1 Seuta Yosia adamanyaga zuwa dya kinyemi dya Pasaka kwa kumtunya Zumbe Mnungu mwo mzi wa Yelusalemu, wachinjaga wanangoto wa Pasaka mwe dizuwa dya mlongo na kane dyo mwezi wa nk'hongo. 2 Awaikaga walavant'hambiko kwe ndima zawe izo wadamanyaga mwe Nyumba ya Mnungu awagelaga moyo wadamanye ndima kwa uhuilwa. 3 Hamwenga na ayo awagambaga Walawi awo wawahinize Waizilaeli wose awo wakiikaga kwaajili ya ndima ya Zumbe Mnungu, malagizo aya, "Diikeni idyo Disanduku dikukile mwe Nyumba ya Mnungu iyo aizengile Selemani mwana Daudi seuta ywa Izilaeli, homuungwe naho kudiinula na kudiigala uku na uku, mna mdamanyileni ndima Zumbe Mnungu ywenu na want'hu wakwe Izilaeli. 4 Keikeni lumwe viligane ne zink'holo zenyu kutimilana na malagizo ya Daudi seuta ywa Izilaeli na mwanawe Solomoni. 5 Kimaleni hant'hu hakukile enga via wakimalizi wandugu we zink'holo zenyu, naho kila yumwenga akimale hant'hu he mp'huga ya want'hu wa Izilaeli. 6 Mchinjeni mwanangoto ywa Pasaka, mkekukize, akajika mkeike lumwe kwaajili ya ndugu zenyu vileke wadahe kukint'hiza lagizo dya Zumbe Mnungu alongaga Musa." 7 Niho Yosia awenk'haga want'hu wose wana ngoto na mbuzi wakubula alufu milongo mitatu na majeku alufu nt'hatu, kwajili ya malavo ye pasaka, wose awa walavilagwa kulawa kwe mifugwa ya seuta. 8 Nawo wakulu wakwe, walavaga kwa kuunga kwawe niyo wawenk'ha want'hu na walavant'hambiko na Walawi. Hilikia na Zekalia na Yehieli awo wandaga wakulu wa Nyumba ya Mnungu wawenk'haga walavant'hambiko wanangoto na wanambuzi alufu mbili na magana mtandatu na majeku magana matatu kwaajili ya Pasaka. 9 Konania na wanduguze waidi, hemaya na Netaneli hamwenga na Hashabia na Yeieli na Yozabadi awo wandaga vilongozi wa Walawi, awo nawo wawenk'haga wanangoto na wanambuzi alufu shano na majeku magana mashano kwaajili ya malavo ya Pasaka.

10 Umwo ndima ya Mnungu ize isile walavant'hambiko wakimalaga hant'hu hawe na Walawi nawo mwa mafyo yawe enga ivo seuta awalagize. 11 Wachinjaga mwanangoto wa Pasaka na mbuzi nawo walavant'hambiko waiguhaga isakame na kuimyagila mwe kilingo nawo Walawi wakanda wasangula nk'hingo idya ye mifugwa. 12 Wayahausaga malavo yo kokwa vileke wazisangile viligane ne zink'holo zawe awo wendile walavant'hambiko vileke wamlavile Zumbe Mnungu enga ivo iwandikwe mwe kitabu cha Musa. Wadamanyaga iviya iviya kwa yadya majeku. 13 Wayokaga mwanangoto wa Pasaka enga ivo wasigilwe, naho watipwilisaga malavo yakukile mwe nyungu na masufulia makulu na mwe vikalango na kuwenk'ha want'hu wose. 14 Walawi wakeikilaga lumwe kwaajili yawe wenye na kwaajili ya walavant'hambiko, kwaviya wadya walavant'hambiko awo welekwa wa Haluni wandaga wakalava malavo yo kokwa hamwenga na ziya zigimbale mpaka nekilo. Ivo Walawi wakeikaga lumwe kwajili yao wenye na kwajili ya walavant'hambiko na welekwa wa Haluni. 15 Nawo wakemi welekwa wa Asafu wakimalaga hant'hu hawe enga ivo ilagize seuta Daudi ni Asafu na Hemani na Yedutuni muwona ywa seuta. Na wamizi wandaga kwe zinyivi, hawalekile ndima zawe kwaviya ndugu zawe Walawi wawadamanyilaga Pasaka. 16 Ivo elo ndima yose ya Zumbe Mnungu yadamanyagwa mwe zuwa dya kinyemi, kulava malavo yo kokwa mwe kilingo cha Zumbe Mnungu enga ivo alagize seuta Yosia. 17 Mwo lupisi ulo want'hu wose wa Izilaeli wadamanyaga zuwa dya kinyemi dya Pasaka na zuwa dya kinyemi dya mikate hegeligwa hamila kwa lupisi lwa mazuwa mfungate. 18 Hainati ilaile Pasaka enga ino mwe Izilaeli yose kukongela mwa mazuwa ya mlotezi Samweli naho hakwandaga na seuta yeyose wa Izilaeli uyo adamanye Pasaka enga idya adamanye seuta Yosia wakanda na walavant'hambiko na Walawi na want'hu wose wa Yuda na want'hu wa Izilaeli awo wendile uko hamwenga na want'hu wa Yelusalemu. 19 Pasaka iyo yadamanyagwa mwo mwaka wa mlongo na mnane mwo useuta wa seuta Yosia.

20 Umwo yeze yajike ayo yose adamanye seuta Yosia kwaajili ya Nyumba ya Mnungu, Neko seuta ywa Misili alongozaga watowani wakwe waite wakaitowe Kalikemishi mwo mto Eufulate, naye seuta Yosia alawaga kuita kutowana naye. 21 Mna Neko amtumilaga wegala ulosi kugamba, "Nk'hondo ino hiyo yako weye seuta ywa Yuda? Hizile kutowana na weye mna hiza kutowana na wank'hondo wangu naho Mnungu kanilagiza nisunguze. Leka kunihiga, Mnungu uyo ehamwenga na miye, vituhu vakwe naakubange." 22 Mna Yosia hazumile kumleka. Alemelaga kutegeleza ulosi alongile Mnungu kwa sila ya Neko, ivo akehitulaga vileke asekumanyika, niyo engila kwe nk'hondo mwe nt'hindiga ya Megido.

23 Nawo awo wakulasa wamlasaga seuta Yosia, ivo niyo seuta awagamba wandima wakwe: "Nihauseni hilumiziswa." 24 Wandima wakwe wamselezaga kulawa mwe digali dyakwe dya kuvutwa ni falasi, wamwinulaga ne digali dyakwe dya kaidi mpaka Yelusalemu. Aho abanikaga na kumoselwa msanga mwe vikuta va kiseuta. Want'hu wose wa Yuda na Yelusalemu wahongezaga file ya Yosia.

25 Mlotezi Yelemia atungaga wila wa kuhongeza kwaajili ye file yakwe Yosia, nawo wakemi wose wagosi kwa wavele wamtambula Yosia mwo kuhongeza mpaka dyelo. Aya yadamanyagwa kunda kihendo mwe Izilaeli nayo yawandikwa mwo Kuhongeza.

26 Udamanyi mtuhu wa Yosia na udamanyi wakwe wedi enga yawandikwe mwe sigilizi ya Zumbe Mnungu, 27 na udamanyi wakwe kukongela nk'hongo mpaka uheelo yawandikwa mwe kitabu cha Maseuta wa Izilaeli na Yuda.