1 Yotamu andaga na miyaka milongo miidi na mishano aho alongozaga uko Yelusalemu kwa lupisi lwa miyaka mlongo na mtandatu. Nine etangwagwa Yelusha, mwana Sadoki. 2 Adamanyaga mbuli zimwelela Zumbe Mnungu, enga ivo adamanyaga ise Uzia mna yehe hengile mwe Nyumba ya Mnungu na awo want'hu wagendelaga kudamanya mbuli ziihile. 3 Yotamu azengaga Nk'hili ya Kasikazini ye Nyumba ya Zumbe Mnungu na kudamanya ndima nk'hulu yo uzesi wa nk'handula hant'hu ha Ofeli. 4 Azengaga mizi mwe vigulu va Yuda naho azengaga gomela ne vigela mwe mbago. 5 Atowanaga nk'hondo na seuta wa Amoni na kuwahuma. Mwo mwaka uwo Waamoni wamlavilaga kilo alufu nt'hatu na magana mane na tani alufu za ngano na kilo alufu za shayili wagendeela kudamanya ivo mwo mwaka wa kaidi na wa katatu. 6 Seuta Yotamu agendeelaga kunda na ludole kwaviya ekalaga kwa kumtimila Zumbe Mnungu, Mnungu wakwe. 7 Udamanyi mtuhu wa Yotamu hamwenga ne nk'hondo yakwe na vint'hu vituhu adamanye viwandikwa mwe Kitabu cha Mbuli za Maseuta wa Izilaeli na Yuda. 8 Yotamu andaga na miyaka milongo miidi na mishano aho eze akonge kwikaila, alongozaga kwa lupisi lwa miyaka mlongo na mtandatu uko Yelusalemu. 9 Yotamu abanikaga na kumoselwa msanga mwo mzi wa Daudi naye Ahazi mwanawe andaga seuta hant'hu ha ise.