1 Miyaka milongo miidi iyo Selemani aizengaga Nyumba ya Mnungu na nyumba yakwe mwenye ye kiseuta ize yomboke, 2 Selemani azengaga zikaya ziya enk'higwe ni Hilamu, yehe naye niyo awenk'ha Waizilaeli wekale umo. 3 Niho Selemani aita Hamati Zoba na kuutaha, 4 na kuuzenga mzi wa Tadimoli mwe dijangwa ne mizi yose ya kuikila vint'hu uko Hamati. 5 Naho Selemani azengaga mizi ya Beti Holoni wa kukenya na Beti Holoni wa mondwaisi, mizi ina gomela na nk'handula ne zink'hili zina madanga yakwe, 6 naho azengaga Baalati ne mizi yakwe yose ya kuikila vint'hu ne mizi yose ya kuikila magali yakwe ye nk'hondo na ye zifalasi zakwe hamwenga na chochose icho akuunga akizenge mwe Yelusalemu na Lebanoni na mwe isi yose iyo ekaile. 7 Want'hu wose wasigale mwa Wahiti na Waamoli na Wapelizi na Wahivi na Wayebusi awo wose hawandaga Waizilaeli, 8 naho welekwa awo wasigale mwe isi, awo Waizilaeli hawabanangagwa. Seuta Selemani awadamanyizaga ndima za kutigizwa naho ivi nivo wakudamanya mpaka dielo. 9 Mna Selemani hawatendile Waizilaeli kunda watumwa kwaajili ya ndima yakwe mna wandaga watowani na wakimalizi na watowani wakulu wa magali yakwe ye nk'hondo na magali yakugendezwa na falasi. 10 Awa nawo wakimalizi wa seuta Selemani: Wandaga magana maidi na milongo mishano awo wendile wakimalizi wakwe.

11 Selemani amsamizaga mwanakike ywa Falao seuta wa Misili kulawa mzi wa Daudi niyo amwigala kwe nyumba amzengele. Niyo agamba, "Mkazangu hekale mwe nyumba ya Daudi seuta ywa Izilaeli kwaviya hant'hu aho dyaikwagwa Disanduku dya Zumbe Mnungu handaga hakukile."

12 Seuta Selemani amlavilaga Zumbe Mnungu nt'hambiko zo kokwa mnanga mwe kilingo icho amzengele Zumbe Mnungu halongole ho lwazo lwe Nyumba ya Zumbe. 13 Alavaga nt'hambiko izo viligane ne sigilizi ya Musa kwaajili ye Dizuwa dyo Kuhumula, zuwa dya kinyemi dyo mwezi mhya na zuwa dya kinyemi dya mazuwa matatu kila mwaka, dizuwa dya kinyemi dya mikate heigelwe hamila na zuwa dya kinyemi dya majuma na zuwa dya kinyemi dya viheha. 14 Kwa kutimila malagizo ya ise Daudi aikaga kuhokelana kwa walavant'hambiko kwajili ye ndima zawe, Walawi nawo walongozaga nt'hogola na kwambiza walavant'hambiko viligane na ivo vikuungigwa. Naho awaikaga wamizi mwe vifyo ivo aikile wamile kila nk'hili, viligane na ivo asigiilaga Daudi mnt'hu ywa Mnungu. 15 Nawo hawalekile malagizo ya seuta Daudi awalagize walavant'hambiko na Walawi mwe mbuli yoyose ikanda ni hamwenga na ziya ze kindolo.

16 Ndima zose za seuta Selemani zagendeelaga kukongela mwe dizuwa aho nk'hongelo ye nyumba ya Zumbe Mnungu yaikwagwa mpaka kwo uheelo, ivo nyumba ya Zumbe Mnungu yajikaga ukuzengwa.

17 Selemani niyo aita Esioni gebeli na Eloti iyo imp'wani ye bahali, mwe isi ya Edomu. 18 Hilamu naye amwigailaga meli zalongozwagwa ni wakulu wa want'hu wakwe, want'hu wamanyi wa mwe meli. Want'hu awo hamwenga na wadya wa Selemani watambaga wakombokela mwe bahali niyo wabula Ofili. uko waguhaga kilo alufu mlongo na shano za zahabu niyo wamwigaila seuta Selemani.