1 Yehoboamu eze abule Yelusalemu aduganyaga watowani laki imwenga na alufu milongo mnane wa makabila ya Yuda na Benjamini atowane na makabila ya kasikazini, vileke ayavuze mwo useuta wakwe. 2 Mna ulosi wa Mnungu wamwizilaga Shemaya mnt'hu wa Mnungu kugamba, 3 "Mgambe Lehoboamu mwana Selemani, seuta ywa Yuda na Waizilaeli wose mwe Yuda na Benjamini kugamba, 4 miye Zumbe Mnungu nagamba, ‘Msekugenda kutowana na wandugu zenyu. Uyeni kila mnt'hu kwe kaya yakwe, kwaviya ayo yalaile ni enga ivo nipangile.’" Ivo watimilaga ulosi wa Zumbe Mnungu niyo wakeuiya kaya naho hawatowane na Yeloboamu.

5 Lehobohamu ekalaga Yelusalemu niyo aizengela magomela mizi mwe isi ya Yuda. 6 Mizi iyo ni Betelehemu na Etamu na Tekoa, 7 na Beti Suli na Soko na Adulamu 8 na Gati na Malesha na Zifu 9 na Adolaimu na Lakishi na Azeka 10 na Zola na Ayaloni na Hebuloni. 11 Ayatendaga magomela ayo yatoge niyo aika wamizi wakwe na kuwaika wakulu wa watowani mndani mwakwe hamwenga na magulu ye nk'hande na mavuta na divai. 12 Naho aikaga zink'hindo ne mijungo mwe mizi niyo aitenda mizi iyo itogese.Mizi ya Yuda na Benjamini yandaga mwo useuta wakwe.

13 Walavant'hambiko na Walawi wose awo wandaga wakekala kose mwe isi ya Izilaeli, wasamilaga uko kulawa kwe zikwawe. 14 Walawi walekaga hant'hu ha kudimila na hant'hu hatuhu kwaviya Yelobohamu na wanawe wawalemezaga kumdamanyila ndima Zumbe Mnungu enga walavant'hambiko wa Zumbe Mnungu. 15 Yelobohamu akesaguilaga walavant'hambiko wakwe mwenye kwaajili ya hant'hu ha kuvikila milungu ya mahili ya ndama na ya mbuzi iyo akedamanyilaga. 16 Want'hu wose kulawa mwe makabila ya kasikazini awo waungisaga kumvika Zumbe Mnungu, Mnungu ywa Izilaeli, waitanyaga na Walawi uko Yelusalemu vileke wamlavile Zumbe Mnungu nt'hambiko, Mnungu ywa wakale wawe. 17 Ivo wautendaga useuta wa Yuda utoge naho kwa lupisi lwa miyaka mitatu wakelungaga na useuta wa Lehobohamu mwana Selemani, wekalaga enga ivo wandaga mwo useutawa Daudi na useuta Selemani.

18 Yehobohamu alombaga mvele, zina dyakwe niye Mahalati uyo andaga mwana kike ywa Yelimoti mwana Daudi. Nine andaga Abihaili mwana kike ywa Eliabu mwana Yese, 19 Mahalati amwelekelaga Lehobohamu wana kilume watatu; Yeushi na Shemalia na Zahamu. 20 Niyo amlomba Maaka mwana kike ywa Abisalomu uyo amwelekelaga wana kilume wane; Abiya na Atai na Ziza na Shelomiti. 21 Lehobohamu alombaga wavele mlongo na mnane na wawele milongo mtandatu, elekaga wana kilume milongo miidi na wane na wana kike milongo mtandatu. Mwa awo wavele wakwe na wawele wakwe wose, amuungisaga Maaka mwanakike ywa Abisolomu. 22 Lehobohamu amsagulaga Abiya mwana Maaka kunda mkulu mwa wanduguze vileke eze ande seuta. 23 Lehobohamu adamanyaga mbuli yedi, awapangaga wanawe mwe isi yose ya Yuda na Benjamini niyo awaika mwe mizi yose ya magomela. Wakanda umwo awenk'haga nk'hande nyingi naho awalozaga wavele wengi.