1 Umwo Selemani eze abinde kulombeza, moto niyo waseela kulawa kwe mbingu na koka malavo ne nt'hambiko zo kokwa zilavigwe, niho ungazi wa Zumbe Mnungu wamemaga mwe Nyumba ya Mnungu. 2 Walavant'hambiko hawadahaga kwingila mndani mwe Nyumba ya Mnungu kwaviya ung'azi wa Zumbe Mnungu waumemezaga inyumba iyo. 3 Waizilaeli wose weze waone moto ukaseela kulawa kwe mbingu naho ung'azi wa Zumbe Mnungu umema mwe Nyumba ya Mnungu, wafunamizaga mitwi yawe hasi, niyo wamvika na kumgamba Zumbe Mnungu nivedi kwaviya ywi ywedi naho lukunde lwakwe lwekala ulo na ulo. 4 Niyo seuta Selemani na want'hu wose walamlavila Zumbe Mnungu nt'hambiko. 5 Seuta Selemani nae alavaga nt'hambiko ya ng'ombe alufu milongo miidi na mbili na ngoto laki imwenga na alufu milongo miidi. Ivo nivo seuta Selemani na want'hu wose waiikukizaga Nyumba iyo inde ya kumvika Zumbe Mnungu. 6 Walavant'hambiko wakimalaga hant'hu hawe aho wasigilwagwa kukimala, Walawi nawo wakimalaga wakanda ne vyombo vawe va ukemi ivo seuta Daudi andaga kavidamanya kwaajili ya kumgamba Zumbe Mnungu nivedi. Wakemaga wakagamba "Ni kwaviya lukunde lwakwe ni lwa ulo na ulo!" Enga ivo Daudi awalagizaga, walavant'hambiko, watowaga magunda, Waizilaeli nawo wandaga wakimala.

7 Ivo Selemani aikukizaga hagati ho lwazo lwi kulongole kwe nyumba ya Zumbe Mnungu kwaviya niho ho kulavila malavo yo kokwa na mavuta ya malavo ya utondowazi, kwaviya kiya kilingo cha shaba hakikudaha kwenela malavo ayo yose.

8 Seuta Selemani naye adamanyaga zuwa dya kinyemi kwa mazuwa mfungate akanda hamwenga na mdugano mkulu wa want'hu wose wa Izilaeli, walawaga Hamati mpaka kwo mhaka wa Misili uwo wandile kusini. 9 Wandaga na mazua mfungate ya kukukiza kilingo na mazua mfungate matuhu ya kinyemi. Akajika mwe dizua dyo uheelo waduganaga wakavika. 10 Mwe dizuwa dya milongo miidi na nt'hatu dyo mwezi wa mfungate Selemani niyo awalaga want'hu waite kwe zikaya zawe, wakanga na kunda ne kinyemi mwe mioyo yawe kwa uwedi utendese uwo Zumbe Mnungu amtendelaga Daudi na Selemani na kwaajili ya want'hu wa Izilaeli.

11 Ivo seuta Selemani niyo abinda kuizenga Nyumba ya Zumbe Mnungu ne Nyumba ye kiseuta, naho adahaga kukint'hiza yadya yose yendile mwo moyo wakwe kwajili ya Nyumba ya Mnungu ne nyumba ya kiseuta. 12 Zumbe Mnungu amlailaga Selemani nekilo na kumgamba, "Hiva kiya ulombeze name hisagula hant'hu aha kwaajili yangu mwenye kunda Nyumba yangu na kwaajili ya kunilavila nt'hambiko. 13 Uneva nna zivugala zimbingu fula ise kunya hegu nnegala sige zidye vihandwa mwe isi hegu nna wegaila manyonge yaihile, 14 uneva want'hu wangu wetangwe kwa zina dyangu wana keseleza na kunilombeza na kunizungula na kuleka sila zawe ziihile, miye neni wetegeleze kulawa kwe mbingu na kuwausila uwavu wawe na kuihonya isi yawe. 15 Haluse neni ikaulise Nyumba ino na kuyategeleza aya want'hu wakulombeza hant'hu aha. 16 Kwaviya hisagula na kuikukiza Nyumba yangu vileke want'hu wadivike dizina dyangu ulo na ulo. Naho neniikaulise na kuyamila lupisi lwose. 17 Nawe unatenda kwa uhuhilwa enga iso Daudi ivo atendile na kudamanya yose namgambile atende, nawe unatimila zisigilizi zangu na malagizo yangu, 18 ivo miye nenitende fumbi dyako dyo useuta enga ivo niikile ndagano na iso Daudi na kugamba, Houswese mnt'hu mwa welekwa wakwe naa ikaile Izilaeli 19 Mna uneva unahituka na kuyaleka malagizo na sigilizi niwenk'hile na kuita kuivika milungu mituhu, 20 niho neniwahauseni Izilaeli kulawa mwe isi yangu niwenk'hile, name neni lemele Nyumba ino niikukize kwaajili yangu. Neni damanye kint'hu cha lubezo mwe isi yose."

21 "Hata uneva Nyumba ino ina ung'azi vitendese, wadya wose wokomboka nawehelwe niyo wagamba, ‘Nii Zumbe Mnungu kadamanya kint'hu enga iki mwe isi ino naho kwe kilingo iki?’ 22 Want'hu nawahitule, ‘Ni kwaviya wamleka Zumbe Mnungu, Mnungu ywa wakale ywawe uyo awalavaga Misili, niyo waitimila milungu mituhu naho niyo waivika na kuidamanyila ndima, ivo Zumbe Mnungu kawegaila mavuma ayo yose.’"