1 Seuta Selemani niyo agamba,

"Zumbe Mnungu agambaga nowikale mwe diziza dititihale,

2 mna hikuzengela Nyumba yedi,

hant'hu hako ha kwikala ulo na ulo."

3 Umwo mdugano wose wa Izilaeli ukanda ukimaala uko, Seuta Selemani awahitukilaga want'hu na kumlombeza Mnungu awavikile. 4 Niyo agamba, "Atogolwe Zumbe Mnungu, Mnungu ywa Izilaeli kwaviya kwa ludole lwakwe kakint'hiza Indagano iyo alagane na tate Daudi akagamba, 5 ‘Kukongela zuwa idyo nawalavaga want'hu wangu kulawa Misili hisagule mzi mwe dikabila dyodyose dya Izilaeli vileke nizengelwe nyumba umwo want'hu nawanivike, naho hisagule mnt'hu yoyose kunda kilongozi ywa want'hu wangu wa Izilaeli. 6 Mna haluse hiusagula Yelusalemu unde mzi nenivikwe umwo, naho himsagula Daudi ande kilongozi ywa want'hu wangu wa Izilaeli.’"

7 Naho niyo Selemani agendeela kulonga, "Kwaivo tate Daudi nakaunga aizenge Nyumba umwo Zumbe Mnungu naavikwe, Mnungu ywa Izilaeli 8 mna Zumbe Mnungu amgambaga tate Daudi, ‘Ni vedi kugamba mwo moyo wako nokufanyanya unizengele Nyumba, 9 mna hiyo weye nounizengele nyumba mna mwanao we kilume mwenye niye naanizengele iyo inyumba umwo nenivikwe.’

10 "Zumbe Mnungu kakint'hiza Indagano iyo alagane. Hinda mkipe wo useuta wa tate Daudi, naho hikala mwe difumbi dyo useuta dya Izilaeli enga Zumbe Mnungu ivo alagane. Name hizenga Nyumba ya kumvika Zumbe Mnungu, Mnungu ywa Izilaeli. 11 Mwe nyumba ya Mnungu iyo hidiika Disanduku dye Ndagano, naho mndani mwe disanduku idyo mna Ndagano ya Zumbe Mnungu iyo adamanye na want'hu wa Izilaeli."

12 Niho Selemani akimala he kilingo cha Zumbe Mnungu ho mdugano wose wa Izilaeli niyo enula mikono yakwe kulanga akalombeza. 13 Selemani adamanyaga kilingo cha shaba, naye niyo akiika hagati yo ukumbi wa kuse. Utali wakwe na uzangalamu wakwe nounda mita mbili na lobo na kimo chakwe chandaga mita imwenga na lobo. Akwelaga mwe kilingo niyo afika madi na kufunamiza mtwi hasi hameso ho mdugano wose wa Izilaeli niyo enula mikono yakwe kulanga akalombeza. 14 Niyo alombeza akagamba, "Weye Zumbe Mnungu, Mnungu ywa Izilaeli hahali Mnungu mtuhu enga weye, kwe mbingu hegu kwe isi, weye ni mhuhilwa kwaviya kudiika Lagano dyako naho kuwalagisa lukunde lwako wandima wako wakwikala kwa kukutimila kwa moyo wawe wose. 15 Kukint'hiza kilapi waikaga kwa mndima ywako tate Daudi, kwa mnomo wako waikaga kilapi na mkono wako kuyakint'hiza kwa udahi wako mwenye. 16 Haluse elo, Weye Zumbe Mnungu, Mnungu ywa Izilaeli nakulombeza naho ukint'hize kilapi ulagane na mndima ywako tate Daudi, ukagamba, mazuwa yose nounde na mwelekwa ywa kwikala mwe difumbi dyo useuta ywa Izilaeli, uneva welekwa wako nawatimile kwa wengele miko yangu enga weye ivo utendile kwangu. 17 Haluse weye Zumbe Mnungu, Mnungu ywa Izilaeli nakulombeza ukint'hize yadya yose ulagane na mndima ywako Daudi."

18 "Mna ni kindedi weye Mnungu wadaha kwikala umu mwe isi na want'hu? Hata mbingu zose hazikudaha kukukint'ha weye, Togola Nyumba ya Mnungu ino niizengile neikukint'he? 19 Hata ivo weye Zumbe Mnungu, Mnungu ywangu, miye mndima ywako nakulombeza nitegeleze naho unink'he idyo nikulombeze dielo. 20 Uikaulise Nyumba ino kilo na msi, hant'hu aho usagule want'hu wako wadivike zina dyako. Nitegeleze miye mndima ywako umwo heza hant'hu aha kukuvika. 21 Tegeleza kulombeza kwangu miye mndima ywako na ya want'hu wa Izilaeli umwo wakulombeza kwombokela hant'hu aha. Utegeleze icho wakulombeza kulawa uko kwe mbingu naho unategeleza ukionele mbazi naho ukiusile wavu wetu."

22 "Mnt'hu anamdamanyila vihile miyawe, naho niyo aungwa aike kilapi, aneza kuikila kilapi he kilingo chako mndani mwe Nyumba ya Mnungu ino kugamba hana masa, 23 utegeleze kulawa kwe mbingu, uwasengele wandima wako, umsengele yudya mta masa viligane na ivo atendile, yudya heina masa mlekele viligane na uhuhilwa wakwe."

24 "Umwo want'hu wako wa Izilaeli weze wahumwe ni wank'ondo wawe kwaajili ya wavu uwo wakudamanyile, uneva waleka wavu wawe na kwingila mwe Nyumba ino, 25 ivo elo uwategeleze kulawa uko kwe mbingu. Wausile wavu wawe na uwavuze mwe isi iyo uwenk'hile wakale wawe."

26 Fula hainanyele kwaviya wakudamanyila wavu, wakalombeza kwa kwombokela aha na kuditambula dizina dyako, na kuleka wavu wawe, 27 wategeleze kulawa kwe mbingu naho uwausile wavu wawe wandima wako wa Izilaeli. Wahinize kutimila sila ikuungigwa naho ikanye fula mwe isi yako ino uwenk'hile want'hu wako inde yawe.

28 Uneva mwe isi kuna gumbo hegu tauni hegu hakuna fula hegu unyonge wa mani hegu sige hegu vigoda hegu want'hu wazungulukwa ni wank'hondo wawe mwe mzi wawe wowose, hegu uneva kuna makunt'ho hegu unyonge uwo ukudaha kuweziila, 29 chakulombeza uwategeleze want'hu wako wose wa Izilaeli wakakulombeza. Uneva kila yumwenga mwa want'hu wako mwe Izilaeli anabunk'hula makunt'ho yakwe na kinyulu chakwe, akakulombeza na kwinula mikono yakwe akaonyekeza mwe Nyumba ino akakulombeza, 30 umtegeleze kulawa kwako kwe mbingu uwausile masa na umtendele kila mnt'hu enga ivo vikuungigwa, kwaviya ni weye du ukumanya fanyanyi za mioyo ya want'hu wose, 31 vileke wakogohe kwa lupisi lwose umwo wakekala mwe isi uwenk'hile wakale wawe.

32 "Iviyaiviya umwo mta kwiza yumwenga ywa want'hu wako wa Izilaeli eneza kulawa isi ya hale kwiza kukuvika mwe nyumba ino na kwaajili yo ludole no ukulu we vihungi vako ukudamanya, 33 umwive kulawa kwe mbingu, umwink'he uyo mta kwiza yeyose naakulombeze, vileke want'hu wose wa mwe isi wamanye dizina dyako na kuzumila enga ivo wadamanye want'hu wako wa Izilaeli, naho wamanye kugamba nyumba ino niizengile ni hant'hu weye ukuungwa kuvikwa. 34 Umwo want'hu wako wakaita kwe nk'hondo kutowana na wank'hondo wawe hohose uko nouwegale, uneva wanakulombeza kuhinga mzi uno uusagule ne nyumba ino huzengele, 35 uweve kulombeza kwawe ukanda uko kwe mbingu naho uwenk'he uhumi umwo wakanda kwe nk'hondo."

36 "Uneva wadamanya wavu, kwaviya hahali yoyose hee kudamanya wavu, nawe uneva unaihiwa nawo na kuwaleka wahumwe ni wank'hondo wawe, na kutahigwa mpaka isi ya hale hegu hagihi, 37 umwo wakanda mwe isi iyo watahigwe, wanahituka na kukeiila na kulombeza kulekelwa kwa mioyo yawe yose wakagamba, kidamanya wavu naho chaga na kutenda wiihi; 38 naho uneva wakuhitukila kwa mioyo yawe yose na kwa muye wawe mwe isi ya wank'hondo wawe awo wawaguhaga na kuwataha, uneva wanakulombeza kuhinga isi uwenk'hile wakale wawe, no mzi uno wausagulaga ne Nyumba ino niizengile kwajili ya kukuvika, 39 ivo kulawa kwe mbingu hant'hu ho ukalo wako, wive kulombeza kwawe uwenk'he uwagilwa naho uwausile wavu watendile want'hu wako.

40 "Haluse Mnungu ywangu, kikaule naho kitegeleze ivo kikulombeza hant'hu aha. 41 Haluse kimala weye Zumbe Mnungu, wingile mwe nyumba yako hamwenga ne Disanduku dye Ndagano dikulagisa udahi lwako. Uwavikile walavant'hambiko wako kwa kila icho nawadamanye, want'hu wako nawo wande na kinyemi kwajili yo uwedi wako kwawe. 42 Weye Zumbe Mnungu usekumlemela mndima ywako umsagule. Ukumbukile lukunde lwako kwa mndima ywako Daudi."