1 Ivo Yehoshafati ywa Yuda andaga na ugoli mwingi vitendese na nt'hunyo. Aikaga umbuya na Ahabu vileke mwanawe amlombe mwanakike ywa Ahabu seuta ywa Izilaeli. 2 Umwo ize yomboke miyaka mingi Yehoshafati aitaga Samalia akamuone seuta Ahabu. Ahabu amchinilaga Yehoshafati ngoto na ng'ombe nyingi kwa nt'hunyo yakwe hamwenga na want'hu wendile hamwenga naye, niyo amhembeleza waitanye vileke wautowe mzi wa Lamoti Gileadi. 3 Seuta Ahabu wa Izilaeli niyo amgamba Yehoshafati seuta wa Yuda, "Kiitanye kikautowe mzi wa Lamoti Gileadi?"

Naye niyo amhitula, "Miye ni hamwenga na weye naho want'hu wangu ni want'hu wako. Nekindanye hamwenga kwe nk'hondo." 4 Mna naho Yehoshafati niyo amgamba Ahabu, "Wande kuuza ulangilizi kwa Zumbe."

5 Ivo seuta Ahabu awetangaga walotezi. Wandaga walotezi wabuile magana mane niyo awauza, "Togoleni niite hatowane nk'hondo na Lamoti Gileadi hegu nisekuita?"

Walotezi wamhitulaga wakagamba, "Katowane, Zumbe naakwink'he ludole lwa uhumi."

6 Mna Yehoshafati auzaga akagamba, "Aha hahana mlotezi mtuhu ywa Zumbe Mnungu uyo kikudaha kumlombeza ulangilizi?"

7 Ahabu seuta ywa Izilaeli niyo amhitula Yehoshafati akamgamba, "Akei uuko mtuhu akudaha kukilongela kwa Zumbe, Mikaya mwana Imla, mna miye hikumuunga kwaviya hanati alotele ayedi mwa miye, uyo anilotelaga yaihile du."

Yehoshafati niyo amgamba, "Seuta, usekulonga ivo!"

8 Ivo Ahabu seuta ywa Izilaeli niyo amgamba yumwenga ywa wandima wakwe, "Sunguzeni kumwitanga Mikaya mwana Imla!"

9 Wakanda wavala mavalo yawe ye kiseuta, Ahabu seuta ywa Izilaeli na Yehoshafati seuta ywa Yuda wahumulaga mwa mafumbi yawe ye kiseuta aho ho lwazo lwo kuhetela ngano kwe mwingiilo ukuita Samalia. Mwo lupisi ulwo walotezi wandaga wakalotela wakanda kulongole kwawe. 10 Yumwenga mwa walotezi awo, uyo Sedekia mwana Kenaana adamanyaga mp'hembe za kilama niyo amgamba Ahabu, "Zumbe Mnungu agamba, ‘Nouwatowe ne zimp'hembe izi niyo wawahuma pele Wasilia.’" 11 Naho walotezi wose nawalonga kint'hu iicho kwa seuta ywa Izilaeli, "Kaitowe Lamoti Gileadi, naho nounde mhumi, Zumbe Mnungu naakwink'e ludole lwa kuwatowa."

12 Ivo yudya mnt'hu atumigwe akamwitange Mikaya amgambaga, "Walotezi wose walotela uhumi wa seuta. Nevindilise vedi unalotela enga iivo."

13 Mna Mikaya niyo agamba, "Kwa Zina dya Zumbe, nenilonge kiya Zumbe anigambile mie!"

14 Mikaya eze abule, seuta Ahabu amuuzaga, "Togola Mikaya, miye na seuta Yehoshafati kiite kikatowane nk'hondo na want'hu wa Lamoti hegu kisekuita?"

Mikaya niyo ahitula, "Iteni mkawatowe kwaviya Zumbe Mnungu naawenk'heni ludole lwa kuwahuma."

15 Mna seuta Ahabu niyo ahitula, "Nohutende ukelise kengahi ukalonga na miye kwa zina dya Zumbe kugamba nounigambile ye kindedi du?"

16 Niyo Mikaya ahitula, "Nawaona watowani wa Izilaeli wasambala mwe vigulu enga ngoto heziina mdimi. Ivo Zumbe niyo agamba, ‘Want'hu awa waswesa kilongozi, wakeuiye du kwe zikaya zawe kwa utondowazi.’"

17 Ahabu seuta ywa Izilaeli niyo amgambila Yehoshafati seuta Yuda, "Nehiwagambilani, uyu hakudaha kunilotela ayedi, mazuwa yose alotela maihi du!"

18 Mikaya niyo agendeela kulonga, "Tegelezeni niwagambileni kiya Zumbe anilagise! Mwa maona nehimuona Zumbe kekala mwe difumbi dyakwe dye Kiseuta, hamwenga na watumigwa wakwe wa kwe mbingu wakimalaga uku na uku. 19 Niyo Zumbe Mnungu auza, ‘Niani akudaha kumdant'hiliza Ahabu, vileke akatowane nk'hondo uko Lamoti vileke akakomigwe?’ Kila yumwenga ahitulaga kwa fanyanyi zakwe. 20 Kwo uheelo niyo mp'hepo akelaviliza ha Zumbe Mnungu niyo agamba, ‘Miye neniite.’ Zumbe Mnugu niyo amuuza, ‘Noumdant'hilize vivihi.’ 21 Naye niyo amhitula, ‘Neniite hawatende walotezi wose walonge udant'hi.’ Zumbe Mnungu niyo amgamba, ‘Haya ita ukatende ivo.’ "

22 "Ivo elo Zumbe Mnungu aikaga muye ywa kudant'ha mwe milomo ya walotezi wako, mna Zumbe Mnungu ka kuikila lumwe mbuli ziihile!"

23 Aho mlotezi Sedekiya mwana Kenaana amsogeelaga Mikaya mlotezi niyo amsant'hula mwe funda, akamuuza, "Muye ywa Zumbe kanileka vivihi miye niyo eza kulonga na weye?"

24 Mikaya niyo amhitula, "Nowize umanye mwe dizuwa idyo nowize wingile kwe chumba cha kundani ukake fisa."

25 Seuta Ahabu ywa Izilaeli niyo awagamba, "Mgwileni Mikaya niyo mwamwigala kwa Amoni mkulu ywo mzi uno na kwa Yoashi mwana seuta. 26 Wagambe wamvugaile kwe divugailo naho nk'hande yakwe neinde mkate na mazi mpaka mwe dizuwa idyo neniuiye vedi kulawa kwe nk'hondo."

27 Mikaya niyo amhitula, "Uneva unauya vedi, Zumbe naande halongile kwombokela miye! Mikaya niyo agendeela kulonga, Mkumbukile nyuwe nyose ivo nilongile!"

28 Ivo Ahabu seuta ywa Izilaeli aitaga hamwenga na Yehoshafati seuta ywa Yuda akautowe mzi wa Lamoti Gileadi. 29 Seuta Ahabu niyo amgamba seuta Yehoshafati, "Kikaita kwe nk'hondo, miye nenivale valo hi dya kiseuta, mna weye nouvale valo dya kiseuta." Ivo seuta ywa Ahabu ywa Izilaeli asakanyaga mavalo yakwe niyo aita kwe nk'hondo.

30 Seuta ywa Asilia awagambaga wadya wakulu wa watowani milongo mitatu na waidi wakulongoza magali ye nk'hondo wasekumtowa yeyose, mna wamtowe seuta ywa Izilaeli du. 31 Ivo wakulu wa watowani wakulongoza magali ye nk'hondo weze wamuone Yehoshafati, wagambaga ni seuta ywa Izilaeli. Wamhitukilaga vileke wamtowe. Mna Yehoshafati niyo aguta, niyo Zumbe Mnungu amyokola na kuwahausa wadya wandaga hagihi na kumtowa. 32 Wadya watowani wakulu weze waone kugamba handaga ni seuta ywa Izilaeli, walekaga kumtowa niyo wakeuiya. 33 Mna mtowani yumwenga ywa Asilia alasaga kwa kutant'hila niyo msale wakwe wakumlasa Seuta Ahabu hant'hu ha mavalo yakwe ye kilama yalungane. Niyo aguta akamgamba yudya akulongoza digali dyakwe dye kink'hondo, "Hilumiziswa, hitula digali kinyilike!" 34 Nk'hondo yagendeelaga msi mgima, seuta Ahabu andaga kegamizwa mwe digali dyakwe dye k'hondo dikwigalwa ni falasi, uku akawakaula Wasilia, naho ize ibule kisingi niyo abanika.