoti na Yehonatani na Adoniya na Tobia na Tobi Adoniya na walavant'hambiko wandaga ni Elishama na Yeholamu. 9 Wakiguhaga kitabu che miko cha Zumbe Mnungu niyo wazunguluka nacho mwe mizi yose ya Yuda wakahiniza want'hu.

10 Zumbe Mnungu awagelaga wogofi maseuta wose we isi zizunguluke isi ya Yuda, nawo niyo wogoha kutowana nk'hondo na Yehoshafati. 11 Wafilisiti wamwenga wamwigailaga Yohoshafati mageleko hamwenga na masawa mengi na Waalabu watuhu nawo wamwigailaga ndolome alufu mfungate na magana mfungate na mbuzi alufu mfungate na magana mfungate. 12 Kwaivo Yehoshafati agendeelaga kunda mkulu vitendese. Azengaga gomela ne mizi ye vindolo, 13 ivo andaga ne kindolo kikulu mwe mizi ya Yuda.

Uko Yelusalemu aikaga watoani wakudaha kutowana, 14 viligane ne zink'holo za wakale wawe. Adina andaga mkulu ywe mafyo ya watowani wa Yuda naho akalongoza watowani laki nt'hatu. 15 Mkulu ywa kaidi andaga ni Yehohanani akanda na watowani laki mbili na alufu milongo mnane, 16 mkulu ywa katatu andaga ni Amasia mwana Zikili akanda na watowani laki mbili. Amasa akelavilizaga mwenye kwa ajili ye ndima ya Zumbe Mnungu. 17 Mkulu ywa mafyo mwo lukolo lwa Benjamini andaga ni Eliada mtowani atogile akanda na watowani laki mbili wata vitowanilo va nyuta na nk'hindo, 18 ywa kaidi andaga Yehozabadi andaga na watowani laki imwenga na alufu milongo mnane wakeikaga lumwe kwaajili ya nk'hondo. 19 Watowani wose awo wamdamanyilaga ndima seuta uko Yelusalemu hamwenga na ayo seuta aikaga watowani watuhu mwe mizi idya mituhu ina magomela hose mwe isi ya Yuda.