1 Mwo mwaka wa milongo mitatu na mtandatu mwo useuta wa seuta Asa, seuta Baasha wa Izilaeli aitowaga isi ya Yuda niyo akonga kuuzengela gomela mzi wa Lama vileke akindile mnt'hu yeyose asekulawa hegu kwingila mwe isi ya seuta Asa ywa Yuda. 2 Niho seuta Asa aguhaga masawa na zahabu kulawa mwe kindolo che Nyumba ya Zumbe Mnungu na nyumba ya kiseuta niyo azigala Damesiki kwa Beni Hadadi, seuta ywa Siria na sigilizi akagamba, 3 "Kiike ndagano ya hamwenga mwa miye na weye enga ivo watendaga tate na iso, kaula nakwink'ha geleko dya masawa na zahabu, ivo hausa ndagano yako na seuta Baasha ywa Izilaeli vileke uhalawe mwe isi yangu."

4 Beni Hadadi naye niyo ayazumila yadya alongile seuta Asa. Awatumaga wakulu wa watowani wakwe na watowani wakwe wakaitowe mizi ya Izilaeli. Nawo waitahaga mizi ya Iyoni na Dani na Abeli Maimu na mizi yose ye kindolo ya Nafutali. 5 Seuta Baasha eze eve mbuli ino akimalisaga kuzenga mzi wa Lama niyo aleka ndima yakwe. 6 Ivo seuta Asa awasigiilaga want'hu wose wa Yuda wasamizaga maiwe ya Lama ne zimbao ne vint'hu ivo Baasha aviguhaga kwa kuzengela. Asa aviguhaga vint'hu ivo na kuizengela mizi ya Geba na Mizipa.

7 Mwo lupisi ulo, mlotezi Hanani aitaga kwa seuta Asa ywa Yuda niyo amgamba, "Kwaviya wamhuilaga seuta ywa Asilia kuleka kumhuila Zumbe Mnungu, Mnungu ywako, watowani wa seuta ywa Asilia wakunyilika. 8 Togola kujala, yadya yadamanyike kwa Waesiopia na Walibia hawendile watowani wakulu na magali na wagendaza falasi wengi? Mna kwaviya weye wamhuilaga Zumbe Mnungu, yehe akutendaga uwahume. 9 Zumbe Mnungu akaula vedi isi yose vileke awenk'he ludole wadya wendile wahuilwa kwakwe. Weye kudamanya mbuli ya kihezi, kwaivo kukongela haluse nounde na nk'hondo kila zuwa." 10 Asa amwiiyaga mlotezi kwaajili ya mbuli ino, andaga na maya vitendese niyo amwigala mwe divugailo. Mwe lupisi uulo Asa akongaga kuwasulumiza want'hu.

11 Udamanyi wa Asa kukongela nk'hongo mpaka uheelo, wawandikwa mwe kitabu cha nk'humbukila cha maseuta wa Yuda na Izilaeli. 12 Mwo mwaka wa milongo mitatu na kenda wa kwikaila kwakwe, Asa apataga unyonge we viga alumisagwa, hata mwo kulumiswa kwakwe hazungule wambizi kulawa kwa Zumbe mna akezunguilaga wambizi kulawa kwa waganga 13 Ivo Asa abanikaga mwo mwaka wa milongo mine na imwenga mwo kwikaila kwakwe. 14 Amoselagwa msanga mwe kikuta icho akepukilaga mwenye mwo mzi wa Daudi. Wamgonezaga mwe dijeneza idyo dyandaga dihakigwa mavuta ya mhep'he wedi wi hengi udamanywe na mafundi wa kudamanya vint'hu va mhep'he. Wagimbaga moto mkulu kwa kumhonezela.