1 Ahazi akongaga kwikaila akanda na miyaka milongo miidi, alongozaga uko Yelusalemu kwa lupisi lwa miyaka mlongo na mtandatu. Yehe hatimile mliganyizo wedi wa ise Daudi mna atendaga yaihile ha Zumbe Mnungu. 2 Yehe atimilaga zinyendo za maseuta wa Izilaeli, naho akedamanyilaga mahili ya Mabaali. 3 Alavaga malavo yo kokwa mwe Dikolongo dya Hinomu na kuwalava wanawe nt'hambiko yo kokwa kwe milungu akatimila vihendo va want'hu wa si nt'huhu awo wagulusagwa ni Zumbe Mnungu umwo Waizilaeli wandaga wakengila mwe isi. 4 Alavaga nt'hambiko na kufunk'hiza ubani hant'hu ha kuvika milungu mituhu na hant'hu henuke na mwe vigulu na mwe kila hana kizuli cho mti.

5 Kwa ivo Zumbe Mnungu, Mnungu wakwe amlekaga Ahazi niyo ahumigwa ni seuta ywa Siria uyo awatahaga want'hu wengi, aitaga nawo Damesiki. Iviya iviya amtendaga ahumwe ni Peka mwana Lemalia, seuta ywa Izilaeli uyo awakoma want'hu wengi. 6 Seuta Peka awakomaga watowani wadahi ywa Yuda laki imwenga na alufu milongo miidi kwa zuwa dimwenga, kwaviya wandaga wamleka Zumbe Mnungu, Mnungu ywa wakale wawe. 7 Zikili uyo andaga mtowani mdahi ywa Izilaeli amkomaga Maaseya mwana seuta Ahazi na Azilikamu uyo andaga mkimalizi ywe nyumba ye kiseuta na Elikana mwambizi ywa seuta. 8 Waizilaeli wawatahaga ndugu zawe laki mbili wakanda wavele na wana wawe. Wawaguhaga mpaka Samalia hamwenga na ugoli mwingi uwo wautahaga.

9 Mna kwandaga na mlotezi wa Zumbe Mnungu zina dyakwe Obedi, andaga akekala Samalia.Yehe alawaga na kuwahokela watowani wa Izilaeli hamwenaga na wadya watahagwa ni Yuda umwo wandaga hagihi kwingila Samalia niyo awagamba, "Zumbe Mnungu, Mnungu ywa wakale wenyu andaga kawaihiya want'hu wa Yuda nivo vikuleka kawagela mwe mikono yenyu mna muwakoma kwa maya, mbuli iyo ibula mpaka kwe mbingu. 10 Nanywe haluse mwaunga muwatende wagosi na wavele wa Yuda na Yelusalemu wande watumwa wenyu, Togoleni hamanyize kugamba nyuwe mdamanya wavu mwa Zumbe Mnungu, Mnungu ywenyu? 11 Haluse tegelezeni yadya hulonga, Awa watahigwa ni wandugu zenyu, walekeleni waite chaivo Zumbe Mnungu naawasulumizeni kwa maya yakwe." 12 Niho vilongozi wa Efulaimu uyo Uzia mwana Yehohanani na Belekia mwana Meshilemoti na Yehizikia mwana Shalumu na Amasa mwana Hadilai, wawakalalizaga wadya walaile kwe nk'hondo. 13 Niyo wawagamba, "Msekuwegala aha awo muwatahile, Suwe kitenda kale wavu kwa Zumbe Mnungu na kumtenda ande na maya hata akisulumize. Haluse nii mwaunga mdamanye kint'hu nechongezele masa yetu?" Kwaviya masa yenyu ni makulu naho maya ya Zumbe Mnungu nayande mwa Izilaeli. 14 Ivo wadya watowani wawalekelaga wadya watahigwa hamwenga na vint'hu vose aaho ha wakulu no mdugano wose. 15 Wakulu wamwenga wasagulwagwa wawenk'he watahigwa vint'hu kulawa mwe viya vatahagwa. wawenk'haga suke, vilatu, hamwenga na nk'hande ikuwakint'ha na vo kunywa, iviaivia wawahakaga mavuta mwe zink'hwenge zawe. Wadya wadundugaga kugenda wenulwagwa mwe zimp'hunda, niyo wawaguha watahigwa wose mpaka Yeliko mzi we mitende kwa wandugu zawe akajika Waizilaeli wauyaga Samalia naho.

16 Mwo lupisi ludya seuta Ahazi atumaga wegala ulosi kwa seuta Asilia kulombeza wambizi, 17 kwaviya Waedomu wandaga weza naho, waitowaga isi ya Yuda na kuwahuma niyo waguha watahigwa wengi. 18 Naho Wafilisiti wandaga waitowa mizi yandaga kwevigulu va usweelo wa zuwa na Kusini ya Yuda. Waitahaga mizi ya Beti Shemeshi na Ayaloni na Gedeloti ne Digwilo na zikaya zakwe na Timna ne zikaya zakwe na Gimzo ne zikaya zakwe niyo wekala uumo. 19 Kwaviya seuta Ahazi ywa Yuda andaga hekuwakaula kwa wedi want'hu wakwe, naho andaga hiyo mhuilwa kwa Zumbe Mnungu, Zumbe Mnungu awatendaga want'hu wa Yuda wasekunda na ludole. 20 Ivo Tigilati seuta ywa Asilia amhigaga na kumwigaila makunt'ho Ahazi. 21 Ahazi aguhaga zahabu kulawa mwe Nyumba ya Mnungu naho kulawa mwe nyumba ya kiseuta na kulawa mwe nyumba za wakulu wa want'hu wakwe niyo amwink'ha seuta wa Asilia enga mageleko, mna iyo haimwambize kint'hu.

22 Umwo andaga mwe makunt'ho, seuta Ahazi amlekaga Zumbe Mnungu. 23 Kwaviya alavaga nt'hambiko kwa milungu ya Wasilia awo wawahumaga kwe nk'hondo agambaga, "milungu ya Asilia yawambizaga maseuta wakwe, ivo mnailavila nt'hambiko vadahika neinambize miye name iviaivia." Mbuli ino yagalaga makunt'ho kwakwe na mwe isi yose. 24 Ahazi niyo aduganya hamwenga vyombo va nyumba ya Mnungu na kuvitula vibesubesu. Niyo avugala lwivi lwa Nyumba ya Mnungu na kukizengela kilingo mwe kila mp'hembe ya Yelusalemu. 25 Mwe kila mzi wa Yuda adamanyaga hant'hu ha kulavila malavo milungu mituhu. Kwa kudamanya ivo amwihiyaga Zumbe Mnungu, Mnungu ywa wakale wawe 26 Udamanyi wakwe mtuhu na nyendo zakwe zose kulawa nk'hongo mpaka uheelo yawandikwa mwe kitabu cha maseuta wa Yuda na Izilaeli 27 Seuta Ahazi abanikaga niyo amoselwa msanga mwo mzi wa Yelusalemu mna hiyo mwe vikuta va maseuta wa Izilaeli. Hezekia mwanawe andaga seuta hant'hu hakwe.